AKP ភ្នំពេញ ថ្ងៃទី១៥ ខែមិថុនា ឆ្នាំ២០២៦

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ ទុយ សិរីរតនៈ នេត្រ ភក្ត្រា ប្រធានកិត្តិយស សាខាសមាគមនារីកម្ពុជា ដើម្បីសន្តិភាព និងការអភិវឌ្ឍ ក្រសួងព័ត៌មាន បានអញ្ជើញជួបសំណេះសំណាលប្រកបដោយភាពស្និទ្ធស្នាល និងកក់ក្តៅជាមួយមន្ត្រីរាជការដែលជានិវត្តជននៃក្រសួងព័ត៌មាន ក្នុងបរិយាកាសពោរពេញដោយមនោសញ្ចេតនា ការគោរព និងការដឹងគុណចំពោះការលះបង់កម្លាំងកាយចិត្តរបស់ថ្នាក់ដឹកនាំ និងមន្ត្រីជំនាន់មុន ដែលបានរួមចំណែកអភិវឌ្ឍន៍វិស័យព័ត៌មាន និងបម្រើជាតិមាតុភូមិអស់រយៈពេលជាច្រើនទសវត្សរ៍កន្លងមក។

ឯកឧត្តម នេត្រ ភក្ត្រា បានមានប្រសាសន៍សម្តែងនូវការគោរព និងកោតសរសើរយ៉ាងជ្រាលជ្រៅចំពោះស្នាដៃ ការខិតខំប្រឹងប្រែង និងបទពិសោធន៍ដ៏មានតម្លៃរបស់មន្ត្រីរាជការនិវត្តជន ដែលបានចូលរួមកសាង និងអភិវឌ្ឍន៍ក្រសួងព័ត៌មានឱ្យមានការរីកចម្រើនជាបន្តបន្ទាប់ រហូតទទួលបានសមិទ្ធផលជាច្រើនដូចសព្វថ្ងៃ។ ការលើកឡើងរបស់ឯកឧត្ដមរដ្ឋមន្រ្ដីបែបនេះ ក្នុងពិធីសំណេះសំណាល និងចែកអំណោយដល់និវត្តជននៃក្រសួងព័ត៌មានចំនួន ២៥០រូប នាព្រឹកថ្ងៃទី១៥ ខែមិថុនា ឆ្នាំ២០២៦ នៅទីស្តីការក្រសួងព័ត៌មាន។

ការរៀបចំពិធីនេះឡើងក្នុងគោលបំណងផ្សាភ្ជាប់ទំនាក់ទំនងជាមួយនិវត្តជនដែលធ្លាប់បម្រើការងារជាមន្ត្រីរាជការនៅក្រសួងព័ត៌មាន, ផ្សព្វផ្សាយអំពីសេចក្តីសម្រេចចិត្តរបស់មហាសន្និបាតវិសាមញ្ញតំណាងសមាគមអតីតយុទ្ធជន កម្ពុជាទូទាំងប្រទេស ជាមួយការជំរុញ និងលើកទឹកចិត្តឱ្យចូលជាសមាជិកសមាគមអតីតយុទ្ធជន និងនិវត្តជនកម្ពុជាវិស័យព័ត៌មាន ដើម្បីទទួលបានការយកចិត្តទុកដាក់បន្ថែមពីសំណាក់ក្រសួងសាមី និងសមាគម អតីតយុទ្ធជន និងនិវត្តជនកម្ពុជា ដែលដឹកនាំដោយសម្តេចតេជោ ហ៊ុន សែន។

ក្នុងឱកាសនោះ ឯកឧត្តម នេត្រ ភក្ត្រា បានគូសបញ្ជាក់ថា មន្ត្រីរាជការនិវត្តជន គឺជាធនធានមនុស្សដ៏មានតម្លៃ និងជាសាក្សីរស់នៃប្រវត្តិសាស្ត្រការអភិវឌ្ឍរបស់ក្រសួងព័ត៌មាន។ ឯកឧត្ដមរដ្ឋមន្រ្ដីបានលើកឡើងថា បទពិសោធន៍ ចំណេះដឹង និងគុណតម្លៃនៃការបម្រើការងាររបស់អតីតមន្ត្រីរាជការ គឺជាមូលដ្ឋានសម្រាប់មន្ត្រីជំនាន់ក្រោយរៀនសូត្រ និងបន្តអភិវឌ្ឍការងារឱ្យកាន់តែមានប្រសិទ្ធភាព។ ឯកឧត្ដមរដ្ឋមន្រ្ដីបានចាត់ទុកការជួបសំណេះសំណាលនេះ បានឆ្លុះបញ្ចាំងពីការយកចិត្តទុកដាក់ខ្ពស់របស់ថ្នាក់ដឹកនាំក្រសួងព័ត៌មានចំពោះសុខទុក្ខ និងជីវភាពរស់នៅរបស់មន្ត្រីរាជការនិវត្តជន ព្រមទាំងការរក្សានូវចំណងសាមគ្គីភាព និងទំនាក់ទំនងល្អរវាងថ្នាក់ដឹកនាំ មន្ត្រីបច្ចុប្បន្ន និងមន្ត្រីជំនាន់មុន។
ជាមួយគ្នានេះដែរ កម្មវិធីនេះ មិនត្រឹមតែជាការជួបសំណេះសំណាលប៉ុណ្ណោះទេ ប៉ុន្តែថែមទាំងជាការបង្ហាញពីវប្បធម៌ដឹងគុណ ការគោរពចំពោះអ្នកមានគុណបំណាច់ និងការបន្តពង្រឹងស្មារតីសាមគ្គីភាពក្នុងគ្រួសារក្រសួងព័ត៌មាន ឱ្យកាន់តែរឹងមាំ និងស្ថិតស្ថេរតទៅមុខ។

ចំពោះអំណោយដែលត្រូវចែកជូនដល់និវត្តជនក្រសួងព័ត៌មានចំនួន ២៥០រូប ដោយក្ក្នុងម្នាក់ៗ ទទួលបាន អង្ករ ១០គីឡូ និងថវិកា ១០ម៉ឺនរៀល ជាអំណោយរបស់ ឯកឧត្តម នេត្រ ភក្ត្រា និងលោកជំទាវ ក្រុមហ៊ុន វ៉ាយ អេច អេស (ខេមបូឌា) Food and Beverages បានចូលរួមផ្តល់ជូនបន្ថែមក្នុងម្នាក់ៗ ទឹកសណ្តែក Yeo's ១២៥មីលីលីត្រ ១កេស, ទឹកសណ្តែក Yeo's ១២៥មីលីលីត្រ ១កេស, កាហ្វេ Yeo's Original ៥០០ក្រាម ១កញ្ចប់ធំ, ម្សៅស៊ុបមាន់ Yeo's ១កញ្ចប់, ប្រេងខ្យង Yeo's ១ដប និងត្រីខកំប៉ុង Yeo's ៤កំប៉ុង ។

សូមជម្រាបជូនផងដែរថា ក្រសួងព័ត៌មានបានរៀបចំពិធីសំណេះសំណាលជាមួយនិវត្តជន ដែលមានលក្ខណៈទ្រង់ទ្រាយធំជាលើកទី១នេះ ស្របតាមការអនុម័តលក្ខន្តិកៈថ្មី និងដាក់ចេញនូវផែនការយុទ្ធសាស្ត្រ ដើម្បីបន្តជួយឧបត្ថម្ភដល់អតីតយុទ្ធជន និងនិវត្តជន ដែលប្រមុខរាជរដ្ឋាភិបាលតែងតែយកចិត្តទុកដាក់ ដោយបានបង្កើតសំណាញ់សុវត្ថិភាពសង្គមប្រកបដោយចីរភាព សំដៅលើកកម្ពស់កម្រិតជីវភាពរបស់បងប្អូនអតីតយុទ្ធជន អតីតមន្ត្រីរាជការស៊ីវិល និងគ្រួសារ ឱ្យប្រកបដោយសុខដុមរមនាជាមួយក្រុមគ្រួសារ និងសហគមន៍៕

ដោយ៖ រិទ្ធី រូបថត៖ សួស សាវី