AKP ភ្នំពេញ ថ្ងៃទី០៨ ខែមេសា ឆ្នាំ២០២៦ -- នាយករដ្ឋមន្ត្រីប៉ាគីស្ថានលោក ស្សេបាស់ ស្សារីហ្វ (Shehbaz Sharif) បានប្រកាសថាសហរដ្ឋអាមេរិក និងអ៊ីរ៉ង់ រួមជាមួយសម្ព័ន្ធមិត្តរបស់ពួកគេ បានព្រមព្រៀងទៅលើបទឈប់បាញ់ជាបន្ទាន់មួយនៅទូទាំងតំបន់ជម្លោះទាំងអស់ រួមទាំងប្រទេសលីបង់ផងដែរ។

លោក ស្សារីហ្វ បាននិយាយនៅលើប្រព័ន្ធផ្សព្វផ្សាយសង្គមអ៊ិចនៅព្រឹកព្រលឹមថ្ងៃពុធនេះថា «ខ្ញុំមានសេចក្តីសោមនស្សរីករាយក្នុងការប្រកាសថា សាធារណរដ្ឋអ៊ីស្លាមអ៊ីរ៉ង់ និងសហរដ្ឋអាមេរិក រួមជាមួយសម្ព័ន្ធមិត្តរបស់ពួកគេ បានយល់ព្រមទៅលើបទឈប់បាញ់ជាបន្ទាន់មួយនៅគ្រប់ទីកន្លែងរួមទាំងប្រទេសលីបង់ និងកន្លែងផ្សេងទៀត ដែលមានប្រសិទ្ធភាពភ្លាមៗ»។

ការកត់សម្គាល់របស់លោកនេះបានធ្វើឡើងបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បាននិយាយថាលោកបានយល់ព្រមផ្អាកការទម្លាក់គ្រាប់បែក និងការវាយប្រហារលើប្រទេសអ៊ីរ៉ង់រយៈពេលពីរសប្តាហ៍។

លោក ស្សារីហ្វ បាននិយាយថា លោកអញ្ជើញគណៈប្រតិភូសហរដ្ឋអាមេរិក និងអ៊ីរ៉ង់ទៅកាន់ទីក្រុងអ៊ីស្លាម៉ាបាដនៅថ្ងៃសុក្រសប្តាហ៍នេះ ដើម្បីចរចាបន្ថែមទៀតសម្រាប់កិច្ចព្រមព្រៀងចុងក្រោយមួយដើម្បីដោះស្រាយជម្លោះទាំងអស់។

ភាគីទាំងពីរបានបង្ហាញការយល់ដឹងដ៏អស្ចារ្យ ហើយនៅតែចូលរួមយ៉ាងសកម្មក្នុងការជំរុញបុព្វហេតុនៃសន្តិភាព និងស្ថិរភាព។

លោកបានបន្ថែមថា «យើងសង្ឃឹមយ៉ាងមុតមាំថា កិច្ចពិភាក្សាអ៊ីស្លាម៉ាបាដ នឹងទទួលបានជោគជ័យក្នុងការសម្រេចបាននូវសន្តិភាពប្រកបដោយចីរភាព និងចែករំលែកដំណឹងល្អបន្ថែមទៀតនៅក្នុងរយៈពេលប៉ុន្មានថ្ងៃខាងមុខ»៕

ដោយ៖ យា ចិន្ដាខន្ដី (ប្រភព៖ AA-AKP)