AKP ភ្នំពេញ ថ្ងៃទី១២ ខែឧសភា ឆ្នាំ២០២៦ -- អ្នកដំណើរដែលត្រូវបានជម្លៀសចេញពីនាវាទេសចរណ៍ MV Hondius ដែលបានជួបប្រទះនឹងការផ្ទុះឡើងនៃវីរុសហាន់តា ត្រូវបានណែនាំឱ្យធ្វើចត្តាឡីស័ករយៈពេល៤២ថ្ងៃ។ នេះបើយោងតាមលោក ធេដ្រូស អាដហាណូម ហ្គេប្រេយ៉េស៊ុស (Tedros Adhanom Ghebreyesus) អគ្គនាយកអង្គការសុខភាពពិភពលោក(WHO)។

មន្ត្រីរូបនេះបាននិយាយនៅក្នុងសន្និសីទសារព័ត៌មានមួយបន្ទាប់ពីថ្ងៃដំបូងនៃការជម្លៀសអ្នកដំណើរចេញពីនាវាទេសចរណ៍ MV Hondius ដែលចតនៅកោះ Canary ថា «ដំបូន្មានរបស់យើង គឺច្បាស់លាស់ ដោយចាប់ផ្តើមពីថ្ងៃទី១០ ខែឧសភា រយៈពេល ៤២ថ្ងៃ (នៃការធ្វើចត្តាឡីស័ក) ជាមួយនឹងការតាមដានយ៉ាងសកម្ម»។

លោក ហ្គេប្រេយ៉េស៊ុស បានកត់សម្គាល់ថា អង្គការ WHO ផ្តល់ការណែនាំ ប៉ុន្តែមិនដាក់ចេញនូវអនុសាសន៍របស់ខ្លួនទៅលើប្រទេសជាសមាជិកនោះទេ។

នាវាទេសចរណ៍ដែលមានអ្នកដំណើរប្រហែល ១៥០នាក់ ភាគច្រើនជាជនជាតិអាម៉េរិក អង់គ្លេស អេស្ប៉ាញ និងហូឡង់ បានចេញដំណើរពីទីក្រុងUshuaia របស់ប្រទេសអាហ្សង់ទីនកាលពីបីសប្តាហ៍មុន ហើយកំពុងធ្វើដំណើរទៅកាន់កោះ Canary។ នាវានេះបានឈប់សម្រាកជាច្រើនកន្លែងនៅជិតកោះនានាក្នុងមហាសមុទ្រអាត្លង់ទិក។

វីរុសហាន់តា គឺជាក្រុមគ្រួសារវីរុសដែលអាចបង្កឱ្យមានជំងឺធ្ងន់ធ្ងរ ឬអាចបណ្តាលឱ្យស្លាប់បាន ដូចជារោគសញ្ញាសួត (HPS) និងគ្រុនក្តៅហូរឈាមដែលមានរោគសញ្ញាតម្រងនោម (HFRS)។ មនុស្សអាចឆ្លងវីរុសហាន់តាបានពីការប៉ះពាល់ជាមួយសត្វកកេរ ជាពិសេសនៅពេលដែលប៉ះពាល់នឹងទឹកនោម លាមក និងទឹកមាត់របស់វា៕

ដោយ៖ យា ចិន្ដាខន្ដី (ប្រភព៖ តាសស៍)