AKP ភ្នំពេញ ថ្ងៃទី៨ ខែមេសា ឆ្នាំ២០២៦--ឯកឧត្តមបណ្ឌិតសភាចារ្យ ហង់ជួន ណារ៉ុន បានគូសបញ្ជាក់នូវរបៀបវារៈសំខាន់ចំនួន៣ សម្រាប់នាយកដ្ឋានអភិវឌ្ឍកម្មវិធីសិក្សាត្រូវបន្តយកចិត្តទុកដាក់អនុវត្ត និងពង្រឹងជាប្រចាំនោះរួមមាន៖ ១. ការបន្តពិនិត្យឡើងវិញ និងកែលម្អសៀវភៅសិក្សាគោល ដើម្បីធានាឱ្យបាននូវប្រសិទ្ធភាព និងសង្គតិភាព ២. ការដាក់ជូនតួនាទី និងភារកិច្ចថ្មីរបស់នាយកដ្ឋានអភិវឌ្ឍកម្មវិធីសិក្សាឆ្លើយតបនឹងរបៀបវារៈកំណែទម្រង់ការអប់រំ និង ៣. ការរៀបចំទិវាជាតិអំណាន និងពិព័រណ៍សៀវភៅជារៀងរាល់ឆ្នាំ។

ការគូសបញ្ជាក់ពីរបៀបវារៈទាំង៣ សម្រាប់នាយកដ្ឋានអភិវឌ្ឍកម្មវិធីសិក្សា ដោយឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាគឺធ្វើឡើងក្នុងពិធីប្រកាសចូលកាន់តំណែងរបស់ ឯកឧត្តម យិន ធី ក្នុងតួនាទីជាប្រធានគណៈគ្រប់គ្រងបណ្តោះអាសន្ននាយកដ្ឋានអភិវឌ្ឍកម្មវិធីសិក្សា និងការពិភាក្សាពីការអភិវឌ្ឍយុវជន នារសៀលថ្ងៃទី0៧ ខែមេសា ឆ្នាំ២០២៦ ដោយរដ្ឋមន្ត្រីក្រសួងអប់រំ យុវជន និងកីឡា បានលើកឡើងថា កន្លងមកក្រសួងបានពិនិត្យឡើងវិញនូវសៀវភៅសិក្សាគោលគ្រប់កម្រិត កែលម្អកម្មវិធីសិក្សា និងម៉ោងរៀនឱ្យកាន់តែមានប្រសិទ្ធភាព និងកែលម្អសៀវភៅសិក្សាគោលចាប់ពីថ្នាក់ទី១០ ដល់ទី១២ ដោយផ្តោតទៅលើមុខវិជ្ជាផ្នែកវិទ្យាសាស្ត្រ។  ដូច្នេះ ភារកិច្ចថ្មីរបស់នាយកដ្ឋានអភិវឌ្ឍកម្មវិធីសិក្សា គឺត្រូវបន្តពិនិត្យ និងកែលម្អសៀវភៅគោល ដើម្បីធានាឱ្យបាននូវប្រសិទ្ធភាព និងសង្គតិភាព ជាពិសេសសម្រាប់បឋមសិក្សា សូមជំរុញឱ្យបាននូវសង្គតិភាពជាមួយវិធីសាស្ត្របង្រៀនកញ្ចប់អំណានដំបូង និងគណិតវិទ្យាដំបូង។

ក្នុងន័យនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍ដល់ក្រុមការងារជំនាញសូមផ្តោតលើការបន្តពង្រឹងសមត្ថភាពស្ថាប័ន ត្រូវចុះទៅដល់សាលារៀនជួបពិភាក្សាផ្ទាល់ជាមួយលោកគ្រូ អ្នកគ្រូ ស្វែងយល់ពីបញ្ហាប្រឈមក្នុងការបង្រៀន ក៏ដូចជាបញ្ហាក្នុងការប្រើប្រាស់សៀវភៅសិក្សាគោល ដើម្បីដាក់ចេញវិធានការឆ្លើយតប រៀបចំចងក្រងសៀវភៅជំនួយគ្រូបង្រៀន ដោយប្រមូលផ្តុំវិធីសាស្ត្របង្រៀនល្អៗ បន្តកែលម្អការរៀន និងបង្រៀនភាសាខ្មែរ និងសូមបន្តធ្វើទំនើបកម្ម កម្មវិធីសិក្សា ដែលទាមទារការសហការជាមួយភាគីពាក់ព័ន្ធទាំងអស់ និងការបន្តសិក្សាពីបទពិសោធឧត្តមានុវត្តន៍របស់បណ្តាប្រទេសអភិវឌ្ឍន៍នានា៕

ដោយ ចាន់ សុភឿន (ប្រភព៖ ក្រសួងអប់រំ)