AKP កំពង់ធំ ថ្ងៃទី១៤ ខែឧសភា ឆ្នាំ២០២៦--មន្ទីរកិច្ចការនារីខេត្តកំពង់ធំសហការជាមួយគម្រោងQSA អាជ្ញាធរស្រុក និងឃុំ/ភូមិបានរៀបចំបើកវគ្គអប់រំផ្សព្វផ្សាយស្តីពីសិទ្ធិស្ត្រី សិទ្ធិកុមារ និងការបញ្រ្ជាបយេនឌ័រ ការបង្កើនភាពអង់អាចផ្នែកសេដ្ឋកិច្ចដល់ស្ត្រីនៅឃុំមានរិទ្ធនិងឃុំក្លែង ស្រុកសណ្តាន់ ខេត្តកំពង់ធំ ក្រោមអធិបតីភាពលោកស្រី ស៊ិន ស៊ីផាន ប្រធានមន្ទីរកិច្ចការនារីខេត្ត លោកស្រី ឡាក់ សៅចាន់ អភិបាលរង នៃគណៈអភិបាលស្រុកនិងមានការចូលរួមពីមន្ត្រីមន្ទីរកិច្ចការនារីខេត្ត មេឃុំ មេប៉ុស្តិ៍ សមាជិកក្រុមប្រឹក្សាឃុំ មេភូមិ និងប្រជាពលរដ្ឋជាង២០០នាក់។

វគ្គអប់រំផ្សព្វផ្សាយនេះពេលព្រឹកនៅសាលាឃុំមានរិទ្ធមានអ្នកចូលរួមចំនួន១០០នាក់(ស្រី៨៥នាក់)និងពេលរសៀលនៅវត្តរកាជួរឃុំក្លែងមានអ្នកចូលរួមចំនួន១០២នាក់ (ស្រី៧២នាក់)។លោកស្រី ស៊ិន ស៊ីផាន ប្រធានមន្ទីរកិច្ចការនារីខេត្ត បានស្វាគមន៍និងថ្លែងអំណរគុណដល់អ្នកចូលរួមទាំងអស់ដោយបានលើកឡើងពីអត្ថន័យនៃសិទ្ធិស្ត្រីសិទ្ធិកុមារនិងសារៈប្រយោជន៍នៃការបញ្រ្ជាបយេនឌ័រនិងការបង្កើនភាពអង់អាចផ្នែកសេដ្ឋកិច្ចដល់ស្រ្តីដែលជាចំណុចរសើបមួយក្នុងការអភិវឌ្ឍសេដ្ឋកិច្ចក្នុងគ្រួសារនិងសហគមន៍ព្រោះកុមារគឺជាទំពាំងដែលនឹងក្លាយខ្លួនជាឬស្សី ដូច្នេះប្រសិនបើទំពាំងដែលជាកុមារនោះមិនលូតលាស់បានល្អ គ្រួសារ សហគមន៍ និងសង្គមជាតិមិនមានការអភិវឌ្ឍន៍។ចំណែកគ្រួសារវិញបើមានអ្នករកចំណូលតែម្ខាងដោយមិនមានការរួមចំណែកពីស្ត្រីនោះតើអាចធ្វើឱ្យជីវភាពគ្រួសារធូរធារដែរឬទេ?។ ហេតុដូច្នេះហើយទើបស្រ្តី និងកុមារមានតួនាទីសំខាន់ក្នុងការចូលរួមអភិវឌ្ឍសង្គមគ្រួសារ និងសហសគមន៍ក៏ដូចជាការចូលរួមចំណែកនៅក្នុងការអភិវឌ្ឍន៍ និងធ្វើឱ្យមានស្ថេរភាព សន្តិសុខកាន់តែប្រសើឡើងនៅក្នុងសង្គមជាតិទាំងមូលផងដែរ។

លោកស្រីប្រធានបានលើកទឹកចិត្តឱ្យស្រ្តីគ្រប់រូបត្រូវតាមដានសុខភាពរបស់ខ្លួន។ស្រ្តីមានផ្ទៃពោះទាំងអស់ត្រូវទៅពិនិត្យផ្ទៃពោះឱ្យបានទៀងទាត់តាមការណាត់ជួបរបស់ពេទ្យជំនាញនិងត្រូវទៅសម្រាលកូនជាមួយពេទ្យជំនាញក្នុងគោលបំណងដើម្បីការពារសុវត្ថិភាពម្តាយនិងកូនឱ្យមានសុខភាពល្អមុនសម្រាល ក្នុងន័យដើម្បីកាត់បន្ថយអត្រាស្លាប់របស់កូននិងម្តាយជុំវិញសម្រាល។មួយវិញទៀតក៏សូមថែរក្សាសុខភាពផ្លូវកាយនិងផ្លូវចិត្តឱ្យបានល្អ ព្រមទាំងត្រូវមានអនាម័យល្អក្នុងការរស់នៅប្រចាំថ្ងៃ។សូមអាណាព្យាបាលគ្រប់រូបថែទាំនិងគ្រប់គ្រងកូនចៅឱ្យបានល្អជាពិសេសកូនស្រីកុំឱ្យមានបញ្ហាអ្វីកើតឡើងពីព្រោះនាពេលបច្ចុប្បន្ននេះរាជរដ្ឋាភិបាលបានយកចិត្តទុកដាក់ក្នុងការលើកកម្ពស់ស្រ្តីនិងក្មេងស្រីឱ្យទទួលបានឱកាសស្មើគ្នាក្នុងការទទួលបានការការពារ និងផលប្រយោជន៍នានា៕

ដោយ ស៊ុម វណ្ណា