AKP បន្ទាយមានជ័យ ថ្ងៃទី៨ ខែមេសា ឆ្នាំ២០២៦--ក្នុងគោលដៅលើកកម្ពស់សុខុមាលភាពផ្លូវចិត្តរបស់ប្រជាពលរដ្ឋឱ្យកាន់តែល្អប្រសើរ ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល លោកវេជ្ជបណ្ឌិត ឡេ ច័ន្ទសង្វាតប្រធានមន្ទីរសុខាភិបាល នៃរដ្ឋបាលខេត្តបន្ទាយមានជ័យ បានលើកឡើងពីសារៈសំខាន់មិនអាចខ្វះបាននៃ "ការថែទាំបឋមផ្នែកផ្លូវចិត្ត" សម្រាប់ជួយសង្គ្រោះជនរងគ្រោះដែលរងការប៉ះទង្គិចផ្លូវចិត្តធ្ងន់ធ្ងរ។

ការថ្លែងបែបនេះ បានធ្វើឡើងក្នុងឱកាសដែលលោកវេជ្ជបណ្ឌិតប្រធានមន្ទីរ អញ្ជើញជាអធិបតីក្នុងពិធី បិទ វគ្គបណ្ដុះបណ្ដាល ស្តីពីការថែទាំបឋមសម្រាប់ជនរងគ្រោះដោយការប៉ះទង្គិចផ្លូវចិត្ត កាលពីរសៀលថ្ងៃទី៧ ខែមេសា ឆ្នាំ២០២៦នេះនៅសាលប្រជុំធំនៃមន្ទីរសុខាភិបាលខេត្ត។

វគ្គបណ្ដុះបណ្ដាលរយៈពេល ២ថ្ងៃ (ចាប់ពីថ្ងៃទី៦ ដល់ថ្ងៃទី៧ ខែមេសា) នេះ គឺជាកិច្ចសហការយ៉ាងជិតស្និទ្ធរវាងមន្ទីរសុខាភិបាល នៃរដ្ឋបាលខេត្តបន្ទាយមានជ័យជាមួយនាយកដ្ឋានសុខភាពផ្លូវចិត្ត និងការបំពានគ្រឿងញៀន ក្រោមការគាំទ្រថវិកាឧបត្ថម្ភពី អង្គការ UNICEF។

ក្នុងពិធីបិទនេះ លោកវេជ្ជបណ្ឌិត ឡេ ច័ន្ទសង្វាត បានកោតសរសើរចំពោះសិក្ខាកាមទាំងអស់ដែលបានខិតខំក្រេបជញ្ជក់ចំណេះដឹង និងបទពិសោធន៍ថ្មីៗ។ លោកវេជ្ជបណ្ឌិតបានមានប្រសាសន៍ផ្ដាំផ្ញើក្នុងមុំសំខាន់ៗ  “ការព្យាបាលរបួសរាងកាយគឺជារឿងមួយ ប៉ុន្តែការជួយសង្គ្រោះ និងព្យាបាលរបួសផ្លូវចិត្ត គឺជាកិច្ចការដ៏ទន់ភ្លន់ និងចាំបាច់បំផុត ដែលទាមទារឱ្យមន្ត្រីសុខាភិបាលយើងមានទាំងជំនាញ បច្ចេកទេស និងសេចក្ដីមេត្តាករុណាខ្ពស់បំផុត”។

ទិសដៅការងារបន្តសម្រាប់ សិក្ខាកាមដែលទទួលបានការបណ្ដុះបណ្ដាលរួច ត្រូវយកចំណេះដឹងទាំងនេះទៅប្រើប្រាស់ឱ្យចំគោលដៅ នៅតាមមូលដ្ឋានសុខាភិបាលរៀងៗខ្លួន ដើម្បីជួយដល់ជនរងគ្រោះឱ្យទាន់ពេលវេលា។ ត្រូវបន្តអប់រំ និងផ្សព្វផ្សាយដល់សហគមន៍ឱ្យយល់ដឹងពីបញ្ហាសុខភាពផ្លូវចិត្ត ដើម្បីលុបបំបាត់ការរើសអើងចំពោះអ្នកដែលមានបញ្ហាផ្លូវចិត្ត។ ត្រូវយកចិត្តទុកដាក់ខ្ពស់លើការស្ដាប់ ការផ្ដល់កម្លាំងចិត្ត និងការការពារសិទ្ធិបុគ្គលរបស់ជនរងគ្រោះដែលកំពុងស្ថិតក្នុងស្ថានភាពប៉ះទង្គិចផ្លូវចិត្តខ្លាំង។

ជាមួយគ្នានោះ លោកវេជ្ជបណ្ឌិតប្រធានមន្ទីរ ក៏បានថ្លែងអំណរគុណយ៉ាងជ្រាលជ្រៅចំពោះអង្គការ UNICEF និងនាយកដ្ឋានពាក់ព័ន្ធ ដែលតែងតែផ្ដល់ការគាំទ្រទាំងបច្ចេកទេស និងថវិកា ក្នុងយុទ្ធនាការលើកកម្ពស់សុខភាពផ្លូវចិត្តក្នុងខេត្តបន្ទាយមានជ័យឱ្យមានភាពរីកចម្រើនជាលំដាប់៕

ដោយ ឈុន សារ៉ាត