AKP បន្ទាយមានជ័យ ថ្ងៃទី០៤  ខែមិថុនា ឆ្នាំ២០២៦--ស្នាមញញឹមដ៏ស្រស់ស្រាយរបស់កុមារភៀសសឹកដែលកំពុងសិក្សានៅតាមសាលាបណ្តោះអាសន្ន ក្នុងឃុំស្លក្រាម ស្រុកស្វាយចេក បានក្លាយជាកម្លាំងចិត្តដ៏ធំធេងសម្រាប់ថ្នាក់ដឹកនាំខេត្ត ខណៈដែលឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ រួមជាមួយលោកជំទាវ ជ័យ ណារី អ៊ុំ រាត្រី, លោកជំទាវ នួម សុភ័ណ និងឯកឧត្តម អ៊ី ឡុង អ្នកតំណាងរាស្ត្រមណ្ឌលបន្ទាយមានជ័យ បានចុះសួរសុខទុក្ខ និងនាំយកអំណោយដ៏ថ្លៃថ្លាផ្តល់ជូនដល់កុមារទាំងនោះ ដើម្បីអបអរសាទរខួបលើកទី៧៧ ទិវាកុមារអន្តរជាតិ ១ មិថុនា កាលពីរសៀលថ្ងៃទី០៣ ខែមិថុនា ឆ្នាំ២០២៦។

ក្នុងឱកាសដ៏មានអត្ថន័យនេះ ឯកឧត្តម អ៊ុំ រាត្រី បានគូសបញ្ជាក់យ៉ាងមុតមាំពីការយកចិត្តទុកដាក់ខ្ពស់របស់ប្រមុខរាជរដ្ឋាភិបាលកម្ពុជា ក៏ដូចជាអាជ្ញាធរខេត្ត ដែលមិនដែលបោះបង់ចោលប្រជាពលរដ្ឋ ជាពិសេសគឺកុមារដែលរងផលប៉ះពាល់ដោយសារស្ថានភាពភៀសសឹក។

ឯកឧត្តម អភិបាលខេត្ត បានលើកឡើងយ៉ាងដូច្នេះថា«ទោះបីជាប្អូនៗក្មួយៗ កំពុងស្ថិតក្នុងកាលៈទេសៈលំបាក ឬជាពលរដ្ឋភៀសសឹកក៏ដោយ ក៏យើងមិនអាចឱ្យការសិក្សារបស់ក្មួយៗត្រូវអាក់ខានបានឡើយ។ រាជរដ្ឋាភិបាល និងអាជ្ញាធរគ្រប់លំដាប់ថ្នាក់ បាន និងកំពុងខិតខំប្រឹងប្រែងយ៉ាងខ្លាំងបំផុត ដើម្បីធានាថា ក្មួយៗទាំងអស់គ្នាមានសាលារៀន មានសម្ភារៈសិក្សាគ្រប់គ្រាន់ ព្រោះអនាគតរបស់ក្មួយៗ គឺជាអនាគតរបស់ជាតិយើងទាំងមូល»។

សកម្មភាពចុះជួបសំណេះសំណាលនៅសាលាបណ្តោះអាសន្នចំនួន៣ រួមមាន៖ សាលាបឋមសិក្សាជោគជ័យ, សាលាបឋមសិក្សាព្រៃចាន់ និងសាលាបឋមសិក្សាបន្ទាយមានរិទ្ធ ដែលស្ថិតក្នុងភូមិស្លក្រាម ឃុំស្លក្រាមស្រុកស្វាយចេក មិនត្រឹមតែជាការផ្តល់អំណោយជាសម្ភារៈសិក្សា នំចំណី និងការរៀបចំអាហារ (នំបញ្ចុក) ជូនដល់កុមារប៉ុណ្ណោះទេ ប៉ុន្តែវាក៏ជាសារមួយដែលបង្ហាញពី "ក្តីមេត្តាធម៌" និង "ការធានាសិទ្ធិកុមារ" ឱ្យទទួលបានការអប់រំដោយស្មើភាព ទោះស្ថិតក្នុងកាលៈទេសៈណាក៏ដោយ។

ការចុះជួបផ្ទាល់ដោយថ្នាក់ដឹកនាំខេត្ត និងតំណាងរាស្ត្រ បានឆ្លុះបញ្ចាំងយ៉ាងច្បាស់ថា សុខុមាលភាព និងអនាគតរបស់កុមារ គឺជាអាទិភាពចម្បងបំផុត។ ការផ្តល់ជូននូវក្តីសង្ឃឹម និងឱកាសសិក្សានៅក្នុងស្ថានភាពដ៏លំបាកនេះ បានបង្ហាញពីការគិតគូរវែងឆ្ងាយរបស់រាជរដ្ឋាភិបាល ក្នុងការកសាងធនធានមនុស្សសម្រាប់អនាគត ទោះបីជាពួកគេស្ថិតក្នុងស្ថានភាពជាអ្នកភៀសសឹកក៏ដោយ។

សកម្មភាពនេះ បានផ្តល់ភាពកក់ក្តៅយ៉ាងខ្លាំងដល់អាណាព្យាបាល និងកុមារភៀសសឹកទាំងអស់ ដែលបានបង្ហាញក្តីរំភើប និងថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំដែលតែងតែគិតគូរដល់ជីវភាពរស់នៅ និងអនាគតនៃការសិក្សារបស់កូនចៅពួកគេជាប្រចាំ៕

ដោយ ឈុន សារ៉ាត