AKP ភ្នំពេញ ថ្ងៃទី៨ ខែមេសា ឆ្នាំ២០២៦--អង្គការ UNICEF កំពុងធ្វើយុទ្ធនាការផ្តល់ថ្នាំបង្ការ ជំងឺគ្រុនស្វិតដៃជើង ចំពោះកុមារដែលកំពុងតែអនុវត្តនៅតាមរាជធានី ខេត្តគោលដៅចំនួន៨ ដែលជាតំបន់មានហានិភ័យខ្ពស់ក្នុងប្រទេសកម្ពុជា ដែលលើកទី១នឹងបន្តផ្តល់ជូនរហូតដល់ ថ្ងៃទី១០ ខែមេសា ឆ្នាំ២០២៦ ។ 

យុទ្ធនាការនេះផ្ដោតសំខាន់លើកុមារដែលមានអាយុក្រោម ៥ ឆ្នាំ ដើម្បីការពារពួកគេពី ជំងឺគ្រុនស្វិតដៃជើង ដែលជាជំងឺដ៏កាចសាហាវ និងអាចបង្កឱ្យមានពិការភាពអស់មួយជីវិត។ ការផ្តល់ថ្នាំបង្ការលើកទី២ នឹងចាប់ពីថ្ងៃទី៤ ដល់ថ្ងៃទី១៤ខែឧសភា ឆ្នាំ២០២៦។ ដើម្បីឈានទៅលុបបំបាត់ជំងឺគ្រុនស្វិតដៃជើង និងដើម្បីទៅឱ្យដល់កុមារគ្រប់រូប យូនីសេហ្វ UNICEF បានគាំទ្រ ក្រសួងសុខាភិបាលនៃព្រះរាជាណាចក្រកម្ពុជា ដោយបានសហការជាមួយនឹងដៃគូគាំទ្រនានារួមមាន Rotary International, End Polio Now, @Global Polio Eradication Initiative, Gavi, the Vaccine Alliance, World Health Organization (WHO), Clinton Health Access Initiative និង KSRelief ។

នៅទិវាសុខភាពពិភពលោកនាថ្ងៃទី០៧ ខែមេសា ឆ្នាំ២០២៦នេះ អង្គការ UNICEF រំលឹកថា សុខភាពគឺជាគ្រឹះដ៏សំខាន់បំផុតសម្រាប់ការរីកលូតលាស់ ការការពារ និងអនាគតរបស់កុមារគ្រប់រូប ។ ការផ្តល់ថ្នាំបង្ការ គឺជាការផ្ដល់នូវការចាប់ផ្ដើមដ៏ល្អបំផុតក្នុងជីវិតសម្រាប់កុមារ តាមរយៈការការពារពួកគេពីជំងឺនានាដែលយើងបង្ការបាន ៕ 

ដោយ ណយ នឿន (ប្រភព៖UNICEF)