AKP ភ្នំពេញ ថ្ងៃទី១៦ ខែមិថុនា ឆ្នាំ២០២៦--អាកាសយានដ្ឋានអន្តរជាតិតេជោ (KTI) ជាប់ចំណាត់ថ្នាក់ក្នុងបញ្ជីជា អាកាសយានដ្ឋានដ៏ស្រស់ស្អាតបំផុតមួយក្នុងចំណោមអាកាសយានដ្ឋាន ចំនួន ៧ នៅក្នុងពិភពលោក ក្នុងឆ្នាំ២០២៦។ នេះបើយោងតាមសេចក្តីប្រកាសព័ត៌មានរបស់ Prix Versailles 2026 ដែលចេញផ្សាយនៅថ្ងៃទី១៥ ខែមិថុនា ឆ្នាំ២០២៦។

សេចក្តីប្រកាសព័ត៌មានបានបញ្ជាក់ថា គម្រោងអាកាសយានដ្ឋានទាំងប្រាំពីរនេះបានបង្ហាញអំពីស្ថាបត្យកម្មដ៏វិសេសវិសាល និងប្លែកពីគេ បង្ហាញពីរបៀបដែលអាកាសយានដ្ឋានកំពុងងាកចេញពីស្តង់ដារចាស់ ដើម្បីផ្តល់ជូនពិភពលោកនូវស្តង់ដារថ្មីកាន់តែសម្បូរបែប និងស្រស់បំព្រង។

លោក Jérôme Gouadain អគ្គលេខាធិការនៃ Prix Versailles បានបញ្ជាក់ពីការជ្រើសរើសនៅឆ្នាំនេះថា៖ “មិនថាពួកគេទើបតែត្រូវបានសាងសង់ ឬបានឆ្លងកាត់ការជួសជុលធំដុំនោះទេ អាកាសយានដ្ឋានទំនើបៗទាំងនេះ គឺជាភាពច្នៃប្រឌិត ហើយដែលចំណុចសំខាន់ៗត្រូវបានរំលេចដែលទាក់ទងនឹងវប្បធម៌ក្នុងប្រទេស និងតំបន់របស់ពួកគេ […]”។

អាកាសយានដ្ឋាន និងស្ថានីយចេញដំណើរ-ស្ថានីយមកដល់ផ្សេងទៀត ដែលស្ថិតក្នុងបញ្ជីឆ្នាំ២០២៦ គឺស្ថានីយទី៣ នៃអាកាសយានដ្ឋានអន្តរជាតិ Guangzhou Baiyun ក្នុងប្រទេសចិន ស្ថានីយទី៣ នៃអាកាសយានដ្ឋាន Frankfurt ក្នុងប្រទេសអាល្លឺម៉ង់ ស្ថានីយទី២ នៃអាកាសយានដ្ឋានអន្តរជាតិ Lokapriya Gopinath Bardoloi នៅ Guwahati ប្រទេសឥណ្ឌា ស្ថានីយទី១ នៃអាកាសយានដ្ឋានអន្តរជាតិ Navi Mumbai ក្នុងប្រទេសឥណ្ឌា អាកាសយានដ្ឋានអន្តរជាតិ Pittsburgh នៅសហរដ្ឋអាមេរិក និងស្ថានីយទី១ នៃអាកាសយានដ្ឋានអន្តរជាតិ San Diego ក្នុងសហរដ្ឋអាមេរិក។

ក្នុងចំណោមនេះ អាកាសយានដ្ឋាន និង/ឬស្ថានីយចេញដំណើរ-ស្ថានីយមកដល់ ចំនួន៣ នឹងត្រូវជ្រើសរើសសម្រាប់ពានរង្វាន់ពិភពលោក (Prix Versailles) ដែលនឹងប្រគល់នៅចុងឆ្នាំ២០២៦នេះ។

សូមរម្លឹកថា អាកាសយានដ្ឋានអន្តរជាតិតេជោ ដែលស្ថិតនៅក្នុងខេត្តកណ្តាល និងមួយផ្នែកនៃខេត្តតាកែវ ជាអាកាសយានដ្ឋានកម្រិត 4F ដែលមានទុនវិនិយោគប្រមាណ ២ ០០០លានដុល្លារអាម៉េរិក និងអនុញ្ញាតឱ្យយន្តហោះឆ្លងទ្វីបគ្រប់ប្រភេទចុះចតបាន។

អាកាសយានដ្ឋាននេះ ត្រូវបានបើកការដ្ឋានសាងសង់នៅថ្ងៃទី០៧ ខែមករា ឆ្នាំ២០២០ ហើយការសាងសង់ដំណាក់កាលទី១ ត្រូវបានបិទបញ្ចប់ទាំងស្រុងនៅថ្ងៃទី៣១ ខែកក្កដា ឆ្នាំ២០២៥ ព្រមទាំងសម្ពោធដាក់ឱ្យដំណើរការជាផ្លូវការនៅថ្ងៃទី២០ ខែតុលា ឆ្នាំ២០២៥។

សូមបញ្ជាក់ផងដែរថា សម្រាប់ដំណាក់កាលទី១ អាកាសយានដ្ឋានអន្តរជាតិតេជោ អាចទទួលអ្នកដំណើរបាន ១៣លាននាក់ ក្នុងមួយឆ្នាំ ជាមួយនឹងទំនិញប្រមាណ ២ ៦០០តោន ពីឆ្នាំ២០២៥-២០៣០។ សម្រាប់ដំណាក់កាលទី២ ពីឆ្នាំ២០៣០-២០៥០ អាកាសយានដ្ឋានអាចទទួលអ្នកដំណើរបានដល់ប្រមាណ ៣០លាននាក់ ក្នុងមួយឆ្នាំ៕

ដោយ ផែន រតនៈ