AKP ភ្នំពេញ ថ្ងៃទី១២ ខែឧសភា ឆ្នាំ២០២៦-- ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានមានប្រសាសន៍ថា «មន្រ្តីសុខាភិបាល ត្រូវផ្តល់ឥរិយាបថល្អ ដល់ប្រជាពលរដ្ឋយើង និងបន្តពង្រឹងសមត្ថភាព គុណភាពនៃការបម្រើសេវាឱ្យកាន់តែប្រសើរឡើង» ក្នុងឱកាសដែលឯកឧត្តមអញ្ជើញដឹកនាំកិច្ចប្រជុំកម្រិតថ្នាក់ដឹកនាំ លើកទី១ ប្រចាំខែឧសភា ដើម្បីពិនិត្យវឌ្ឍនភាពការងារ និងលើកទិសដៅបន្ត នារសៀលថ្ងៃទី១១ ខែឧសភា ឆ្នាំ២០២៦ នៅទីស្ដីការក្រសួង ដោយមានការអញ្ជើញចូលរួមពីថ្នាក់ដឹកនាំក្រសួង និងអង្គភាពថ្នាក់កណ្តាល មន្ទីរសុខាភិបាលរាជធានីភ្នំពេញ និងតាមប្រព័ន្ធ Zoom ប្រធានមន្ទីរសុខាភិបាលខេត្ត។

ក្នុងឱកាសនោះ ឯកឧត្តមសាស្រ្តាចារ្យរដ្ឋមន្រ្តីបានរំលឹកអំពីការបន្តការយកចិត្តទុកដាក់ក្នុងការបំពេញការងារ ពិសេសបន្តពង្រឹងបន្ថែមនូវការបម្រើសេវាសុខាភិបាល នៅតាមអង្គភាព និងមូលដ្ឋានសុខាភិបាលទាំងអស់ ឱ្យកាន់តែមានប្រសិទ្ធភាពជាងនេះ។ ឯកឧត្តមសាស្រ្តាចារ្យរដ្ឋមន្រ្តីបានបញ្ជាក់ថា រាល់កិច្ចការងារទាំងផ្នែករដ្ឋបាល និងខាងបច្ចេកទេស ត្រូវតែមានភាពរហ័ស ត្រឹមត្រូវ និងទាន់ពេលវេលា។ ថ្នាក់ដឹកនាំគ្រប់កម្រិតត្រូវរៀបចំផែនការ និងគិតអំពីបញ្ហាស្មុគស្មាញដែលអាចកើតមាន នឹងរិះរកវិធីសាស្រ្តដើម្បីដោះស្រាយឱ្យបានមុនពេលដែលកើតមានឡើង។

បន្ថែមពីនេះ ឯកឧត្តមសាស្រ្តាចារ្យ បានគូសរំលេចនូវបញ្ហាមួយចំនួនដែលត្រូវគិតគូរ សម្រាប់ស្ថានភាពក្នុងពេលបច្ចុប្បន្ន និងពេលខាងមុខ រួមមាន៖ បញ្ហាវីរុសឆ្លង ដូចជា Hantavirus និងវីរុសផ្សេងទៀត ត្រូវបន្តយកចិត្តទុកដាក់ឱ្យបានខ្ពស់ តាមដាន និងត្រៀមខ្លួនឱ្យបានរួចជាស្រេចដើម្បីឆ្លើយតបឱ្យបានទាន់ពេលវេលា។ សូមឱ្យមន្រ្តីបច្ចេកទេសពាក់ព័ន្ធ រៀបចំសហការជាមួយអាជ្ញាធរមូលដ្ឋានក្នុងការកំចាត់មូស ដើម្បីការពារសុខភាពប្រជាពលរដ្ឋ នៅក្នុងរដូវវស្សានាពេលខាងមុខនេះ។ សូមឱ្យមន្រ្តីបច្ចេកទេស រៀបចំសារអប់រំសុខភាពបន្ថែមទៀត ឱ្យឆ្លុះបញ្ចាំងនូវបរិបទបច្ចុប្បន្ន។ ថ្នាក់ដឹកនាំ និងមន្រ្តីរាជការទាំងអស់ គួរចាប់យកបច្ចេកវិទ្យាសម័យថ្មី ដូចជាបច្ចេកវិទ្យា AI ជាដើម ដើម្បីជំនួយដល់ការងាររបស់ខ្លួន ឱ្យបានត្រឹមត្រូវ និងមានប្រសិទ្ធភាព។

ក្នុងឱកាសនោះ ឯកឧត្តមសាស្រ្តាចារ្យក៏បានផ្តល់នូវគោលជំហរ និងអនុសាសន៍មួយចំនួន ជូនដល់ថ្នាក់ដឹកនាំ និងអ្នកពាក់ព័ន្ធទាំងអស់ ដើម្បីការត្រៀមខ្លួនក្នុងការចូលរួមសន្និបាតសុខភាពពិភពលោក លើកទី៧៩៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)