AKP កំពង់ធំ ថ្ងៃទី១៤ ខែឧសភា ឆ្នាំ២០២៦--លោកសាយ គឹមឡម អភិបាលនៃគណៈអភិបាលស្រុកស្ទោង និងសហការីព្រមទាំងកងកម្លាំងទាំង៣ប្រភេទ កាលពីរសៀលថ្ងៃទី១៣ ខែឧសភា ឆ្នាំ២០២៦បានអញ្ជើញជួបសំណេះសំណាល សួរសុខទុក្ខលើកទឹកចិត្តដល់នាយទាហាន២រូបដែលទើបតែមកពីបំពេញភារកិច្ចការពារខ្សែរបន្ទាត់ព្រំដែន ហើយកំពុងនឹងបន្តការសម្រាកព្យាបាលជំងឺនៅមន្ទីរពេទ្យបង្អែកស្ទោង។

ក្នុងឱកាសនោះលោកអភិបាលស្រុកបានកោតសរសើរដោយស្មោះអស់ពីចិត្ត ដល់នាយទាហានទាំង២រូបដែលមានឆន្ទៈមុះមុត និងបានលះបង់កម្លាំងកាយចិត្ត ពេលវេលា និងសេចក្តីសុខផ្ទាល់ខ្លួន ដើម្បីការពារបន្ទាត់ព្រំដែនក៏ដូចជាប្រជាជាតិទាំងមូល ដោយមិនខ្លាចនឿយហត់។ លោកក៏បានណែនាំដល់នាយទាហានទាំង២រូបឱ្យព្យាយាមថែរក្សាសុខភាព ស្ដាប់វេជ្ជបញ្ជានិងទទួលទានឱសថឱ្យបានទៀងទាត់តាមការកំណត់ ដើម្បីឆាប់បានជាសះស្បើយពីជំងឺនិងបន្តភារកិច្ចការពារបូរណភាពទឹកដីបន្តទៀត។

លោក សាយ គឹមឡមបានសម្ដែងនូវការដឹងគុណយ៉ាងក្រៃលែងដល់វីរកងទ័ពទាំងអស់ ដែលបានបំពេញបេសកកម្មយ៉ាងសំខាន់ក្នុងបុព្វហេតុការពារបូរណភាពទឹកដី ការពារជាតិមាតុភូមិនិងប្រជាជនកម្ពុជានិងបានថ្លែងអំណរគុណដល់ក្រុមគ្រូពេទ្យទាំងអស់នៃមន្ទីរពេទ្យបង្អែកស្ទោងដែលបានចូលរួមយ៉ាងសស្រាក់សស្រាំក្នុងនាមជាសមរភូមិជួរក្រោយផ្ដល់ការមើលថែយ៉ាងយកចិត្តទុកដាក់ជូនដល់វីរកងទ័ពរបស់យើង ដោយមិនមានបង់ប្រាក់ឬសេវាកម្មអ្វីឡើយ។

គូរបញ្ជាក់ផងដែរថា នាយទាហានទាំង២រូបពោលគឺលោកអនុសេនីយ៍ត្រី ទិត្យ ទិន ដែលឈរជើងនៅវរៈសេនាតូច៣៧៤នៃកងពលតូចលេខ៧(ភ្នំខ្មោច)និងលោកអនុសេនីយ៍ត្រី ហ៊ន ចន្ទី នៅផ្នែកសឹករងស្ទោងឈរជើងនៅទិសអានសេះ។ក្នុងឱកាសនោះលោកអភិបាលស្រុកបានផ្ដល់ជូននូវអំណោយម្នាក់ៗទទួលបានអង្ករ១បេ មី១កេស ទឹកបរិសុទ្ធ២កេស ត្រីខ១យួរ ទឹកស៊ីអ៊ីវ១យួរ និងថវិកាចំនួន១០ម៉ឺនរៀល៕

ដោយ ស៊ុម វណ្ណា