AKP ភ្នំពេញ ថ្ងៃទី0៨ ខែមេសា ឆ្នាំ២០២៦--សម្ដេអគ្គមហាសេនាបតីតេជោ ហ៊ុន សែន បានអរគុណចំពោះតួកគីយ៉េ ដែលកន្លងមក បានចូលរួមចំណែកផ្ដល់ជំនួយមនុស្សធម៌ដល់ជនភៀសសឹករបស់កម្ពុជា នៅក្នុងបញ្ហាសង្គ្រាមព្រំដែនកម្ពុជា-ថៃ។ នេះបើតាមការឱ្យដឹងរបស់ឯកឧត្ដម ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា បានអនុញ្ញ្ញាតឱ្យ លោកជំទាវ Ulku Kocaefe ឯកអគ្គរដ្ឋទូតនៃសាធារណរដ្ឋតួកគីយ៉េ ដែលបញ្ចប់អាណត្តិការទូតប្រចាំនៅព្រះ រាជាណាចក្រកម្ពុជា ចូលជួបសម្តែងការគួរសម និងជម្រាបលា នាព្រឹកថ្ងៃទី៨ ខែមេសាឆ្នាំ២០២៦ នៅវិមានសាមគ្គីភាព នៃព្រឹទ្ធសភា។

ក្នុងជំនួបនោះ សម្ដេចតេជោបានសម្ដែងនូវក្ដីរីករាយ ដែលសម្ដេចបានជួបលោកជំទាវសារជាថ្មី បើទោះបីជាពេលនេះលោកជំទាវត្រូវបញ្ចប់អាណត្តិបំពេញបេសកកម្មការទូតនៅកម្ពុជាក្ដី។ សម្ដេចតេជោ បានសម្ដែងនូវការកោតសរសើរចំពោះលោកជំទាវ Ulku Kocaefe ដែលក្នុងពេលបំពេញបេសកកម្មការទូតនៅកម្ពុជា លោកជំទាវសម្រេចបង្កើតសមទ្ធិផលជច្រើនសម្រាប់ទំនាក់ទំនង រវាងកម្ពុជា និងតួកគី ដែលមកដល់ពេលនេះប្រទេសទាំងពីរកំពុងតែមានទំនាក់ទំនងដ៏ល្អ និងរីកចម្រើនជាបន្តបន្ទាប់។ 

ជាមួយគ្នានេះ លោកជំទាវ Ulku Kocaefe បានសម្ដែងនូវការអរគុណជាអនេកប្បការ ដែលសម្ដេចតេជោបានអនុញ្ញាតឱ្យលោកជំទាវ និងសហការី បានជួបជម្រាបលាក្នុងឱកាសនេះ។ លោកជំទាវបានលើឡើងនូវរបាយការណ៍ និងរាយការណ៍ ក្នុងបេសកកម្មការទូតរបស់លោកជំទាវកន្លងមកនេះ ជូនចំពោះសម្ដេចតេជោ ដោយបានលើកឡើងនូវសមទ្ធិផលសំខាន់ៗក្នុងអាណត្តិរបស់លោកជំទាវ សម្រាប់ការពង្រីកនូវទំនាក់ទំនងរវាងកម្ពុជា និងតួកគី ដោយក្នុងនោះ បានង្កើតនូវការិយាល័យពាណិជ្ជកម្មរបស់តួកគីនៅកម្ពុជា ការបង្កើតនូវមជ្ឈមណ្ឌលវប្បធម៌របស់តួកគីនៅកម្ពុជា និងសមទ្ធិផលដែលទើបសម្រេចបាននៅចុងឆ្នាំ២០២៥នោះ គឺការបង្កើតនូវជើងហោះហើរតួកគី មកកាន់ព្រះរាជាណាចក្រកម្ពុជា ដែលជាផ្នែកដ៏សំខាន់ក្នុងការពង្រីកនូវទំនាក់ទំនងរវាងកម្ពុជា និងតួកគី ឱ្យកាន់តែរីកចម្រើន ទាំងនៅក្នុងក្របខ័ណ្ឌពាណិជ្ជកម្ម និងផ្សាភា្ជប់រវាងប្រជាជន និងប្រជាជន។ លោកជំទាវ ឯកអគ្គរដ្ឋទូតក៏បានសម្ដែចនូវការជាប់ចិត្តរបស់លោកជំទាវចំពោះប្រជាជនកម្ពុជា ជាពិសេសគឺស្នាមញញឹមរបស់ប្រជាជនកម្ពុជា ដែលមិនអាចធ្វើឱ្យលោកជំទាវបំភ្លេចបានឡើយ។ លោកជំទាវបានលើកឡើងថា បើទោះបីជាពេលនេះលោកជំទាវបញ្ចប់អាណត្តិការទូតនៅកម្ពុជាក៏ពិតមែន ក៏ប៉ុន្តែលោកជំទាវនូវតែជាមិត្តរបស់កម្ពុជាអស់មួយជីវិត។ នេះជាសារដែលបង្ហាញពីការពេញចិត្តប្រទេសកម្ពុជា ពីសំណាក់លោកជំទាវឯកអគ្គរដ្ឋទូត។

សម្ដេចតេជោប្រមុខរដ្ឋស្ដីទី បានសម្ដែងនូវការពេញចិត្តយ៉ាងក្រៃលែងចំពោះពាក្យពេជន៍ ដ៏មានអត្ថន័យរបស់លោកជំទាវឯកអគ្គរដ្ឋទូតតួកគី ចំពោះការពេញចិត្តប្រជាជនកម្ពុជា ក៏ដូចជា ប្រទេសកម្ពុជា។ សម្ដេចតេជោ ក៏បានលើកឡើងកោតសរសើរចំពោះការខិតខំប្រឹងប្រែងរបស់លោកជំទាវ Ulku Kocaefe ក្នុងឋានៈជាឯកអគ្គរដ្ឋទូតប្រចាំនៅព្រះរាជាណចក្រកម្ពុជាកន្លងមក ដោយលោកជំទាវបានខិតខំប្រឹងប្រែងខ្លាំងណាស់ ក្នុងការពង្រីកនូវទំនាក់ទំនងទ្វភាគីរវាងកម្ពុជា និងតួកគី ដោយបានបង្កើតឱ្យមានការិយាល័យពាណិជកម្ម មជ្ឈមណ្ដលវប្បធម៌ និងជើងហោះហើរពីតួគីមកកាន់កម្ពុជា ដែលជាចរន្តគាំទ្រដល់ទំនាក់ទំនងទ្វេភាគីរវាងកម្ពុជា និងតួកគី ឱ្យកាន់តែល្អប្រសើរ។ សម្ដេតេជោ ហ៊ុន សែន ក៏បានអរគុណចំពោះតួកគី ដែលកន្លងមកបានចូលរួមចំណែកផ្ដល់ជំនួយមនុស្សធម៌ដល់ជនភៀសសឹករបស់កម្ពុជា នៅក្នុងបញ្ហាសង្គ្រាមព្រំដែនកម្ពុជា-ថៃ។ 
ក្នុងឱកាសនោះ សម្ដេចតេជោ ប្រមុខរដ្ឋស្ដីទី ក៏បានរំលេច និងពន្យល់អំពីបញ្ហាព្រំដែនរវាងកម្ពុជា និងថៃ ដល់លោកជំទាវបានជ្រាបផងដែរ ជាពិសេសគឺជំហរបស់កម្ពុជា ក្នុងការរក្សានូវបទឈប់បាញ់ឱ្យបានយូរអង្វែង និងការដោះស្រាយបញ្ហាដោយសន្តិវិធី តាមរយៈការចរចា៕

ដោយ៖ ជឹម ណារី