AKP ភ្នំពេញ ថ្ងៃទី០៨ ខែមេសា ឆ្នាំ២០២៦--ដើម្បីទទួលបានជោគជ័យទៅលើយន្តការការផ្តល់សេវាសុខាភិបាលដល់ប្រជាពលរដ្ឋឱ្យមានប្រសិទ្ធិភាពខ្ពស់ និងទាន់ពេលវេលា គឺយើងត្រូវការសាមគ្គីភាពគ្នា រួមគ្នាគិត រួមគ្នាធ្វើ រួមគ្នាដោះស្រាយដើម្បីឱ្យសម្រេចបានទៅតាមយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។

លោកជំទាវ ឡោក ខេង ប្រធានគណ:កម្មការ សុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) បានមានប្រសាសន៍ លើកឡើងដូច្នេះក្នុងឱកាសដឹកនាំគណ:ប្រតិភូគណ:កម្មការទី៨ នៃរដ្ឋសភាចុះពិនិត្យសិក្សាស្វែងយល់ពីវឌ្ឍនភាពការងារ ក៏ដូចជាបញ្ហាប្រឈមនានាលើការផ្តល់សេវាសុខាភិបាលនៅមន្ទីរពេទ្យកុមារជាតិ នារសៀលថ្ងៃទី៧ ខែមេសា ឆ្នាំ២០២២៦។

ទទួលស្វាគមន៍គណ:ប្រតិភូគណ: កម្មការទី៨ នៃរដ្ឋសភា មានលោកជំទាវ គ្រិយ លាងស៉ីម អនុរដ្ឋលេខា ធិការក្រសួងសុខាភិបា ល និងជាប្រធានក្រុមប្រឹក្សាភិបាលមន្ទីរពេទ្យកុមារជាតិ និងលោក វេជ្ជបណ្ឌិត ញឹប អង្គាបុស្ស ប្រធានមន្ទីរពេទ្យកុមារជាតិ។ 

លោកជំទាវ ឡោក ខេង បានមានប្រសាសន៍ថាដំណើរទស្សនកិច្ចឈ្វេងយល់នេះធ្វើឡើងក្នុងគោលបំណងចម្បងដើម្បីពិនិត្យកម្មវិធីនយោបាយអាទិភាពរបស់ រាជរដ្ឋាភិបាល នីតិកាលទី៧ នៃរដ្ឋសភា និងយុទ្ធសាស្ត្របញ្ចកោណ ដំណាក់កាលទី១ ចំពោះការផ្តល់ការថែទាំសុខភាពចម្បងឆ្ពោះទៅកម្មវិធីគ្របដណ្តប់សុខភាពជាសកល និងការពង្រីកការគាំពារថែទាំសុខភាពរបស់របបសន្តិសុខសង្គម(ប.ស.ស. )ទាំងសម្រាប់កម្មករ និយោជិត និងមន្រ្តីសាធារណៈដែលគ្របដណ្តប់បន្ថែមដោយសមាជិកគ្រួសារនៅក្នុងបន្ទុក ការផ្តល់សេវាថែទាំសុខភាពជូនគ្រួសារងាយរងហានិ ភ័យ និងមូលនិធិសមធម៌។ 

លោកជំទាវប្រធានគណៈកម្មការទី៨ក៏បានសំណូមពរដល់ឯកឧត្តមវេជ្ជបណ្ឌិត សាស្ត្រាចារ្យ ទាំងអស់ខិតខំធ្វើកិច្ចសហការជាមួយបណ្តាមន្ទីរពេទ្យខេត្ត ស្រុក និងតាមមណ្ឌលសុខភាពឱ្យមានប្រសិទ្ធិភាពខ្ពស់ទាំងគុណភាព និងសេវាធ្វើយ៉ាងណាឱ្យបងប្អូនប្រជាពលរដ្ឋយើងមានជំនឿទុកចិត្តមកលើវិស័យសុខាភិបាល។

លោកវេជ្ជបណ្ឌិត ញឹប អង្គាបុស្ស បានលើកឡើងពីប្រវត្តិកកើត ការវិវត្តិ និងដំណើរការរបស់មន្ទីរពេទ្យកុមារជាតិ ព្រមទាំងការជួយឧបត្ថម្ភពីអង្គការ World Vision Internationalនិងអង្គការJICA ។

ដោយបង្កើតឡើងនៅឆ្នាំ១៩៧៤ និងបើកដំណើរការឡើងវិញនាឆ្នាំ១៩៨០ បន្ទាប់ពីបិទសម័យខ្មែរក្រហម១៩៧៥-១៩៧៩នោះ មន្ទីរពេទ្យមានតែ៦០គ្រែប៉ុណ្ណោះ តែមកដល់បច្ចុប្បន្នមាន ៤០០ គ្រែ។ មន្ទីរពេទ្យផ្តល់សេវាកម្រិតថ្នាក់ជាតិ នូវគ្រប់ប្រភេទជំងឺរបស់កុមារ មន្ទីរពេទ្យជាមជ្ឈមណ្ឌលបណ្តុះបណ្តាលដល់មន្ត្រីសុខាភិបាល និស្សិត អំពីរោគកុមារ និងបានក្លាយជាគ្រឹះស្ថានរដ្ឋបាលសាធារណៈនៅក្នុងឆ្នាំ២០១១។ 

លោកវេជ្ជបណ្ឌិត បានមានប្រសាសន៍ឱ្យដឹងទៀតថា៖មន្ទីរពេទ្យកុមារជាតិប្រើប្រាស់គ្រែក្នុងឆ្នាំ២០២៣ ចំនួន១៦២% ឆ្នាំ២០២៤ ចំនួន១០៦%  ឆ្នាំ២០២៥ ចំនួន១៧៧% ។ចំណែក ០៣ខែក្នុងឆ្នាំ២០២៦ ប្រើប្រាស់ គ្រែ ១៣១.៦៧%។

លោកបានលើកឡើងថា៖មន្ទីរពេទ្យក៏ជួបបញ្ហាប្រឈមអត្រាប្រើប្រាស់គ្រែមានការកើនឡើងខ្ពស់។ មន្ទីរពេទ្យបានបណ្ដុះស្មារតីឥរិយាបថសីលធម៌គ្រូពេទ្យក្នុងការបម្រើសេវា និងការធ្វើការបដិសណ្ឋារកិច្ចយ៉ាងកក់ក្ដៅដល់ប្រជាពលរដ្ឋដែលមកទទួលសេវា ព្យាបាល និងពិនិត្យសុខភាព ហើយមន្ទីរពេទ្យក៏បានត្រៀមបម្រុងគ្រប់ពេល និងប្ដេជ្ញាបន្ដផ្ដល់សេវាពិនិត្យព្យាបាលជូនប្រជាពលរដ្ឋដែលមកទទួលសេវាព្យាបាលនៅមន្ទីរពេទ្យកុមារជាតិដោយមិនរើសអើង។

ក្រោយពីបានស្តាប់សេចក្តីរាយការណ៍របស់លោកប្រធានមន្ទីរពេទ្យរួចមក លោកជំទាវ ឡោក ខេង បានធ្វើការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ទីរពេទ្យកុមារជាតិ ដោយបានវិវត្តខ្លួនយ៉ាងឆាប់រហ័សក្លាយជាស្ថាប័នដែលមានការសាទរ ទទួលស្គាល់ និងមានទំនុកចិត្តយ៉ាងខ្លាំងពីសំណាក់បងប្អូនប្រជាពលរដ្ឋគ្រប់មជ្ឈដ្ឋានទាំងអស់លើការធានារ៉ាប់រងចំពោះការគាំពារសុខភាព នៅពេលមានជំងឺឬក៏គ្រោះថ្នាក់ផ្សេងៗ។

លោកជំទាវ ឡោក ខេង បានបន្ថែមថា សម្រាប់នីតិកាលទី៧នេះ រាជរដ្ឋាភិបាល បានយកចិត្តទុកដាក់ខ្ពស់ចំពោះការពង្រឹងវិស័យសុខាភិបាល និងគោលនយោបាយអាទិភាពសំដៅឈានដល់ការគ្របដណ្ដប់សុខភាពជាសាកល ក្នុងន័យនេះ ប.ស.ស. ក៏ដើរតួយ៉ាងសំខាន់ក្នុងការជំរុញគោលនយោបាយមួយនេះផងដែរ ៕

ដោយ៖ ប៊ុនរិទ្ធ, ប្រភព៖ រដ្ឋសភា