AKP ភ្នំពេញ ថ្ងៃទី៤ ខែមិថុនា ឆ្នាំ ២០២៦--នៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា នាថ្ងៃទី៣ ខែមិថុនា ឆ្នាំ២០២៦ ឯកឧត្តម អ៊ុង សម្បត្តិ អគ្គលេខាធិការ នៃអគ្គលេខាធិការដ្ឋានក្រុមប្រឹក្សាសកម្មភាពជនពិការ (ក.ស.ជ.)បានអញ្ជើញដឹកនាំកិច្ចប្រជុំជាមួយថ្នាក់ដឹកនាំ និងមន្រ្តីរាជការនៃអគ្គលេខាធិការដ្ឋានក្រុមប្រឹក្សាសកម្មភាពជនពិកា ស្តីអំពីក្រមសីលធម៌មន្រ្តីរាជការ ផ្សព្វផ្សាយសេចក្តីជូនដំណឹងរបស់ក្រសួងមុខងារសាធារណៈ ស្តីពីការជំរឿនមន្រ្តីរាជការ និងផ្សព្វផ្សាយសារាចរណែនាំរបស់រាជរដ្ឋាភិបាលស្តីពីការតែងតាំងមន្រ្តីរាជការស្របតាមរចនាសម្ព័ន្ធថ្មី។

ឯកឧត្តម អ៊ុង សម្បត្តិ បានលើកឡើងថា គោលបំណងនៃកិច្ចប្រជុំ គឺដើម្បីពង្រឹងវិន័យ ក្រមសីលធម៌ និងវិជ្ជាជីវៈរបស់មន្ត្រីរាជការ ព្រមទាំងធានាឱ្យបាននូវការយល់ដឹងច្បាស់លាស់ ក្នុងការចូលរួមសហការអនុវត្តការងារជំរឿនមន្ត្រី និងការរៀបចំតែងតាំងមន្ត្រីរាជការស្របតាមរចនាសម្ព័ន្ធថ្មី របស់រាជរដ្ឋាភិបាល សំដៅលើកកម្ពស់ប្រសិទ្ធភាពការងារ និងការអភិវឌ្ឍស្ថាប័នឱ្យកាន់តែរីកចម្រើនជាលំដាប់ ។

នៅក្នុងអង្គប្រជុំ ក្រុមការងារបច្ចេកទេសបានពិភាក្សាយ៉ាងផុសផុល លើការត្រៀមលក្ខណៈបច្ចេកទេស យន្តការនៃការប្រមូលទិន្នន័យសម្រាប់ការជំរឿនមន្ត្រី ព្រមទាំងការរៀបចំរចនាសម្ព័ន្ធការងារថ្មី ដើម្បីធានាបាននូវការឆ្លើយតបទៅនឹងគោលនយោបាយ និងលិខិតបទដ្ឋានគតិយុត្តនានា ឱ្យបានទាន់ពេលវេលា និងមានភាពត្រឹមត្រូវបំផុត។

នៅក្នុងកិច្ចប្រជុំនេះ មានការអញ្ជើញចូលរួមពីសំណាក់ ឯកឧត្តមអគ្គលេខាធិការរង លោក លោកស្រីប្រធានផ្នែក អនុប្រធានផ្នែក និងមន្ត្រីរាជការទាំងអស់ នៃអគ្គលេខាធិការដ្ឋាន ក.ស.ជ. ដើម្បីទទួលស្តាប់ការណែនាំ និងរួមគ្នាអនុវត្តការងារឱ្យមានប្រសិទ្ធភាពខ្ពស់ ៕ 

ដោយ ណយ នឿន (ប្រភព៖ក្រុមប្រឹក្សាសកម្មភាពជនពិការ)