AKP ភ្នំពេញ ថ្ងៃទី១៤ ខែឧសភា ឆ្នាំ២០២៦--ព្រះរាជអំណោយជាសៀវភៅកម្រងរូបភាពស្ដីពីព្រះរាជសកម្មភាព និងព្រះរាជសមិទ្ធផលរបស់ព្រះករុណាជាអម្ចាស់ជីវិតលើត្បូង និងសម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតបានប្រគល់ជូនក្រសួងអប់រំ យុវជន និងកីឡា ដោយសម្ដេចមហាមន្ត្រី គុយ សុផល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង នៅព្រះបរមរាជវាំង កាលពីរសៀលថ្ងៃទី១៣ ខែឧសភា ឆ្នាំ២០២៦។

ព្រះរាជអំណោយជាសៀវភៅដ៏ថ្លៃថ្លានេះ នឹងត្រូវបែងចែកបន្តសម្រាប់តម្កល់ទុកនៅក្នុងបណ្ណាល័យនៃវិទ្យាស្ថានជាតិអប់រំ វិទ្យាស្ថានគរុកោសល្យ មជ្ឈមណ្ឌលគរុកោសល្យភូមិភាគ សាលាគរុកោសល្យ និងវិក្រឹតការ សាលាមធ្យមសិក្សាគរុកោសល្យមត្តេយ្យមជ្ឈិម សរុប២៤ និងវិទ្យាល័យចំនួន៥៨១ នៅទូទាំងប្រទេសសម្រាប់លោកគ្រូ អ្នកគ្រូ គរុសិស្ស គរុនិស្សិត និងសិស្សានុសិស្ស សិក្សាស្វែងយល់ចំណេះដឹង។ 

បន្ថែមអំពីព្រះរាជកិច្ចដ៏ឧត្ដុង្គឧត្ដមរបស់ព្រះករុណាជាអម្ចាស់ជីវិតលើត្បូង និងសម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ដែលក្នុងនោះរួមមាន៖ ១.សៀវភៅកម្រងរូបភាពស្ដីពីព្រះរាជសកម្មភាព និងព្រះរាជសមិទ្ធផលរបស់ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត (ឆ្នាំ២០២៥) ចំនួន ១.២១០ច្បាប់ (សរុប ៦០៥សាលា ក្នុងមួយសាលាៗ ចំនួន ២ច្បាប់)។ ២.សៀវភៅកម្រងរូបភាពស្ដីពីព្រះរាជសកម្មភាព និងព្រះរាជសមិទ្ធផលរបស់ សម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត (ឆ្នាំ២០២៣-២០២៥) ចំនួន ៦០៥ច្បាប់ (សរុប ៦០៥សាលា ក្នុងមួយសាលាចំនួន ១ច្បាប់)។

ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ក្នុងនាមតំណាងសាលារៀន លោកគ្រូ អ្នកគ្រូ បុគ្គលិកអប់រំគ្រប់លំដាប់ថ្នាក់ ព្រមទាំងសិស្សានុសិស្សទូទាំង ២៥រាជធានី ខេត្ត បានសម្ដែងនូវអំណរព្រះរាជគុណដ៏ខ្ពង់ខ្ពស់បំផុត ថ្វាយព្រះករុណាជាអម្ចាស់ជីវិតលើត្បូង និងសម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ដែលជានិច្ចកាលតែងតែយកចិត្តទុកដាក់គាំទ្រ និងលើកកម្ពស់វិស័យអប់រំ និងសូមបួងសួងឱ្យព្រះអង្គមានព្រះរាជសុខភាពល្អបរិបូរណ៍ ព្រះកាយពលមាំមួន ព្រះជន្មាយុយឺនយូរ ដើម្បីគង់ប្រថាប់ជាម្លប់ដ៏ត្រជាក់ត្រជុំដល់ប្រជារាស្ត្រជាដរាបតរៀងទៅ៕

ដោយ ចាន់ សុភឿន (ប្រភព៖ ក្រសួងអប់រំ)