AKP ភ្នំពេញ ថ្ងៃទី១៤ ខែកុម្ភៈ ឆ្នាំ២០២៦ -- ក្រសួងពាណិជ្ជកម្មនឹងដាក់ដំណើរការ “យុទ្ធនាការផលិតផលជាតិ #MadeInCambodia” ដើម្បីលើកកម្ពស់ការប្រើប្រាស់ផលិតផលជាតិ ខណៈដែរនិន្នាការងាកមកគាំទ្រផលិតក្នុងស្រុកពីសំណាក់ប្រជាជនកម្ពុជាមានសន្ទុះកើនឡើងយ៉ាងខ្លាំង។

យោងតាមក្រសួងពាណិជ្ជកម្មបានឱ្យដឹងថា ការរៀបចំពិធីសម្ពោធដាក់ដំណើរការ “យុទ្ធនាការផលិតផលជាតិ #MadeInCambodia” នឹងធ្វើឡើងនៅថ្ងៃទី១៤ ខែកុម្ភៈ ឆ្នាំ២០២៦ ក្រោមអធិបតីភាពលោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម អមដោយថ្នាក់ដឹកនាំក្រសួងពាណិជ្ជកម្ម វិស័យឯកជនពាក់ព័ន្ធ និងប្រជាពលរដ្ឋជាអ្នកប្រើប្រាស់ជាច្រើនរូប។ កម្មវិធីនេះ ប្រព្រឹត្តទៅនៅផ្សារទំនើប Chip Mong 271 Mega Mall នៅជាន់ផ្ទាល់ដី ផ្នែកខាងក្រៅ ជាប់នឹងច្រកទ្វារចូលខាងមុខ។ 

ប្រភពដដែលបានឱ្យដឹងថា យុទ្ធនាការនេះធ្វើឡើងដើម្បីបង្ហាញ និងផ្សព្វផ្សាយឱ្យបានកាន់តែទូលំទូលាយបន្ថែមទៀតនូវភាពសម្បូរបែបនៃផលិតផលជាតិ ជូនដល់អតិថិជន និងអ្នកប្រើប្រាស់ និងធ្វើឱ្យម៉ាកផលិតផលជាតិមានភាពលេចធ្លោ។ បន្ថែមពីនេះ គឺដើម្បីផ្សារភ្ជាប់ទីផ្សារ តាមរយៈការផ្តល់ឱកាសដល់សិប្បកម្មផលិតក្នុងស្រុក ដើម្បីពង្រឹង ទំនាក់ទំនងជាមួយបណ្តាផ្សារទំនើប ម៉ាត និងមីនីម៉ាត និងដើម្បីសិក្សាអំពីតម្រូវការ ទីផ្សារស្តង់ដារ និងនីតិវិធីដើម្បី ដាក់ផលិតផលចូលទៅកាន់ផ្សារទំនើបបាន។

គួរបញ្ជាក់ដែរថា អមជាមួយពិធីសម្ពោធ ក៏នឹងមានការដាក់តាំងលក់ ផលិតផលជាតិចំនួន ២ថ្ងៃ គឺថ្ងៃទី១៤-១៥ ខែកុម្ភៈ ឆ្នាំ២០២៦ នៅបរិវេណជាន់ផ្ទាល់ដី ផ្នែកខាងក្រៅ ជាប់នឹងច្រកទ្វារលខាងមុខ (ទីតាំងសម្ពោធ) ចំនួន ៤២ស្តង់ ដែលអាចអនុញ្ញាតឱ្យសិប្បកម្មក្នុងស្រុកអាចនាំយកទំនិញរបស់ខ្លួនដែលមានអនុលោមភាពនិងចុះបញ្ជី "ច.ប.ផ.” ត្រឹមត្រូវ ប៉ុន្តែនៅមិនទាន់មានឱកាសដាក់លក់នៅតាមបណ្តារផ្សារទំនើបនានាយកមកដាក់តាំងលក់បាន៕

ដោយ៖ ស្រីពេជ្រ