AKP ភ្នំពេញ ថ្ងៃទី៤ ខែមិថុនា ឆ្នាំ២០២៦--ក្រសួងកិច្ចការនារី កាលពីថ្ងៃទី៣ ខែមិថុនា ឆ្នាំ២០២៦ បានរៀបចំកិច្ចប្រជុំប្រចាំឆមាសរបស់ក្រុមការងារត្រួតពិនិត្យ និងតាមដានការអនុវត្តន៍ក្រមប្រតិបត្តិប្រព័ន្ធផ្សព្វផ្សាយសម្រាប់ការរាយការណ៍ព័ត៌មានអំពើហិង្សាលើស្ត្រី ដើម្បីបង្ហាញពីវឌ្ឍនភាពការងារ ព្រមទាំងដាក់ចេញនូវទិសដៅអាទិភាព និងយុទ្ធសាស្ត្រថ្មីៗក្នុងការបន្តអនុវត្តការងារឱ្យកាន់តែមានប្រសិទ្ធភាព។

កិច្ចប្រជុំនេះបានប្រព្រឹត្តទៅក្រោមការដឹកនាំរបស់លោកជំទាវ ប៊ុន ពុទ្ធី រដ្ឋលេខាធិការក្រសួងកិច្ចការនារី និងជាប្រធានក្រុមការងារត្រួតពិនិត្យ និងតាមដានការអនុវត្តន៍ក្រមប្រតិបត្តិប្រព័ន្ធផ្សព្វផ្សាយសម្រាប់ការរាយការណ៍ព័ត៌មានអំពើហិង្សាលើស្ត្រី ដោយមានការអញ្ជើញចូលរួមពី ឯកឧត្តម ស្លេះ អាល់ហ្វីន អនុរដ្ឋលេខាធិការក្រសួងព័ត៌មាន ព្រមទាំងសមាជិក សមាជិកាក្រុមការងារសរុបចំនួន ៤៥ នាក់ ក្នុងនោះមានស្រ្តីចំនួន ៣៦ នាក់។

នៅក្នុងអង្គប្រជុំ ក្រុមការងារបានផ្តោតការពិភាក្សាយ៉ាងស៊ីជម្រៅទៅលើការវាយតម្លៃលទ្ធផលការងារនាពេលកន្លងមក និងបានសម្រេចលើទិសដៅការងារសំខាន់ៗមួយចំនួន។ ជាលទ្ធផល ក្រុមការងារបានឯកភាពគ្នាថានឹងពង្រីកវិសាលភាពបន្ថែមលើការងារតាមដានការអនុវត្តក្រមប្រតិបត្តិប្រចាំថ្ងៃ ព្រមទាំងកំណត់យុទ្ធសាស្ត្រក្នុងការតាមដានឱ្យបានជាក់លាក់ និងគ្រប់ជ្រុងជ្រោយជាងមុន។

ទន្ទឹមនឹងនេះ អង្គប្រជុំក៏បានលើកឡើងពីសារៈសំខាន់ នៃការកំណត់មុខសញ្ញាស្ថាប័នសារព័ត៌មានដែលត្រូវជ្រើសរើសដើម្បីធ្វើការតាមដាន និងត្រួតពិនិត្យ ដោយតម្រូវឱ្យមានការបែងចែកច្បាស់លាស់រវាងប្រព័ន្ធផ្សព្វផ្សាយបែបប្រពៃណី និងប្រព័ន្ធផ្សព្វផ្សាយបែបអនឡាញ។

ការកំណត់យុទ្ធសាស្ត្រយ៉ាងច្បាស់លាស់នេះ គឺធ្វើឡើងដើម្បីជួយឱ្យក្រុមការងារត្រួតពិនិត្យ និងតាមដាន អាចវាយតម្លៃ និងវាស់វែងលើកម្រិតនៃការរាយការណ៍ព័ត៌មានរបស់ស្ថាប័នព័ត៌មាននីមួយៗ ឱ្យកាន់តែមានវិជ្ជាជីវៈខ្ពស់ ស្របទៅតាមបទដ្ឋាននៃក្រមប្រតិបត្តិដែលបានដាក់ចេញ ក្នុងគោលបំណងការពារកិត្តិយស សេចក្តីថ្លៃថ្នូរ និងសិទ្ធិរបស់ស្ត្រីរងគ្រោះដោយអំពើហិង្សា៕ 

ដោយ ទូច វលក័្ខណ