AKP តាកែវ ថ្ងៃទី០៨ ខែមេសា ឆ្នាំ២០២៦--កងរាជអាវុធហត្ថខេត្តតាកែវ បានបើកកិច្ចប្រជុំផ្សព្វផ្សាយរបាយការណ៍បូកសរុបលទ្ធផលការងារប្រចាំត្រីមាសទី១ និងលើកទិសដៅការងារត្រីមាសទី២ឆ្នាំ២០២៦។ពិធីនេះរៀបចំឡើងនៅសាលប្រជុំ បញ្ជាការដ្ឋានកងរាជអាវុធហត្ថខេត្តតាកែវ កាលពីរសៀលថ្ងៃអង្គារ៥រោច ខែចេត្រ ឆ្នាំម្សាញ់សប្ដស័កព.ស២៥៦៩ ត្រូវនឹងថ្ងៃទី៧ ខែមេសា ឆ្នាំ២០២៦។អញ្ជើញជាអធិបតីក្នុងពិធីនោះ ដោយលោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ ព្រមទាំងមានការអញ្ជើញចូលរួមពីថ្នាក់ដឹកនាំ និងមន្ត្រីកងរាជអាវុធហត្ថខេត្តតាកែវ ជាច្រើនរូបផងដែរ។

មានប្រសាសន៍សំណេះសំណាលក្នុងពិធីនោះ លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ បានមានប្រសាសន៍ថា ថ្នាក់ដឹកនាំនិងមន្ត្រីកងរាជអាវុធហត្ថខេត្តតាកែវទាំងអស់ ត្រូវបន្តអនុវត្តផែនការការពារសន្តិសុខ រក្សាសុវត្ថិភាព រៀបចំសណ្ដាប់ធ្នាប់ និងត្រៀមសង្គ្រោះបន្ទាន់ ក្នុងពិធីបុណ្យចូលឆ្នាំថ្មីប្រពៃណីជាតិខ្មែរក្នុងពេលខាងមុខនេះ។ត្រូវធ្វើការល្បាតចល័តតាមរមណីយដ្ឋាន ទីប្រជុំជននានាក្នុងភូមិសាស្ត្រដែលខ្លួនទទួលខុសត្រូវ ដើម្បីការពារបង្ការរាល់បទល្មើស។ជាពិសេសបង្ក្រាបក្មេងទំនើង ដែលតែងតែបង្កការអុកឡុក ធ្វើឲ្យខូចសណ្ដាប់ធ្នាប់សន្តិសុខសុវត្ថិភាពសង្គម មិនត្រូវលើកលែងជាដាច់ខាត។

លោកឧត្តមសេនីយ៍ត្រី សេង មហា បានមានប្រសាសន៍បន្តថា ត្រូវផ្សព្វផ្សាយខ្លឹមសារអំពីលទ្ធផលអង្គប្រជុំ គណៈបញ្ជាការឯកភាពរដ្ឋបាលខេត្តតាកែវ កាលពីពេលថ្មីៗនេះ និងបទបញ្ជាថ្មីៗរបស់ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណៈបញ្ជាការឯកភាពរដ្ឋបាលខេត្តតាកែវ។តាមបណ្ដាមូលដ្ឋានកងរាជអាវុធហត្ថក្រុង-ស្រុក ត្រូវបន្តចុះសម្រួលចរាចរណ៍ ជូនសិស្សានុសិស្សតាមបណ្ដាសាលារៀន ពេលចេញនិងចូលសាលា។ត្រូវបន្តចូលរួមគាំទ្រការងារគោលនយោបាយ មូលនិធិមហាគ្រួសារកងរាជអាវុធហត្ថ និងមូលនិធិមនុស្សធម៌កងរាជអាវុធហត្ថខេត្តតាកែវ។

លោកឧត្តមសេនីយ៍ត្រី សេង មហា បានមានប្រសាសន៍បន្ថែមថា ត្រូវបន្តត្រៀមកម្លាំងអន្តរាគមន៍ចំណុចខ្ពស់ រង់ចាំអនុវត្តបទបញ្ជា ពិសេសកម្លាំងដែលមានភារកិច្ច ប្រចាំការលេខពិសេសទាន់ហេតុការណ៍(Hot Iine) ២៤ម៉ោងលើ២៤ម៉ោង សម្រាប់ទទួលព័ត៌មានឬពាក្យបណ្ដឹងពីបងប្អូនប្រជាពលរដ្ឋ។ពង្រឹងការអនុវត្តច្បាប់និងសារាចរណែនាំផ្សេងៗ បំពេញតួនាទីភារកិច្ចតាមឋានានុក្រម។បន្តអនុវត្តន៍ផែនការល្បាតចល័តក្នុងភូមិសាស្ត្រ ដើម្បីបង្ការបង្ក្រាបរាល់បទល្មើស ពិសេសបទល្មើសគ្រឿងញៀន ក្មេងទំនើង ការជួញដូរមនុស្ស ល្បែងស៊ីសងខុសច្បាប់ និងបង្ក្រាបបទល្មើសScam Online។ការិយាល័យជំនាញត្រូវរៀបចំកិច្ចប្រជុំ ត្រួតពិនិត្យការអនុវត្តតួនាទីភារកិច្ច ការធ្វើកំណែទម្រង់ និងការកសាងអង្គភាព។ត្រូវបន្តរក្សាសាមគ្គីភាពផ្ទៃក្នុងឲ្យបានល្អប្រសើរ ដើម្បីធានាបាននូវសន្តិសុខសណ្ដាប់ធ្នាប់សាធារណៈ និងសុខសុវត្ថិភាពជូនប្រជាពលរដ្ឋនៅក្នុងខេត្តតាកែវទាំងមូល។

ដោយ អ៊ុច សៀង