AKP កំពង់ធំ ថ្ងៃទី០៥ ខែឧសភា ឆ្នាំ២០២៦--អង្គការក្រាមវ័លវ៉ាយ(CRAM Wordwide)ដឹកនាំដោយលោក ស្ទីវផាន់ ចនសាន់ លោក ស៊ី វ៉ាយគីម លោក អេដ្រេង ស្តុត និងលោក មាស ថាវី និងសហការីបានអញ្ជើញចូលរួមក្នុងពិធីកាត់ខ្សែបូរសម្ពោធដាក់ឱ្យដំណើរការព្រះវិហារពួកក្រុមជំនុំព្រះគ្រីស្ទនីពេជ(ក) ស្ថិតនៅភូមិនីពេជ(ក) ស្រុកកំពង់ស្វាយ ខេត្តកំពង់ធំ នាព្រឹកថ្ងៃទី០៥ ខែឧសភា ឆ្នាំ២០២៦ ដោយមានការអញ្ជើញចូលរួមពីលោក ចន ស៊ុងយ៊ុង គ្រូគង្វាលនៅព្រះវិហារសេផានាស្រយ៉ូវ លោក យ៉ូន លីយុន និងលោកស្រី លន់ សុភាព គ្រូគង្វាលនៅព្រះវិហារពួកក្រុមជំនុំព្រះគ្រីស្ទនីពេពេជ(ក) ក្រុមជំនុំផ្សេងៗទៀត លោកគ្រូអ្នកគ្រូ ប្រជាពលរដ្ឋ និងសិស្សានុសិស្សប្រមាណជាង៧០០នាក់។

លោក យ៉ូន លីយុន គ្រូគង្វាលនៅព្រះវិហារក្រុមជំនុំព្រះគ្រីស្ទនីពេជ(ក) បានលើកឡើងពីគោលបំណងនៃការកសាងព្រះវិហារនេះ ដើម្បីអធិដ្ឋានព្រះវិហារជាទីកន្លែងដែលអ្នកជំនឿគ្រឹសសាសនាចូលមកអធិដ្ឋាន ស្តាប់ព្រះបន្ទូល។ ជាមជ្ឈមណ្ឌលសម្រាប់បង្រៀនអំពីព្រះបន្ទូល និងផ្សព្វផ្សាយសារៈសំខាន់នៃជំនឿគ្រឹសសាសនា ដល់សមាជិកនិងសាធារណៈ។ បង្កើតសហគមន៍អ្នកជំនឿព្រះវិហារជួយភ្ជាប់មនុស្សដែលមានជំនឿដូចគ្នា ឱ្យមានការរួបរួម សហការនិងគាំទ្រគ្នាទៅវិញទៅមក។ ការអប់រំ និងណែនាំផ្លូវវិញ្ញាណមានកម្មវិធីបង្រៀន សិក្សាព្រះគម្ពីរ និងណែនាំអំពីវិធីរស់នៅតាមគន្លងរបស់ព្រះ។សកម្មភាពសប្បុរសធម៌ និងសង្គមព្រះវិហារចូលរួមជួយសង្គមដូចជា ជួយអ្នកក្រីក្រ អ្នកខ្វះខាត ឬរៀបចំសកម្មភាពសប្បុរសធម៌ផ្សេងៗ។

លោក ស្ទីវផាន់ ចនសាន់ បានថ្លែងថា ព្រះវិហារដែលបានកសាងមកនេះគឺបានដោយសារការចូលរួមរបស់ក្រុមជំនុំនៅសហរដ្ឋអាមេរិក និងប្រទេសដទៃទៀត ដើម្បីយកមកកសាងជាសមិទ្ធផលមួយនេះ។ សូមឱ្យគ្រូគង្វាល និងក្រុមជំនុំទាំងអស់ចូលរួម មកអធិដ្ឋានជារៀងរាល់ថ្ងៃអាទិត្យឱ្យបានគ្រប់ៗគ្នាក្នុងការលើកតម្កើនដល់ព្រះយេស៊ូគ្រីស្ទ និងជួយតម្រង់ផ្លូវដល់បងប្អូនដែលមានជំនឿទៅលើព្រះយេស៊ូ ឱ្យមានសុខភាពល្អ និងអាយុវែងផងដែរ។

លោក ស្ទីវផាន់ ចនសាន់ អំពាវនាវដល់គ្រូបង្វាលនិងក្រុមជំនុំដោយសេចក្ដីគោរព និងសេចក្ដីស្រឡាញ់ឱ្យគ្រូបង្វាល និងក្រុមជំនុំទាំងអស់ ចូលរួមក្នុងការអធិដ្ឋានជាមួយគ្នា។ នៅពេលនេះយើងត្រូវការកម្លាំងវិញ្ញាណ និងការណែនាំពីព្រះជាម្ចាស់យ៉ាងខ្លាំង។ ចូលរួមអធិដ្ឋានសម្រាប់ សន្តិភាព និងសេចក្ដីសុខក្នុងសហគមន៍ កម្លាំង និងប្រាជ្ញាសម្រាប់ថ្នាក់ដឹកនាំ ការពារ និងការអភ័យទោសសម្រាប់ប្រជាជន ការរីកចម្រើននៃសេចក្ដីជំនឿក្នុងក្រុមជំនុំ។ សូមឱ្យយើងរួបរួមចិត្តជាមួយគ្នា ក្នុងការស្វែងរកព្រះភក្ត្រព្រះជាម្ចាស់ និងទុកចិត្តលើការដឹកនាំរបស់ព្រះអង្គ សូមព្រះអម្ចាស់ប្រទានពរដល់អ្នកទាំងអស់គ្នា។

សូមបញ្ជាក់ផងដែរថា ព្រះវិហារពួកក្រុមជំនុំព្រះគ្រីស្ទនីពេជ(ក) ក្នុងស្រុកកំពង់ស្វាយ ដែលកាត់ខ្សែបូរសម្ពោធដាក់ឱ្យប្រើប្រាស់នាពេលនេះមានទំហំ១០០ម៉ែត្រគុណ៣៣ម៉ែត្រកម្ពស់៤ម៉ែត្រ ដែលជាអំណោយរបស់អង្គការក្រាម វ័លវ៉ាយ(CRAM Wordwide)៕

ដោយ ស៊ុម វណ្ណា