AKP បន្ទាយមានជ័យ ថ្ងៃទី០៥ ខែឧសភា ឆ្នាំ២០២៦--ក្នុងស្មារតីសង្គ្រោះបន្ទាន់ និងមិនទុកឱ្យពលរដ្ឋណាម្នាក់រងគ្រោះដោយឯកោនោះ នាព្រឹកថ្ងៃទី០៥ ខែឧសភា ឆ្នាំ២០២៦នេះ ឯកឧត្តម អ៊ុ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ បានដឹកនាំក្រុមការងារ ចុះជួបសំណេះសំណាល និងនាំយកអំណោយមនុស្សធម៌ទៅចែកជូនដល់គ្រួសារដែលរងគ្រោះដោយសារបាតុភូតខ្យល់កន្ត្រាក់ចំនួន ៥៩គ្រួសារ ស្ថិតក្នុងសង្កាត់ម្កាក់ ក្រុងសិរីសោភ័ណ។     
នៅក្នុងឱកាសនោះ ឯកឧត្តម អ៊ុ រាត្រី បានពាំនាំនូវប្រសាសន៍ផ្ដាំផ្ញើសួរសុខទុក្ខប្រកបដោយមនោសញ្ចេតនាជ្រាលជ្រៅពីសំណាក់ ឯកឧត្តម ឌិត ទីណា ប្រធានកិត្តិយសសាខា និងជាពិសេសពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។
ឯកឧត្តមបានគូសបញ្ជាក់ថា សម្តេចកិត្តិព្រឹទ្ធបណ្ឌិត ជានិច្ចកាលតែងតែយកចិត្តទុកដាក់ខ្ពស់ចំពោះសុខទុក្ខរបស់បងប្អូនប្រជាពលរដ្ឋគ្រប់រូប ទោះស្ថិតក្នុងកាលៈទេសៈណាក៏ដោយ គឺមិនទុកឱ្យបងប្អូនណាម្នាក់ស្លាប់ដោយសារអត់អាហារ ឬរងគ្រោះដោយគ្មានការជួយជ្រោមជ្រែងឡើយ។     
ដើម្បីសម្រាលបន្ទុកជីវភាពចំពោះមុខ អំណោយដែលត្រូវបានចែកជូនដល់គ្រួសាររងគ្រោះទាំង ៥៩គ្រួសារនោះរួមមាន៖ គ្រឿងឧបភោគ បរិភោគចាំបាច់ប្រចាំថ្ងៃ សម្ភារប្រើប្រាស់ផ្សេងៗនិងថវិកាមួយចំនួនដែលជាការឆ្លើយតបបន្ទាន់របស់សាខាកាកបាទក្រហមខេត្ត។ក្រៅពីការផ្តល់ជំនួយ ឯកឧត្តមអភិបាលខេត្ត ក៏បានលើកឡើងពីបញ្ហាសុវត្ថិភាព និងសុខភាពសាធារណៈ ដោយបានផ្ដល់អនុសាសន៍សំខាន់ៗដល់ពលរដ្ឋ រួមមាន ការតាមដានអាកាសធាតុ ត្រូវតាមដានព័ត៌មានអាកាសធាតុជាប្រចាំ ដើម្បីត្រៀមលក្ខណៈទប់ទល់នឹងបាតុភូតធម្មជាតិ។ 
សុវត្ថិភាពអាយុជីវិត នៅពេលមានភ្លៀងធ្លាក់លាយឡំផ្គររន្ទះ និងខ្យល់កន្ត្រាក់ ត្រូវប្រញាប់ស្វែងរកទីកន្លែងដែលមានសុវត្ថិភាព និងកាត់ផ្ដាច់ប្រព័ន្ធអគ្គិសនីក្នុងផ្ទះ ប្រសិនបើចាំបាច់។
 សុខភាព និងអនាម័យ ត្រូវយកចិត្តទុកដាក់លើការរស់នៅស្អាត ហូបស្អាត និងផឹកស្អាត ដើម្បីបង្ការជំងឺដង្កាត់ផ្សេងៗ ជាពិសេសនៅអំឡុងពេលដែលអាកាសធាតុមានការប្រែប្រួលខ្លាំង។    
សកម្មភាពនេះ បានបង្ហាញឱ្យឃើញនូវការយកចិត្តទុកដាក់យ៉ាងជិតស្និទ្ធរបស់រដ្ឋបាលខេត្ត និងកាកបាទក្រហមកម្ពុជា ក្នុងការឆ្លើយតបទៅនឹងគ្រោះមហន្តរាយ ដើម្បីជួយដោះស្រាយបញ្ហាជូនប្រជាពលរដ្ឋបានទាន់ពេលវេលា និងប្រកបដោយប្រសិទ្ធភាព៕

ដោយ ឈុន សារ៉ាត