AKP ភ្នំពេញ ថ្ងៃទី១៥ ខែមិថុនា ឆ្នាំ២០២៦ -- ប្រទេសប៉ាគីស្ថាន បានស្វាគមន៍យ៉ាងកក់ក្តៅចំពោះកិច្ចព្រមព្រៀងសន្តិភាពបណ្តោះអាសន្នរវាងសហរដ្ឋអាមេរិក និងអ៊ីរ៉ង់ ដែលមានគោលបំណងបញ្ចប់ជម្លោះរយៈពេលជាច្រើនខែរបស់ពួកគេ។ លោកប្រធានាធិបតី អាស៊ីហ្វ អាលី ហ្សាដារី និងរដ្ឋមន្ត្រីការបរទេស លោក អ៊ីស្សាក ដារ សុទ្ធតែបានសម្តែងសុទិដ្ឋិនិយមថា ការទម្លាយភាពទាល់ច្រកនេះនឹងបើកផ្លូវសម្រាប់សន្តិភាពដ៏យូរអង្វែង និងទូលំទូលាយនៅក្នុងតំបន់ និងផ្តល់នូវស្ថិរភាពដល់សេដ្ឋកិច្ចពិភពលោក។

ពេញមួយជម្លោះ ប្រទេសប៉ាគីស្ថានបានចូលរួមយ៉ាងសកម្មជាមួយគ្រប់ភាគីពាក់ព័ន្ធ ដោយតស៊ូមតិឱ្យមានការអត់ធ្មត់ ការសន្ទនា និងការទូត។ លោករដ្ឋមន្ត្រីការបរទេស ដារ បានកោតសរសើរចំពោះការប្តេជ្ញាចិត្តរបស់សហរដ្ឋអាមេរិក និងអ៊ីរ៉ង់ ខណៈដែលថ្លែងអំណរគុណដល់ដៃគូអន្តរជាតិ រួមទាំងប្រទេសអារ៉ាប៊ីសាអូឌីត កាតា តួកគី អេហ្ស៊ីប និងអង្គការសហប្រជាជាតិផងដែរ ចំពោះកិច្ចខិតខំប្រឹងប្រែងផ្នែកការទូតរបស់ពួកគេក្នុងការសម្រេចបាននូវព្រឹត្តិការណ៍ដ៏សំខាន់នេះ។

នាយករដ្ឋមន្ត្រីប៉ាគីស្ថាន លោក ស្សេបាស់ ស្សារីហ្វ បានបញ្ជាក់ថា កិច្ចព្រមព្រៀងនេះបង្ហាញពីការបញ្ចប់ជាបន្ទាន់ និងជាអចិន្ត្រៃយ៍ចំពោះប្រតិបត្តិការយោធានៅគ្រប់ទិសទី រួមទាំងប្រទេសលីបង់ផងដែរ។ ប្រទេសប៉ាគីស្ថានបានបញ្ជាក់ថា ខ្លួនបានត្រៀមខ្លួនរួចជាស្រេចដើម្បីគាំទ្រកិច្ចខិតខំប្រឹងប្រែងនាពេលអនាគតដើម្បីពង្រឹងវឌ្ឍនភាពនេះមុនពិធីចុះហត្ថលេខាជាផ្លូវការដែលគ្រោងធ្វើឡើងនៅថ្ងៃទី១៩ ខែមិថុនា ឆ្នាំ២០២៦ ខាងមុខនេះ នៅទីក្រុងហ្សឺណែវ៕

ដោយ៖ យា ចិន្ដាខន្ដី (ប្រភព៖ AA-AKP)