AKP បន្ទាយមានជ័យ ថ្ងៃទី២៧ ខែមេសា ឆ្នាំ២០២៦--ដើម្បីធានាបាននូវចរន្តទឹកស្រោចស្រពឱ្យបានគ្រប់គ្រាន់ និងទាន់ពេលវេលាសម្រាប់បង្កបង្កើនផលជូនប្រជាកសិករ កាលពីថ្ងៃទី២៦ ខែមេសា ឆ្នាំ២០២៦ ប្រតិភូក្រសួងធនធានទឹក និងឧតុនិយម ដឹកនាំដោយ លោក ប៉ុល សារ៉េន អនុប្រធាននាយកដ្ឋានធារាសាស្ត្រកសិកម្ម បានចុះពិនិត្យដោយផ្ទាល់នូវវឌ្ឍនភាពការងារជួសជុល និងថែទាំជាប្រចាំលើប្រព័ន្ធធារាសាស្ត្រសំខាន់ៗចំនួន ៣ ក្នុងភូមិសាស្ត្រខេត្តបន្ទាយមានជ័យ។

សកម្មភាពចុះត្រួតពិនិត្យនេះ មានការអមដំណើរដោយក្រុមការងារបច្ចេកទេសនៃមន្ទីរធនធានទឹក និងឧតុនិយមខេត្ត ព្រមទាំងមានការចូលរួមយ៉ាងជិតស្និទ្ធពីសហគមន៍កសិករប្រើប្រាស់ទឹក  ក្នុងគោលបំណងវាយតម្លៃលើគុណភាពការងារ និងដោះស្រាយបញ្ហាប្រឈមនានានៅចំពោះមុខ។

ការចុះពិនិត្យប្រព័ន្ធធារាសាស្ត្រយុទ្ធសាស្ត្រទាំង ៣ រួមមាន៖ ប្រព័ន្ធធារាសាស្ត្រអាងទឹកម្កាក់ស្ថិតក្នុងសង្កាត់ម្កាក់ ក្រុងសិរីសោភ័ណ ដែលជាអាងទឹកដ៏សំខាន់សម្រាប់ទ្រទ្រង់ការបង្កបង្កើនផលនៅតំបន់ជុំវិញក្រុង។ ប្រព័ន្ធធារាសាស្ត្រប្រឡាយឯកភាព ស្ថិតក្នុងឃុំបន្ទាយនាង ស្រុកមង្គលបូរី ដែលជាសរសៃឈាមសេដ្ឋកិច្ចកសិកម្មដ៏សំខាន់ក្នុងតំបន់។ ប្រព័ន្ធធារាសាស្ត្រប្រឡាយខ្ទុំជ្រុំ ស្ថិតក្នុងឃុំរហាត់ទឹក ស្រុកមង្គលបូរី ដែលកំពុងត្រូវបានយកចិត្តទុកដាក់លើការថែទាំដើម្បីបង្កើនលំហូរទឹក។

ក្រៅពីប្រព័ន្ធទាំង ៣ ខាងលើ ក្រុមការងារក៏បានបន្តដំណើរចុះទៅពិនិត្យស្ថានភាព ប្រព័ន្ធធារាសាស្ត្រប្រឡាយព្រៃខ្ពស់ ស្ថិតក្នុងឃុំសឿ ស្រុកមង្គលបូរី ផងដែរ ដើម្បីឈ្វេងយល់ពីតម្រូវការជាក់ស្តែង និងធានាថាប្រឡាយនេះមានលទ្ធភាពនាំទឹកទៅដល់ស្រែចំការរបស់ពលរដ្ឋបានពេញលេញ។ "ការចុះពិនិត្យ និងថែទាំជាប្រចាំនេះ គឺជាយន្តការដ៏សំខាន់ក្នុងការថែរក្សានិរន្តរភាពនៃសំណង់ធារាសាស្ត្រ ឱ្យមានគុណភាពជាប់បានយូរ និងអាចបម្រើផលប្រយោជន៍ដល់កសិករបានគ្រប់រដូវកាល"។ នេះជាការបញ្ជាក់ពីគោលបំណងនៃបេសកកម្មនេះ។

សកម្មភាពចុះជិតដិតដល់មូលដ្ឋាននេះ បានបង្ហាញឱ្យឃើញពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា តាមរយៈក្រសួងធនធានទឹក និងឧតុនិយម ក្នុងការគិតគូរពីសុខទុក្ខរបស់ប្រជាកសិករ។ ការពង្រឹងហេដ្ឋារចនាសម្ព័ន្ធធារាសាស្ត្រ មិនត្រឹមតែជួយបង្កើនទិន្នផលកសិកម្មប៉ុណ្ណោះទេ ប៉ុន្តែថែមទាំងជាគ្រឹះក្នុងការជំរុញសេដ្ឋកិច្ចគ្រួសារ និងសេដ្ឋកិច្ចជាតិឱ្យកាន់តែរឹងមាំតាមរយៈវិស័យកសិកម្មទំនើប៕

ដោយឈុនសារ៉ាត