AKP ភ្នំពេញ ថ្ងៃទី១៧ ខែមីនា ឆ្នាំ២០២៦--លោក ជា ពៅ អគ្គលេខាធិការរង សហព័ន្ធកីឡាវាយកូនបាល់កម្ពុជា និងជានាយករៀបចំការប្រកួតកីឡាវាយកូនបាល់ ជ្រើសរើសជើងឯកថ្នាក់ជាតិ ប្រចាំឆ្នាំ២០២៥បានបង្ហាញក្តីរីករាយ ដោយបានឃើញកីឡាករ កីឡាការិនីនានា ជាពិសេសថ្នាលយុវជនវ័យក្រោម១៣-១៤ឆ្នាំមានសន្ទុះបច្ចេកទេសខ្ពស់ៗគួរឱ្យកត់សម្គាល់ ក្រោយឆ្លងកាត់ការប្រកួតអន្តរជាតិ២ព្រឹត្តិការណ៍កន្លងមក។

ការគូសបញ្ជាក់របស់លោក ជា ពៅ បានធ្វើឡើងនៅក្នុងឱកាសរៀបចំការប្រកួតកីឡាវាយកូនបាល់ ជ្រើសរើសជើងឯកថ្នាក់ជាតិ ប្រចាំឆ្នាំ២០២៥ ដែលកំពុងដំណើរការពីថ្ងៃទី១៦-១៩ ខែមីនា ឆ្នាំ២០២៦ នៅពហុកីឡដ្ឋានជាតិអូឡាំពិក។

លោក ជា ពៅ កត់សម្គាល់ថា ការប្រកួតកីឡាវាយកូនបាល់ ជ្រើសរើសជើងឯកថ្នាក់ជាតិនេះកំពុងដំណើរការស្វែងរកធនធានឆ្នើមៗ ក្រោមការរៀបចំរបស់សហព័ន្ធ និងទទួលបានការឧបត្ថម្ភគាំទ្រនូវកញ្ចប់ថវិកាពន្លឿនផែនការអភិវឌ្ឍន៍ពីក្រសួងអប់រំ យុវជន និងកីឡា។ ការប្រកួតមាន៥វិញ្ញាសា គឺវិញ្ញាសាឯកត្តជនបុរស ឯកត្តជននារី វាយគូបុរស វាយក្រោម១៨ឆ្នាំ និងវាយគូចម្រុះបុរស-នារី។ តាមរយៈការប្រកួតប្រចាំឆ្នាំនេះ សហព័ន្ធនឹងសម្រិតសម្រាំងបានម្ចាស់ជ័យលាភីលើវិញ្ញាសាទាំងអស់ ជាពិសេសយើងរំពឹងខ្ពស់ថានឹងរកឃើញធនធានវ័យក្មេងឆ្នើមៗក្នុងចន្លោះ១៣-១៤ឆ្នាំ ដោយលោកសំឡឹងឃើញគុណភាពបច្ចេកទេសរបស់កីឡាករ កីឡាការិនីមានសន្ទុះកើនឡើងខ្ពស់គួរឱ្យកត់សម្គាល់។

អ្វីជាការកត់សម្គាល់របស់នាយករៀបចំរូបនេះ គឺលោកឃើញពីការឆ្លងកាត់បទពិសោធន៍ មុនឈានចូលដល់ការប្រកួតកម្រិតខ្ពស់បំផុតរបស់ថ្នាក់ជាតិមួយនេះ ដោយអត្តពលិកវ័យក្មេងមួយចំនួននោះបានឆ្លងកាត់ការប្រកួតកម្រិតអន្តរជាតិ២ព្រឹត្តិការណ៍ ដូចជាការប្រកួតវាយកូនបាល់អន្តរជាតិប្រចាំតំបន់ អាយុក្រោម១៤ឆ្នាំ កាលពីខែកុម្ភៈ ឆ្នាំ២០២៦ ដែលកម្ពុជាធ្វើម្ចាស់ផ្ទះ ថ្មីៗកន្លងទៅនោះ និង១ទៀត គឺការប្រកួតកីឡាវាយកូនបាល់អន្តរជាតិក្រោមអាយុ១៤ឆ្នាំ នៅប្រទេសវៀតណាម កន្លងទៅ។ ជាក់ស្តែង ការប្រកួតថ្នាក់ជាតិឆ្នាំនេះ យើងឃើញថា គុណភាពបច្ចេកទេសរបស់ធនធានកីឡាករ កីឡាការិនីវ័យក្មេងក្រោម១៤ឆ្នាំមានសន្ទុះកើនឡើងល្អគួរឱ្យកត់សម្គាល់តែម្តង។

លោក ជា ពៅ បន្ថែមថា ជាគោលដៅបន្ទាប់ ក្រោយបញ្ចប់ការប្រកួតជើងឯកថ្នាក់ជាតិនេះទៅ សហព័ន្ធមានផែនការបន្តជំរុញការហ្វឹកហាត់បន្ថែមដល់ធនធានកីឡាករ កីឡាការិនី ត្រៀមឆ្ពោះទៅចូលរួមប្រកួតកម្រិតអន្តរជាតិនានា នាពេលបន្តបន្ទាប់ទៀត។ លោក ជា ពៅ ពន្យល់ថា ជាធម្មតា យើងផ្តោតលើការហ្វឹកហាត់៥០% និងត្រូវបន្តជំរុញឱ្យពួកគាត់ចូលរួមប្រកួតអន្តរជាតិ ៥០%ទៀត ដើម្បីដុសខាត់គុណភាពបច្ចេកទេសឱ្យកាន់តែមុតស្រួចបន្ថែមទៀត ដោយមិនផ្តោតតែលើការហ្វឹកហាត់ ១០០% តែម្តងនោះទេ។

គួរបញ្ជាក់ថា ការប្រកួតជើងឯកថ្នាក់ជាតិឆ្នាំនេះមានការចូលរួមពីកីឡាករ កីឡាការិនីសរុប ៦០នាក់ ក្នុងនោះកីឡាការិនី ៨ នាក់ កីឡាករ ៥២នាក់ និងប្រតិភូ ១៨នាក់មក ៩សមាគម-ក្លឹប ដោយចំនួននេះប្រហាក់ប្រហែលនឹងឆ្នាំមុនដែរ។ ការប្រកួតជ្រើសរើសជើងឯកថ្នាក់ជាតិនេះ មាន ៥វិញ្ញាសា រួមមាន៖ ការប្រកួត វាយឯកត្តជន បុរស ការប្រកួត វាយឯកត្តជន នារី ការប្រកួត វាយគូបុរស និងការប្រកួត យុវជនអាយុក្រោម១៨ឆ្នាំ ក្រោមការប្រើប្រាស់ថវិកាគាំទ្រប្រចាំឆ្នាំ២០២៥ របស់ក្រសួងអប់រំ យុវជន និងកីឡា៕

ដោយ ហេង ណាលីន