AKPបន្ទាយមានជ័យ ថ្ងៃទី២ ខែមិថុនា ឆ្នាំ២០២៦---

 ក្នុងបរិបទដែលកម្ពុជាកំពុងប្រកាន់យកគោលជំហរដ៏មុតស្រួចផ្អែកលើច្បាប់ អន្តរជាតិ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានដឹកនាំមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងខេត្ត ប្រកាសគាំទ្រយ៉ាងពេញទំហឹងចំពោះសេចក្តីថ្លែងការណ៍ពិសេសរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ពាក់ព័ន្ធនឹងការសម្រេចចិត្តប្រើប្រាស់ "យន្តការផ្សះផ្សាដោយបង្ខំ" ក្រោមអនុសញ្ញា UNCLOS ដើម្បីដោះស្រាយបញ្ហាដែនសមុទ្រត្រួតស៊ីគ្នាជាមួយភាគីថៃ។

អស់រយៈពេលជាង ២៥ឆ្នាំកន្លងមក អនុស្សរណៈនៃការយោគយល់គ្នា (MOU2001) បានក្លាយជា "ឆ្អឹងខ្នង" នៃទំនាក់ទំនងទ្វេភាគីកម្ពុជា-ថៃ ក្នុងការដោះស្រាយបញ្ហាតំបន់ទាមទារដែន សមុទ្រត្រួតស៊ីគ្នា។ ទោះជាយ៉ាងណា ការសម្រេចដកខ្លួនដោយឯកតោភាគីរបស់ភាគីថៃពី MOU2001 បានធ្វើឱ្យកិច្ចព្រមព្រៀងនេះបាត់បង់ប្រសិទ្ធភាព ដែលជាកត្តាបង្ខំឱ្យរាជរដ្ឋាភិបាលកម្ពុជាត្រូវស្វែងរកដំណោះស្រាយតាមផ្លូវច្បាប់អន្តរជាតិថ្មី។

ឯកឧត្តម អ៊ុ រាត្រី បានគូសបញ្ជាក់ក្នុងញត្តិគាំទ្រថា«ការសម្រេចចិត្តរបស់រាជរដ្ឋាភិបាលក្នុងការប្រើប្រាស់យន្តការផ្សះផ្សាដោយបង្ខំ ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) គឺជាផ្លូវចេញដ៏ត្រឹមត្រូវបំផុត។ នេះមិនមែនជាការប្រឈមមុខដាក់គ្នាដោយប្រើកម្លាំងនោះទេ ប៉ុន្តែគឺជាការជ្រើសរើសយកផ្លូវច្បាប់ ដើម្បីការពារផលប្រយោជន៍ជាតិដោយ សន្តិវិធី»។

ការផ្លាស់ប្តូរយុទ្ធសាស្ត្រនេះ មិនត្រឹមតែជាការការពារអធិបតេយ្យភាពដែនស មុទ្រប៉ុណ្ណោះទេ ប៉ុន្តែថែមទាំងជាការសាងគ្រឹះសម្រាប់ "ភាពជាអ្នកជិតខាងល្អ" ដែលផ្អែកលើការគោរពគ្នាទៅវិញ ទៅមក។

រដ្ឋបាលខេត្តបន្ទាយមានជ័យ បានបង្ហាញការយល់ឃើញយ៉ាងមុតមាំថា ការសម្រេចចិត្តដោយផ្អែកលើសុច្ឆន្ទៈរបស់រាជរដ្ឋាភិបាល នឹងបើកផ្លូវឱ្យប្រជាជនទាំងពីរប្រទេសអាចរស់នៅជាមួយគ្នាដោយសន្តិភាព និងសេចក្តីសុខយូរអង្វែង។

ក្នុងញត្តិគាំទ្រដែលតំណាងឱ្យសំឡេងរបស់មន្ត្រីរាជការ ព្រះសង្ឃ គ្រូបង្រៀន យុវជន និងប្រជាពលរដ្ឋទូទាំងខេត្តបន្ទាយមានជ័យ បានសង្កត់ធ្ងន់លើការប្តេជ្ញាចិត្តថាគាំទ្រយ៉ាងពេញលេញ ចំពោះរាល់វិធានការរបស់រាជរដ្ឋាភិបាលក្នុងការប្រើប្រាស់ច្បាប់អន្តរជាតិ។

ប្តេជ្ញាមិនងាករេ ក្នុងការចូលរួមចំណែកការពារសន្តិភាព និងជំរុញទំនាក់ទំនងល្អជាមួយប្រទេសជិតខាងតាមរយៈយន្តការសន្តិវិធី។

សេចក្តីប្រកាសរបស់រដ្ឋបាលខេត្តបន្ទាយមានជ័យនាពេលនេះ បានក្លាយជាកម្លាំងចលករដ៏សំខាន់មួយទៀត ដែលបង្ហាញពីភាពឯក ភាពជាតិ និងការជឿជាក់យ៉ាងមុតមាំលើការដឹកនាំរបស់សម្តេចបវរធិបតី ហ៊ុន ម៉ាណែត ក្នុងកិច្ចការពារផលប្រយោជន៍ជាតិនៅលើឆាកអន្តរជាតិ៕

ដោយ ៖ឈុនសារ៉ាត