AKPខេត្តព្រះសីហនុថ្ងៃទី០៨ ខែមេសា ឆ្នាំ ២០២៦– រដ្ឋបាលខេត្តព្រះសីហនុ មានកិត្តិយសសូមជម្រាបជូនដំណឹងដល់បងប្អូនប្រជាពលរដ្ឋ និងសាធារណ ជនមេត្តាជ្រាបថា រដ្ឋបាលខេត្តព្រះសីហនុ បានចាត់តាំងក្រុមការងារខេត្ត ចុះធ្វើការសិក្សា វាស់វែង និងធ្វើការបើកតម្រាយផ្លូវថ្មីចំនួន១ខ្សែ ប្រវែង ៣.៧០០ ម៉ែត្រ ទទឹង ២០ម៉ែត្រ និងរក្សាទុកចំណីផ្លូវម្ខាង ៗ ១០ម៉ែត្រ (សរុបទំទឹងផ្លូវ ៤០ម៉ែត្រ) ដែលមានទីតាំងស្ថិតនៅភូមិឫទ្ធី១ ឃុំកែវផុស ស្រុកស្ទឹងហាវ ខេត្តព្រះសីហនុ។

រដ្ឋបាលខេត្តពិនិត្យឃើញថា មានសំណង់លំនៅឋាន តូបលក់ដូរ របង និងការ្យផ្សេងៗ របស់បងប្អូនប្រជាពលរដ្ឋមួយចំនួនបានសាងសង់លើតម្រាយផ្លូវបើកថ្មីតាមបណ្តោយឆ្នេរកែវផុស១ ដែលរដ្ឋបាលខេត្តបានសម្រេចកំណត់ ទុកជាផ្លូវប្រើប្រាស់ជាសាធារណៈរួច ហើយ។

ក្នុងន័យនេះ រដ្ឋបាលខេត្តសូមជូន ដំណឹងដល់បងប្អូនប្រជាពលរដ្ឋ និងសាធា រណជន ដែលមានសំណង់សាងសង់លលើតម្រាយផ្លូវថ្មីតាមបណ្តោយឆ្នេរកែវផុស១ ចូលរួមសហការរុះរើសំណង់របស់ខ្លួន ដោយ ស្ម័គ្រចិត្ត គិតចាប់ពីថ្ងៃចេញសេចក្តីជូនដំណឹងនេះតទៅ ដើម្បីសម្រួលដល់ក្រុមការងារក្នុងការសាងសង់ស្របតាមផែនការដែលបានគ្រោងទុក។

ក្នុងករណីបងប្អូនប្រជាពលរដ្ឋ និងសាធារណជនពុំបានរុះរើសំណង់របស់ខ្លួនដោយស្ម័គ្រចិត្តនោះទេ រដ្ឋបាលខេត្តអនុវត្តតាមនីតិវិធីច្បាប់ជាធរមាន ដោយ ធ្វើការឈូសឆាយ រុះរើសំណង់លំនៅឋាន តូបលក់ដូរ របង និងការ្យផ្សេងៗ ដែលសង់ប៉ះគម្រោងបើកតម្រាយផ្លូវថ្មីតាមបណ្ដោយឆ្នេរកែវផុស១ ដោយមិន ទទួលខុសត្រូវលើការខូចខាត និងបាត់ បង់ទ្រព្យសម្បត្តិឡើយ ដើម្បីធានាឱ្យការងារ នេះប្រព្រឹត្តទៅបានដោយរលូនទាន់ពេលវេលា និងទទួលបានលទ្ធផលល្អប្រសើរ។
រដ្ឋបាលខេត្តព្រះសីហនុ សង្ឃឹមយ៉ាងមុតមាំថា បងប្អូនប្រជាពលរដ្ឋ សាធា រណជន នឹងចូលរួមអនុវត្តតាមខ្លឹមសារសេចក្តីជូនដំណឹងនេះ ប្រកបដោយ ស្មារតីទទួលខុសត្រូវខ្ពស់។
ទទួលបានសេចក្តីជូនដំណឹងនេះ សូមលោកអភិបាល នៃគណៈអភិបាលស្រុកស្ទឹងហាវ លោកប្រធានមន្ទីរ-អង្គភាពពាក់ព័ន្ធ បងប្អូនប្រជាពលរដ្ឋ សាធា រណ ជនទាំងអស់ជ្រាប និងចូលរួមសហការអនុវត្តឱ្យមានប្រសិទ្ធភាពខ្ពស់៕

ដោយ៖ ងូ សុមុនី