AKP ភ្នំពេញ ថ្ងៃទី១២ ខែឧសភា ឆ្នាំ២០២៦ -- នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយនៅក្នុងបទសម្ភាសន៍មួយជាមួយសារព័ត៌មាន CBS News ថា អ៊ីស្រាអែលនឹងមិនយល់ព្រមបញ្ឈប់អរិភាពប្រឆាំងនឹងកងជីវពលហេសបូឡោះ ដែលជានិកាយស៊ីអ៊ីតនៅលីបង់ ដើម្បីបញ្ចប់សង្គ្រាមរវាងសហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់នោះទេ។

នៅពេលសួរថា តើអ៊ីស្រាអែលនឹងយល់ព្រមបញ្ឈប់អរិភាពប្រឆាំងនឹងក្រុមហេសបូឡោះ ដែលជាផ្នែកមួយនៃកិច្ចព្រមព្រៀងសន្តិភាពជាមួយអ៊ីរ៉ង់ដែរឬទេ? លោក ណេតាន់យ៉ាហ៊ូ បានឆ្លើយថា «ទេ»។ ទោះជាយ៉ាងណាក៏ដោយ លោកបានគេចវេសពីសំណួរដែលបានសួរថា តើអ៊ីស្រាអែលនឹងយល់ព្រមបញ្ឈប់ការប្រយុទ្ធប្រឆាំងនឹងក្រុមហេសបូឡោះដែរឬទេប្រសិនបើប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ទាមទារឱ្យបញ្ឈប់។

ក្នុងពេលជាមួយគ្នានេះ នាយករដ្ឋមន្ត្រីអ៊ីស្រាអែលបានបង្ហាញពីជំនឿរបស់លោកថា ប្រសិនបើអ៊ីរ៉ង់ចុះខ្សោយគួរឱ្យកត់សម្គាល់ ឬឆ្លងកាត់ការផ្លាស់ប្តូរអំណាចយ៉ាងខ្លាំង នោះវានឹងមានន័យថា ជាការដួលរលំនៃក្រុមហេសបូឡោះ ក្រុមហាម៉ាស់ និងក្រុមឧទ្ទាមហ៊ូធីយេម៉ែនមកពីចលនាអាន់សារ អាឡោះ៕

ដោយ៖ យា ចិន្ដាខន្ដី (ប្រភព៖ តាសស៍)