AKP ភ្នំពេញ ថ្ងៃទី១៧ ខែមីនា ឆ្នាំ២០២៦-- ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារអភិវឌ្ឍន៍វិស័យឯកជន កាលពីថ្ងៃទី១៦ ខែ មីនា ឆ្នាំ ២០២៦ បានអនុញ្ញាតឱ្យគណៈប្រតិភូសមាគមស៊ីម៉ង់ត៍កម្ពុជា ដែលដឹកនាំដោយអ្នកឧកញ៉ា វិញ ហួរ ប្រធានក្រុមប្រឹក្សាភិបាល ចូលជួបសម្តែងការគួរសម និងជម្រាបជូនអំពីស្ថានភាពនៃឧស្សាហកម្មផលិតស៊ីម៉ង់ត៍នៅកម្ពុជា។

ជាកិច្ចចាប់ផ្តើម  អ្នកឧកញ៉ា វិញ ហួរ ប្រធានក្រុមប្រឹក្សាភិបាល បានគូសរំលេចអំពីស្ថានភាពនៃវិស័យផលិតស៊ីម៉ង់ត៍នៅព្រះរាជាណាចក្រកម្ពុជា ដែលរួមមានទំហំទុនវិនិយោគ សមត្ថភាពផលិត និងផ្គត់ផ្គង់របស់សហគ្រាសក្នុងស្រុក និងនិន្នាការនៃតម្រូវការក្នុងការប្រើប្រាស់ស៊ីម៉ង់ត៍សម្រាប់ផ្គត់ផ្គង់ដល់ការសាងសង់អគារ ផ្ទះសម្បែង ហេដ្ឋារចនាសម្ព័ន្ធផ្លូវ ថ្នល់ជាដើមនៅក្នុងប្រទេសកម្ពុជា ។

បន្ទាប់ពីបានស្វែងយល់អំពីស្ថានភាពនៃវិស័យផលិតស៊ីម៉ង់ត៍នៅកម្ពុជា ឯកឧត្តមបណ្ឌិតសភាចារ្យ បានលើកឡើងអំពីគោលជំហររបស់រាជរដ្ឋាភិបាលក្នុងការជំរុញការអភិវឌ្ឍវិស័យផលិតស៊ីម៉ង់ត៍កម្ពុជាតាមរយៈយន្តការលើកទឹកចិត្តផ្សេងៗ។ ជាមួយគ្នានេះ ឯកឧត្តមបណ្ឌិតសភាចារ្យ បានវាយតម្លៃខ្ពស់ចំពោះការចូលរួមចំណែកក្នុងការអភិវឌ្ឍសង្គម-សេដ្ឋកិច្ចជាតិរបស់ឧស្សាហកម្មស៊ីម៉ង់ត៍កម្ពុជាតាមរយៈការវិនិយោគ ការបង្កើតការងារ ការបណ្តុះបណ្តាលកម្មករជំនាញ ការបង់ពន្ធជូនរដ្ឋ និងសកម្មភាពសង្គមជាច្រើនទៀត ។ ឯកឧត្តមបណ្ឌិតសភាចារ្យ បានស្នើសមាគមស៊ីម៉ង់ត៍កម្ពុជាឱ្យខិតខំពង្រឹងហេដ្ឋារចនាសម្ព័ន្ធគាំទ្រ និងខ្សែច្រវាក់ផលិតកម្មរបស់ខ្លួនសំដៅជំរុញលទ្ធភាពផលិត និងផ្គត់ផ្គង់ដើម្បីបំពេញតម្រូវការក្នុងស្រុក និងរក្សាឱ្យបាននូវភាពប្រកួតប្រជែងជាមួយនឹងស៊ីម៉ង់ត៍នាំចូល ៕

ដោយ៖ ទូច វលក្ខ័ណ (ប្រភព៖ ក្រសួងសេដ្ឋកិច្ច)