AKP បន្ទាយមានជ័យ ថ្ងៃទី៤ ខែមិថុនា ឆ្នាំ២០២៦--នៅក្នុងកិច្ចប្រជុំដ៏មានសារៈសំខាន់មួយ នៅសាលាខេត្តបន្ទាយមានជ័យ កាលពីរសៀលថ្ងៃទី៣ ខែមិថុនា ឆ្នាំ២០២៦ ម្សិលមិញនេះ ឯកឧត្តម អ៊ុំ រាត្រី អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តបន្ទាយមានជ័យ បានដាក់ចេញនូវគោលការណ៍ណែនាំ និងបទបញ្ជាម៉ឺងម៉ាត់ ក្នុងគោលបំណងលើកកម្ពស់សន្តិសុខសណ្តាប់ធ្នាប់សង្គម និងការបម្រើសេវារដ្ឋបាលសាធារណៈជូនប្រជាពលរដ្ឋឱ្យកាន់តែមានភាពល្អប្រសើរ ឆ្លើយតបទៅនឹងតម្រូវការជាក់ស្តែង។

កិច្ចប្រជុំគណៈបញ្ជាការឯកភាពរដ្ឋបាលខេត្តនេះ មានការអញ្ជើញចូលរួមពីតំណាងស្ថាប័នអយ្យការអមសាលាដំបូងខេត្ត, គណៈអភិបាលរងខេត្ត, មេបញ្ជាការកងកម្លាំងប្រដាប់អាវុធគ្រប់ជាន់ថ្នាក់ (កងរាជអាវុធហត្ថ និងនគរបាល), ប្រធានមន្ទីរ-អង្គភាពពាក់ព័ន្ធជុំវិញខេត្ត ព្រមទាំងអភិបាលក្រុង-ស្រុកទាំង៩ នៃខេត្តបន្ទាយមានជ័យ។

នៅក្នុងឱកាសនោះ ឯកឧត្តម អ៊ុំ រាត្រី បានសង្កត់ធ្ងន់ទៅលើបញ្ហាសន្តិសុខ ដែលជាគ្រឹះស្ថានដ៏សំខាន់សម្រាប់ការអភិវឌ្ឍន៍មូលដ្ឋាន។ ឯកឧត្តមបានណែនាំដល់កងកម្លាំងប្រដាប់អាវុធគ្រប់ជាន់ថ្នាក់ និងអាជ្ញាធរក្រុង-ស្រុកទាំងអស់ ត្រូវសហការគ្នាឱ្យបានស្អិតរមួតជាមួយស្ថាប័នតុលាការ ដើម្បីបង្ក្រាបរាល់បទល្មើស ជាពិសេសបញ្ហាល្បែងស៊ីសងខុសច្បាប់ ក្រុមក្មេងទំនើង និងការជួញដូរ-ប្រើប្រាស់គ្រឿងញៀននៅក្នុងសហគមន៍និងរាល់ទម្រង់នៃបទល្មើសឆបោកតាមប្រព័ន្ធអនឡាញ (Online Scams) ដែលកំពុងគំរាមកំហែងដល់ពលរដ្ឋ។ជម្រុញការអនុវត្តន៍គោលនយោបាយ «ភូមិ-ឃុំ-សង្កាត់មានសុវត្ថិភាព» ឱ្យមានប្រសិទ្ធភាពខ្ពស់ ដើម្បីផ្តល់ភាពកក់ក្តៅ និងសេចក្តីសុខសាន្តពិតប្រាកដជូនប្រជាពលរដ្ឋ។

«យើងមិនត្រូវបណ្តែតបណ្តោយឱ្យបទល្មើសផ្សេងៗ បំផ្លាញសេចក្តីសុខរបស់ប្រជាពលរដ្ឋនោះឡើយ។ កងកម្លាំង និងអាជ្ញាធរ ត្រូវតែជាបង្អែកដ៏រឹងមាំ និងមានទំនុកចិត្តបំផុតរបស់រាស្ត្រ»។ នេះជាការលើកឡើងដោយម៉ឺងម៉ាត់របស់ ឯកឧត្តមអភិបាលខេត្ត។

ក្រៅពីបញ្ហាសន្តិសុខ មុំសំខាន់មួយទៀតដែល ឯកឧត្តម អ៊ុំ រាត្រី បានលើកយកមកជម្រុញយ៉ាងស៊ីជម្រៅ គឺការកែទម្រង់ និងពង្រឹងការបម្រើសេវារដ្ឋបាលសាធារណៈ។ ឯកឧត្តមបានណែនាំដល់មន្ទីរ អង្គភាពពាក់ព័ន្ធ និងរដ្ឋបាលក្រុង-ស្រុកទាំង៩ ត្រូវតែផ្លាស់ប្តូរឥរិយាបថក្នុងការធ្វើការ ដោយឈរលើគោលការណ៍ «បម្រើរាស្ត្រឱ្យអស់ពីចិត្ត»។

ខ្លឹមសារគន្លឹះនៃប្រសាសន៍ណែនាំរួមមាន៖

លុបបំបាត់ភាពយឺតយ៉ាវ រាល់ការផ្តល់សេវាតាមរយៈរដ្ឋបាលក្រុង-ស្រុក ឬច្រកចេញចូលតែមួយ ត្រូវតែធ្វើឡើងឱ្យបានលឿន និងទាន់ពេលវេលា ស្របតាមទម្រង់ច្បាប់ដែលបានកំណត់។តម្លាភាព និងសីលធម៌ មន្ត្រីរាជការទាំងអស់ត្រូវមានលក្ខណៈសម្បត្តិ សីលធម៌វិជ្ជាជីវៈខ្ពស់ ស្វាគមន៍ប្រជាពលរដ្ឋដោយស្នាមញញឹម និងដាច់ខាតមិនត្រូវមានការទារកម្រៃក្រៅផ្លូវការឡើយ។ការដោះស្រាយបញ្ហាដល់មូលដ្ឋាន អាជ្ញាធរត្រូវចុះផ្ទាល់ដើម្បីក្តាប់សុខទុក្ខ និងដោះស្រាយរាល់កង្វល់ ឬទំនាស់ផ្សេងៗរបស់ពលរដ្ឋនៅមូលដ្ឋានឱ្យបានទាន់ពេលវេលា ដោយមិនត្រូវទុកឱ្យបញ្ហារីករាលដាលធំឡើងនោះទេ។

ជាមួយគ្នានោះ ឯកឧត្តម អ៊ុំ រាត្រី បានសម្តែងនូវការកោតសរសើរដល់កងកម្លាំង និងអាជ្ញាធរគ្រប់លំដាប់ថ្នាក់ ដែលបានខិតខំប្រឹងប្រែងនាពេលកន្លងមក។ ទន្ទឹមនឹងនោះ ឯកឧត្តមបានរំលឹកថា ទិសដៅទៅមុខ គឺតម្រូវឱ្យមានការសហការគ្នាកាន់តែខ្លាំង និងរួមសាមគ្គីគ្នាជាធ្លុងមួយ ដើម្បីប្រែក្លាយខេត្តបន្ទាយមានជ័យ ឱ្យក្លាយជាខេត្តដែលមានសន្តិសុខល្អ រដ្ឋបាលគំរូ និងការអភិវឌ្ឍប្រកបដោយចីរភាព សមស្របទៅនឹងការទុកចិត្តរបស់រាជរដ្ឋាភិបាល ក៏ដូចជាប្រជាពលរដ្ឋទូទាំងខេត្តទាំងមូលផងដែរ៕

ដោយ ឈុន សារ៉ាត