AKP ឧត្តរមានជ័យ ថ្ងៃទី០៧ ខែឧសភា ឆ្នាំ២០២៦-- លោកស្រី ហេង សុជាតិ អភិបាលរងក្រុងសំរោង បានអញ្ជើញចូលរួមក្នុងកម្មវិធីជួបសំណេះសំណាលជាមួយអាណាព្យាបាលសិស្ស នៅសាលាបឋមសិក្សាសំរោង កាលពីថ្ងៃពុធ ទី០៦ ខែឧសភា ឆ្នាំ២០២៦ ដោយមានការអញ្ជើញចូលរួមពីប្រធានការិយាល័យអប់រំ យុវជន និងកីឡាក្រុង នាយកសាលា លោកគ្រូ អ្នកគ្រូ និងបងប្អូនអាណាព្យាបាលសិស្សយ៉ាងច្រើនកុះករ។

លោកស្រី ហេង សុជាតិ មានប្រសាសន៍ថា ការអប់រំគឺជាគ្រឹះនៃអនាគត ហើយការចូលរួមពីអាណាព្យាបាលគឺជាកម្លាំងចលករដ៏សំខាន់ ដើម្បីពង្រឹងកិច្ចសហការរវាងសាលារៀន និងអាណាព្យាបាល ក្នុងការតាមដានការសិក្សា និងការអប់រំសីលធម៌ដល់ក្មួយៗសិស្សានុសិស្សឱ្យកាន់តែប្រសើរឡើង។ លោកស្រីក៏បានពាំនាំនូវការសួរសុខទុក្ខពីសំណាក់ថ្នាក់ដឹកនាំខេត្ត លោកអភិបាលក្រុង និងបានលើកទឹកចិត្តឱ្យអាណាព្យាបាលបន្តជំរុញកូនចៅឱ្យមកសាលារៀនបានទៀងទាត់ ដើម្បីក្លាយជាសសរទ្រូងដ៏រឹងមាំសម្រាប់ខេត្ត និងក្រុងសំរោងយើងនាពេលអនាគត។

រដ្ឋបាលក្រុងសំរោងតែងតែផ្ដល់អាទិភាពខ្ពស់លើវិស័យអប់រំ និងការកសាងបរិស្ថានសិក្សាប្រកបដោយផាសុកភាពសម្រាប់ក្មួយៗជំនាន់ក្រោយ។ ក្នុងឱកាសដ៏វិសេសវិសាលនោះ លោកស្រីអភិបាលរងក្រុង បានចូលរួមឧបត្ថម្ភថវិកាផ្ទាល់ខ្លួនចំនួន១០០,០០០ រៀល ជូនដល់សាលារៀន ដើម្បីចាក់ដីបំពេញទីធ្លាសាលា សម្រួលដល់ការធ្វើដំណើរ និងការលេងកម្សាន្តរបស់កុមារឱ្យមានសុវត្ថិភាព និងសោភ័ណភាព៕

ដោយ ទិត ស្រ៊