AKP កំពង់ចាម ថ្ងៃទី០៧ ខែឧសភា ឆ្នាំ២០២៦ -- ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈបញ្ជាការឯកភាពខេត្តបានធ្វើការណែនាំ និងជំរុញដល់អាជ្ញាធរគ្រប់លំដាប់នៅតាមមូលដ្ឋាន និងមន្រ្តីទាំងអស់ ត្រូវបន្តពង្រឹងសន្តិសុខសណ្ដាប់ធ្នាប់សង្គមឱ្យកាន់តែមានប្រសិទ្ធភាពខ្ពស់ ដើម្បីរក្សាបាននូវស្ថិរភាពជាតិ និងយកចិត្តទុកដាក់រក្សាសន្តិសុខសណ្ដាប់ធ្នាប់សង្គម ដោយបន្តអនុវត្តគោលនយោបាយភូមិ ឃុំ មានសុវត្ថិភាព រួមមានការបង្ក្រាបបទល្មើសផ្សេងៗ ដូចជាចោរឆក់ ចោរប្លន់ ការជួញដូរគ្រឿងញៀន ក្មេងទំនើង ជាពិសេសបង្ក្រាបឱ្យបាននូវអំពើឆបោកតាមអនឡាញ Scam Online ឆ្លើយតបទៅនឹងបញ្ហាប្រឈមថ្មីៗក្នុងមូលដ្ឋាន។

ឯកឧត្តមអភិបាលខេត្តកំពង់ចាម បាមលើកឡើងដូចនេះនៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត  នៅព្រឹកថ្ងៃទី០៧ ខែឧសភា ឆ្នាំ២០២៦ នេះ ដោយមានការចូលរួមពីអភិបាលរងខេត្ត កងកម្លាំងទាំងបី លោក លោកស្រីជាប្រធាន អនុប្រធានមន្ទីរអង្គភាពជុំវិញខេត្ តនិងអស់លោកលោកស្រីជាអភិបាលក្រុងស្រុកទាំងអស់របស់ខេត្ត។

ឯកឧត្តម អ៊ុន ចាន់ដា បានបញ្ជាក់ថា ដើម្បីពង្រឹងការងារសន្តិសុខសណ្តាប់ធ្នាប់សាធារណៈសុវត្ថិភាពសង្គមក្នុងមូលដ្ឋានប្រកបដោយប្រសិទ្ធភាពនោះ អាជ្ញាធរក្រុង-ស្រុក និងសមត្ថកិច្ចជំនាញ ត្រូវបន្តយកចិត្តទុកដាក់ខ្ពស់លើការអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» ឱ្យមានប្រសិទ្ធភាពខ្ពស់បំផុត។ ឯកឧត្តមអភិបាលខេត្តក៏បានសង្កត់ធ្ងន់ថា អាជ្ញាធរមូលដ្ឋានគ្រប់លំដាប់ថ្នាក់ ត្រូវយកចិត្តទុកដាក់ឲ្យខ្លាំងបំផុត និង អនុវត្តយ៉ាងម៉ឺងម៉ាត់បលើបញ្ហាប្រឈមចំនួន២ ធំៗ ដែលកំពុងប៉ះពាល់ដល់សណ្តាប់ធ្នាប់សង្គមរួមមាន គឺទី១. បញ្ហាក្មេងទំនើង ត្រូវបង្ក្រាបឱ្យបាន និងមានប្រសិទ្ធភាពបំផុត ដោយកម្លាំងនគរបាល និងកងរាជអាវុធហត្ថត្រូវអនុវត្តវិធានការជំនាញ បង្ក្រាបរាល់សកម្មភាពក្មេងទំនើងដែលបង្កការអុកឡុក បង្កជម្លោះ ឬជិះម៉ូតូបង្ហោះបង្កគ្រោះថ្នាក់តាមដងផ្លូវសាធារណៈ ដោយមិនត្រូវមានការយោគយល់ឡើយ។

អាជ្ញាធរក្រុង-ស្រុក សហការជាមួយសាលារៀន និងអាណាព្យាបាល ដើម្បីតាមដានសកម្មភាពសិស្សានុសិស្ស និងយុវជនដែលបោះបង់ការសិក្សា ជៀសវាងការចាញ់បោកការអូសទាញចូលក្នុងបក្ខពួកក្មេងទំនើង។ បញ្ហាទី២. ការតាមដាន និងបង្ក្រាបបទល្មើស Scam Online ដោយបញ្ជាឱ្យកងកម្លាំងជំនាញ និងអាជ្ញាធរមូលដ្ឋាន ត្រូវតាមដានឱ្យបានដិតដល់នូវរាល់សកម្មភាពជនបរទេស ឬក្រុមជនសង្ស័យដែលជួលទីតាំងក្នុងខេត្ត ដើម្បីរៀបចំបណ្តាញបោកប្រាស់តាមប្រព័ន្ធទូរស័ព្ទ ឬអ៊ីនធឺណិត។

ឯកឧត្តម អ៊ុន ចាន់ដា ក៏បានធ្វើការណែនាំ និងជំរុញឱ្យសមត្ថកិច្ចពាក់ព័ន្ធចុះផ្សព្វផ្សាយដល់ប្រជាពលរដ្ឋឱ្យមានការប្រុងប្រយ័ត្នខ្ពស់ចំពោះល្បិចបោកប្រាស់តាមទូរស័ព្ទ និងបណ្តាញសង្គម ដើម្បីការពារទ្រព្យសម្បត្តិ និងសុវត្ថិភាពផ្ទាល់ខ្លួន ពិសេសអប់រំផ្សព្វផ្សាយដល់សាធារណជនចិត្តទុកដាក់ខ្ពស់លើការអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» ឱ្យមានប្រសិទ្ធភាពខ្ពស់បំផុត ព្រោះវាជាមូលដ្ឋានគ្រឹះដែលធានាបានការរស់នៅរបស់ប្រជាពលរដ្ឋប្រកបដោយសុខដុមរមនានិងសុវត្ថិភាព៕

ដោយ៖ ឆាយ ម៉ុត