AKP តាកែវ ថ្ងៃទី0៤ ខែមិថុនា ឆ្នាំ២០២៦--ឯកឧត្តម ម៉ក់ ជីតូ រដ្ឋលេខាធិការក្រសួងមហាផ្ទៃ បានដឹកនាំកិច្ចប្រជុំត្រួតពិនិត្យ និងជំរុញការអនុវត្តន៍គោលនយោបាយ "ភូមិ-ឃុំ-សង្កាត់ មានសុវត្ថិភាព" ក្នុងស្រុកព្រៃកប្បាសខេត្តតាកែវ។ក្នុងពិធីនោះដែរ ក៏មានការអញ្ជើញចូលរួមពីលោក ស៊ុត ខុន អភិបាលរងនៃគណៈអភិបាលខេត្តតាកែវ ព្រមទាំងមានការចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ រដ្ឋបាលខេត្តតាកែវ និងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ចំណុះរដ្ឋបាលស្រុកព្រៃកប្បាស ចូលរួមជាច្រើនរូបផងដែរ។ពិធីនេះរៀបចំឡើងនៅសាលប្រជុំរដ្ឋបាលស្រុកព្រៃកប្បាសខេត្តតាកែវ កាលពីព្រឹកថ្ងៃពុធ ទី0៣ ខែមិថុនា ឆ្នាំ២០២៦។

មានប្រសាសន៍សំណេះសំណាលក្នុងពិធីនោះ ឯកឧត្តម ម៉ក់ ជីតូ រដ្ឋលេខាធិការក្រសួងមហាផ្ទៃ និងជាប្រធានក្រុមការងារត្រួតពិនិត្យ និងជំរុញការអនុវត្តគោលនយោបាយ "ភូមិ-ឃុំ-សង្កាត់ មានសុវត្ថិភាព" ប្រចាំខេត្តតាកែវ បានដាក់បទបញ្ជាយ៉ាងម៉ឺងម៉ាត់ដល់អាជ្ញាធរ និងសមត្ថកិច្ចមូលដ្ឋាន ត្រូវរួមគ្នាបង្ក្រាបក្រុមក្មេងទំនើង ឱ្យអស់ពីក្នុងភូមិសាស្ត្ររបស់ខ្លួន ដើម្បីធានាសុខសុវត្ថិភាព និងភាពសុខសាន្តជូនប្រជាពលរដ្ឋ។

ឯកឧត្តម រដ្ឋលេខាធិការក្រសួងមហាផ្ទៃ បានមានប្រសាសន៍បន្តថា ត្រូវចាត់វិធានការក្តៅនិងទាន់ពេលវេលាបំផុត ចំពោះក្រុមក្មេងទំនើង(បងតូចបងធំ) ដែលបង្កភាពអនាធិបតេយ្យនៅតាមដងផ្លូវ ទីប្រជុំជន និងទីសាធារណៈ ពោលគឺ"ងើបមួយ បង្ក្រាបមួយ ងើបដប់ បង្ក្រាបដប់" ដើម្បីលុបបំបាត់ក្រុមទាំងនេះឱ្យអស់ពីមូលដ្ឋាន។ចំពោះក្រុមក្មេងទំនើងដែលប្រដាប់ដោយអាវុធដាវ កាំបិតដេញកាប់ចាក់គ្នា បង្កអសន្តិសុខសង្គម ពេលឃាត់ខ្លួនបានត្រូវតែអនុវត្តច្បាប់ឱ្យបានតឹងរឹងបំផុត។ដោយត្រូវកសាងសំណុំរឿងបញ្ជូនទៅតុលាការជាដាច់ខាត ហើយសកម្មភាពនេះនឹងមិនមានការអន្តរាគមន៍ពីអ្នកមានអំណាចណាមួយឡើយ។

ឯកឧត្តម ម៉ក់ ជីតូ ក៏បានក្រើនរំលឹកដល់អាជ្ញាធរស្រុក-ឃុំ-ភូមិ និងកងកម្លាំងមានសមត្ថកិច្ចពាក់ព័ន្ធទាំងអស់ ត្រូវបង្កើនការយកចិត្តទុកដាក់ខ្ពស់ និងសហការគ្នាឱ្យបានជិតស្និទ្ធក្នុងការតាមដាន និងគ្រប់គ្រងសភាពការណ៍សន្តិសុខក្នុងមូលដ្ឋាន ឱ្យកាន់តែមានប្រសិទ្ធភាពទ្វេដង។

ឯកឧត្តម ម៉ក់ ជីតូ បានមានប្រសាសន៍បន្ថែមថា កិច្ចប្រជុំនេះរៀបចំឡើងដើម្បីវាយតម្លៃ លើលទ្ធផលការងារសន្តិសុខ សណ្ដាប់ធ្នាប់សាធារណៈ ដែលសម្រេចបានកន្លងមក និងដើម្បីពិភាក្សាលើបញ្ហាប្រឈម និងស្វែងរកដំណោះស្រាយនានាក្នុងមូលដ្ឋាន។បន្តពង្រឹងនិងជំរុញការចូលរួមអនុវត្តលក្ខណៈសម្បត្តិទាំង៧យ៉ាង នៃគោលនយោបាយ"ភូមិ-ឃុំ-សង្កាត់ មានសុវត្ថិភាព" ឱ្យកាន់តែមានប្រសិទ្ធភាពខ្ពស់ដើម្បីធានាបាននូវសុវត្ថិភាព និងភាពសុខសាន្ដជូនប្រជាពលរដ្ឋក្នុងស្រុកព្រៃកប្បាសទាំងមូល៕

ដោយ អ៊ុច សៀង