AKP ព្រះវិហារ ថ្ងៃទី១៧ ខែមីនា ឆ្នាំ២០២៦ -- ក្នុងស្មារតីយកចិត្តទុកដាក់ខ្ពស់លើសុខុមាលភាពប្រជាពលរដ្ឋតាមបន្ទាត់ព្រំដែន លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានអញ្ជើញចុះសួរសុខទុក្ខ និងចែកអំណោយសង្គ្រោះបន្ទាន់ជូនដល់ប្រជាពលរដ្ឋភៀសសឹកចំនួន ៤៥៣គ្រួសារ កាលពីថ្ងៃទី១៦ ខែមីនា ឆ្នាំ២០២៦ ស្ថិតនៅវត្តឧត្តរគិរីទួលអណ្តែត ស្រុកគូលែន ខេត្តព្រះវិហារ។

សកម្មភាពមនុស្សធម៌នេះ ត្រូវបានរៀបចំឡើងក្នុងឱកាសអបអរសាទរខួបលើកទី១១៥ នៃទិវាអន្តរជាតិនារី ០៨ មីនា ក្រោមប្រធានបទ «សន្តិភាព និងសន្តិសុខសម្រាប់ស្ត្រី និងគ្រួសារ»។ លោកជំទាវរដ្ឋមន្ត្រី រួមជាមួយថ្នាក់ដឹកនាំក្រសួង និងមន្ទីរកិច្ចការនារីខេត្ត បាននាំយកនូវស្បៀងអាហារ និងសម្ភារៈប្រើប្រាស់ចាំបាច់ ផ្ដល់ជូនដល់បងប្អូនប្រជាពលរដ្ឋ ជាពិសេសក្រុមជនងាយរងគ្រោះ រួមមានស្ត្រីមានផ្ទៃពោះ ស្ត្រីមានកូនតូច គ្រូពេទ្យ គ្រូបង្រៀន និងសិស្សានុសិស្សដែលកំពុងស្នាក់នៅក្នុងមណ្ឌលសុវត្ថិភាព។

ក្នុងឱកាសសំណេះសំណាលនោះ លោកជំទាវកិត្តិបណ្ឌិតបានពាំនាំនូវការសួរសុខទុក្ខ និងក្តីនឹករលឹកបំផុតពីសំណាក់ សម្ដេចធិបតី នាយករដ្ឋមន្ត្រី និងលោកជំទាវបណ្ឌិត ជូនចំពោះបងប្អូនប្រជាពលរដ្ឋ និងវីរកងទ័ពដែលកំពុងឈរជើងការពារទឹកដី។
លោកជំទាវរដ្ឋមន្ត្រី បានគូសបញ្ជាក់ថា «រាជរដ្ឋាភិបាលកម្ពុជា ជានិច្ចកាលតែងតែប្រកាន់ខ្ជាប់នូវគោលនយោបាយ មិនទុកនរណាម្នាក់ឱ្យនៅឯកោ។ យើងកំពុងខិតខំប្រឹងប្រែងដោះស្រាយរាល់បញ្ហាប្រឈមនានាដោយសន្តិវិធីតាមយន្តការច្បាប់ និងការទូតអន្តរជាតិ ដើម្បីធានាបាននូវអធិបតេយ្យភាពជាតិ និងបង្កលក្ខណៈឱ្យបងប្អូនអាចវិលត្រឡប់ទៅកាន់លំនៅដ្ឋានវិញប្រកបដោយសុវត្ថិភាព និងមោទនភាព»។ ជាមួយគ្នានេះផងដែរ លោកជំទាវបានថ្លែងនូវការកោតសរសើរយ៉ាងខ្លាំងដល់រដ្ឋបាលខេត្តព្រះវិហារ និងអាជ្ញាធរពាក់ព័ន្ធទាំងអស់ ដែលបានសហការគ្នាយ៉ាងសកម្មក្នុងការរៀបចំមណ្ឌលសុវត្ថិភាព បង្កលក្ខណៈងាយស្រួលដល់ការស្នាក់នៅរបស់ប្រជាពលរដ្ឋ ជាពិសេសការយកចិត្តទុកដាក់លើសុវត្ថិភាព និងតម្រូវការចាំបាច់របស់ស្ត្រី និងក្មេងស្រី។

សកម្មភាពនេះបានបង្ហាញឱ្យឃើញពីការសាមគ្គីភាព និងការយកចិត្តទុកដាក់ខ្ពស់របស់រាជរដ្ឋាភិបាលចំពោះប្រជាពលរដ្ឋដែលរងផលប៉ះពាល់ដោយសារជម្លោះសឹក ក្នុងគោលដៅរក្សាសុខសន្តិភាព និងស្ថិរភាពជីវភាពរបស់គ្រួសារនីមួយៗ៕

ដោយ៖ ទូច វលក័្ខណ (ប្រភព៖ ក្រសួងកិច្ចការនារី)