AKP បន្ទាយមានជ័យ ថ្ងៃទី០៣ ខែមិថុនា ឆ្នាំ២០២៦--ក្នុងពិធីប្រកាសតែងតាំងមុខតំណែងអភិបាលស្រុកថ្មីចំនួន ២រូប ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានដាក់បទបញ្ជាយ៉ាងម៉ឺងម៉ាត់ ដោយទាមទារឱ្យថ្នាក់ដឹកនាំស្រុកដែលទើបចូលកាន់តំណែងថ្មី ត្រូវរួមគ្នាធ្វើការទប់ស្កាត់ និងបោសសម្អាតបទល្មើសឆបោកតាមប្រព័ន្ធបច្ចេកវិទ្យា ឱ្យអស់ពីមូលដ្ឋាន ដើម្បីរក្សាសុវត្ថិភាពសង្គមជូនប្រជាពលរដ្ឋ។

បទបញ្ជារបស់ឯកឧត្តមអភិបាលខេត្តបានធ្វើឡើងកាលពីថ្ងៃទី០២ ខែមិថុនា ឆ្នាំ២០២៦នេះ ក្នុងឱកាសដែលឯកឧត្តមអញ្ជើញជាអធិបតីរួមជាមួយ ឯកឧត្តម ប្លែក វ៉ារី ប្រធានក្រុមប្រឹក្សាខេត្ត ដើម្បីប្រកាសតែងតាំងលោក អែម សុខាជាអភិបាលស្រុកអូរជ្រៅលោក កែវ តារារស្មី ជាអភិបាលស្រុកមង្គលបូរី។

ក្នុងឱកាសនោះ ឯកឧត្តម អ៊ុំ រាត្រី បានកោតសរសើរចំពោះកិច្ចខិតខំប្រឹងប្រែងរបស់អាជ្ញាធរគ្រប់លំដាប់ថ្នាក់ ដែលបានរួមចំណែកយ៉ាងសកម្មក្នុងការរក្សាសន្តិភាព និងការអភិវឌ្ឍ។ ទោះជាយ៉ាងណា ឯកឧត្តមបានសង្កត់ធ្ងន់ថា ក្នុងយុគសម័យឌីជីថល បទល្មើសបច្ចេកវិទ្យាគឺជាបញ្ហាប្រឈមថ្មីដ៏គ្រោះថ្នាក់ ដែលទាមទារឱ្យមេដឹកនាំមូលដ្ឋានត្រូវតែមានវិធានការដាច់ខាត។

ឯកឧត្តមបានផ្តល់អនុសាសន៍គន្លឹះដល់អភិបាលស្រុកថ្មីទាំងពីរត្រូវបន្តកម្ចាត់បទល្មើសបច្ចេកវិទ្យា ត្រូវសហការជាមួយកងកម្លាំងមានសមត្ថកិច្ច ពង្រឹងការស្រាវជ្រាវ និងបង្ក្រាបរាល់សកម្មភាពឆបោកតាមអនឡាញគ្រប់ទម្រង់ មិនឱ្យមានទីតាំងលាក់ខ្លួនក្នុងស្រុករបស់ខ្លួនឡើយ។ តម្លាភាពក្នុងការផ្តល់សេវា ក្នុងនាមជាប្រធានគណៈបញ្ជាការឯកភាពរដ្ឋបាលស្រុក ត្រូវធានាថាការផ្តល់សេវារដ្ឋបាលជូនប្រជាពលរដ្ឋ ត្រូវប្រកបដោយគណនេយ្យភាព តម្លាភាព និងភាពរហ័សទាន់ចិត្ត។ ត្រូវយកចិត្តទុកដាក់ខ្ពស់លើការអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» ជាពិសេសការឆ្លើយតបឱ្យទាន់ពេលវេលាទៅនឹងគ្រោះមហន្តរាយ និងការទប់ស្កាត់ជំងឺឆ្លងរាតត្បាតនានា។

ឯកឧត្តមអភិបាលខេត្តបានរំឭកដល់អភិបាលស្រុកថ្មីទាំងអស់ឱ្យខិតខំអនុវត្តតួនាទីភារកិច្ចរបស់ខ្លួនដោយស្មារតីទទួលខុសត្រូវខ្ពស់ ស្របតាមច្បាប់ស្តីពីការគ្រប់គ្រងរដ្ឋបាលរាជធានី-ខេត្ត ក្រុង-ស្រុក-ខណ្ឌ ដើម្បីលើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋក្នុងមូលដ្ឋានឱ្យកាន់តែមានប្រសិទ្ធភាព។ ការសម្រេចចិត្តផ្លាស់ប្តូរ និងតែងតាំងថ្នាក់ដឹកនាំស្រុកនៅពេលនេះ ត្រូវបានគេមើលឃើញថា ជាយុទ្ធសាស្ត្រមួយក្នុងការជំរុញកម្លាំងចលករថ្មី ដើម្បីពង្រឹងប្រសិទ្ធភាពការងាររដ្ឋបាល និងការរក្សាសន្តិសុខសណ្តាប់ធ្នាប់សាធារណៈនៅក្នុងខេត្តបន្ទាយមានជ័យឱ្យកាន់តែរឹងមាំ៕

ដោយ ឈុន សារ៉ាត