AKP ភ្នំពេញ ថ្ងៃទី១៧ ខែមីនា​ ឆ្នាំ២០២៦--ការងារលើកកម្ពស់ការអប់រំសម្រាប់កុមារនៅក្នុងតំបន់គោលដៅនៃប្រទេសកម្ពុជា ត្រូវបាន លើកយកមកពិភាក្សារវាងឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាជាមួយលោក Mark Viso អគ្គនាយកនៃអង្គការ អេហ្វ អេក កម្ពុជា ប្រចាំសហរដ្ឋអាមេរិក និងលោកស្រី ពិន ទិត្យវាសនា នាយិកាប្រចាំប្រទេសនៃអង្គការ អេហ្វ អេក កម្ពុជា នៅទីស្តីការក្រសួងកាលពីរសៀលថ្ងៃទី១៦ ខែមីនា ឆ្នាំ២០២៦។

​ក្នុងការពិភាក្សានេះ តំណាងអង្គការ អេហ្វ អេក កម្ពុជា បានវាយតម្លៃខ្ពស់ចំពោះក្រសួងអប់រំ យុវជន និងកីឡា ពីការផ្តល់កិច្ចសហការយ៉ាងយកចិត្តទុកដាក់នូវរាល់គម្រោងពាក់ព័ន្ធនឹងវិស័យ អប់រំរបស់អង្គការអេហ្វ អេក កម្ពុជា និងបានគូសបញ្ជាក់ពីបេសកកម្មរបស់អង្គការ ដែលបាន និងកំពុងប្រតិបត្តិការនៅក្នុងខេត្តសៀមរាប និងឧត្តរមានជ័យ ដែលមានក្រុង/ស្រុកចំនួន៥ ដូចជា ស្រុកពួក ចុងកាល់ ត្រពាំងប្រាសាទ បន្ទាយអំពិល និងក្រុងសំរោង ដែលគាំទ្រសាលា រៀនគោល ដៅចំនួន ២៣២សាលា ដោយអង្គការបានសហការជាមួយមន្ទីរអប់រំខេត្តសៀមរាប និងឧត្តរមាន ជ័យលើគម្រោងសំខាន់ៗដូចជា បណ្ណាល័យឌីជីថល តាមរយៈការបង្កើត និងជួសជុល បណ្ណាល័យ តាមសាលារៀនគោលដៅដោយបញ្ចូលបច្ចេកវិទ្យាឌីជីថល ដើម្បីឱ្យសិស្សអាចស្វែងរកឯកសារ រៀនសូត្របានសម្បូរបែប និងកម្មវិធីអានដំបូង តាមរយៈការគាំទ្រដល់គ្រូបង្រៀន ក្នុងការប្រើប្រាស់ វិធីសាស្ត្របង្រៀនថ្មីៗ ដើម្បីឱ្យសិស្សថ្នាក់ទី១ ដល់ទី៣ ឆាប់ចេះអាន និងសរសេរ។ បន្ថែមពីនេះ អង្គការបានរៀបចំវគ្គបណ្តុះបណ្តាលសហការគ្នាជាមួយមន្ត្រីក្រសួងអប់រំ យុវជន និងកីឡាលើ ការគ្រប់គ្រងសាលារៀន និងការរៀបចំផែនការអភិវឌ្ឍន៍សាលារៀន ដើម្បីឱ្យសាលារៀន មានភាពម្ចាស់ការក្នុងការដឹកនាំថែមទៀតផង។

​ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែង អំណរគុណដល់អង្គការ អេហ្វ អេក កម្ពុជា ចំពោះការបន្តជួយគាំទ្រដល់វិស័យអប់រំនៅកម្ពុជា ជាច្រើនឆ្នាំមកនេះ និងបានលើកឡើងពីវឌ្ឍនភាពនៃការអប់រំកុមារតូច ដោយគូសរំលេច ពីសារៈសំខាន់នៃការពង្រឹងមូលដ្ឋានគ្រឹះចំណេះដឹងចាប់ពីកម្រិតបឋមសិក្សា តាមរយៈការបន្ត អនុវត្តន៍កញ្ចប់អំណានដំបូង និងគណិតវិទ្យាដំបូង ការបន្តលើកកម្ពស់គុណវុឌ្ឍិគ្រូ ការអនុវត្ត ស្តង់ដាសាលារៀនគំរូ និងជំរុញការចូលរួមគាំទ្រពីសំណាក់សហគមន៍ មាតាបិតា និងអាណា ព្យាបាល ខណៈដែលកិច្ចសហប្រតិបត្តិការយ៉ាងជិតស្និទ្ធរវាងក្រសួងអប់រំ យុវជន និងកីឡា និងអង្គការ អេហ្វ អេក កម្ពុជា បានផ្តោតលើការលើកកម្ពស់គុណភាពអប់រំនៅ តាមតំបន់ដាច់ ស្រយាល និងការឆ្លើយតបទៅនឹងស្ថានភាពអាសន្ន តាមរយៈគម្រោងដូចជា ការអប់រំក្នុងស្ថានភាព អាសន្ន ការលើកកម្ពស់អក្ខរកម្ម និងបណ្ណាល័យ អាហារូបត្ថម្ភ និងសុខភាព ក្នុងសាលារៀនការ កសាងសមត្ថភាពមន្ត្រីអប់រំ និងគ្រូបង្រៀន។

​ឯកឧត្តមបណ្ឌិតសភាចារ្យ ហង់ជួន ណារ៉ុន បានកោតសរសើរ និងវាយតម្លៃខ្ពស់ ចំពោះកិច្ចសហប្រតិបត្តិការជាមួយអង្គការ អេហ្វ អេក កម្ពុជា ដែលបានបង្កើតសមិទ្ធផល និងវឌ្ឍនភាពជាច្រើន ចូលរួមចំណែកយ៉ាងសំខាន់ដល់ការលើកកម្ពស់វិស័យអប់រំនៅកម្ពុជា ជាពិសេសការកាត់បន្ថយអត្រាបោះបង់ការសិក្សា និងជំរុញបាននូវកំណើនអត្រាចុះ ឈ្មោះចូលរៀននៅគ្រប់កម្រិត សម្រាប់កុមារនៅក្នុងតំបន់ដាច់ស្រយាលក្នុងខេត្តគោលដៅ ដែលធ្វើឱ្យ អេហ្វ អេក កម្ពុជា ក្លាយជាដៃគូយុទ្ធសាស្ត្រមួយដែលតែងតែផ្តល់ការគាំទ្រភ្លាមៗដល់ក្រសួង អប់រំ យុវជន និងកីឡា ឆ្ពោះទៅសម្រេចនូវចក្ខុវិស័យផ្តល់ការអប់រំប្រកបដោយគុណភាព សមធម៌ និងបរិយាបន្ន៕ 

ដោយ៖ ចាន់ សុភឿន (ប្រភព៖ ក្រសួងអប់រំ)