AKP ភ្នំពេញ ថ្ងៃទី១៤ ខែកុម្ភៈ ឆ្នាំ២០២៦ -- ការផ្លាស់ប្តូរខាងផ្នែកបច្ចេកវិទ្យា ជាពិសេសបញ្ញាសិប្បនិម្មិត (AI) នឹងមានផលជះយ៉ាងខ្លាំងលើវិស័យអប់រំ ហើយជំនាញខ្លះនឹងត្រូវបាត់បង់ ជំនាញថ្មីនឹងកើតឡើង។ ដូច្នេះការអប់រំត្រូវតែឆ្លើយតបឱ្យចំគោលដៅ និងទាន់ពេលវេលាទៅលើការរីកចម្រើននៃបច្ចេកវិទ្យាសិប្បនិម្មិតនេះ។ នេះជាការលើកឡើងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ ក្នុងឱកាសនៃពិធីបិទសន្និបាតបូកសរុបការងារអប់រំ យុវជន និងកីឡា ឆ្នាំសិក្សា២០២៤-២០២៥ និងទិសដៅឆ្នាំសិក្សា២០២៥-២០២៦ រយៈពេល ៣ថ្ងៃ លើប្រធានបទ៖ “គន្លងអប់រំថ្មី ដើម្បីអភិវឌ្ឍន៍មូលធនមនុស្សប្រកបដោយបរិយាបន្ន និងភាពធន់" កាលពីរសៀលថ្ងៃទី១៣ ខែកុម្ភៈ ឆ្នាំ២០២៦។

ឯកឧត្តមរដ្ឋមន្ត្រីបានគូសបញ្ជាក់ថា ក្រសួងមានភាពចាំបាច់ក្នុងការជំរុញឱ្យមានការស្រាវជ្រាវកាន់តែច្រើន និងទូលំទូលាយ ដោយប្រើប្រាស់បញ្ញាសិប្បនិម្មិត (AI) ជំរុញការធ្វើនវានុវត្តន៍ការសិក្សាផ្អែកលើលទ្ធផលសិក្សា (Outcome Based Education) និងបង្កើនការប្រឹក្សាយោបល់ដល់សិស្សនៅតាមសហគមន៍អំពីឱកាសសិក្សា ជាពិសេសពាក់ព័ន្ធនឹងជំនាញបច្ចេកទេសផ្សេងៗ។

សូមជម្រាបថា នៅក្នុងវេទិកាពិភាក្សា ស្តីពីការអភិវឌ្ឍមូលធនមនុស្សប្រកបដោយបរិយាបន្ន និងភាពធន់ អង្គពិភាក្សាបានគូសបញ្ជាក់អំពីការអប់រំកុមារតូចៗដើម្បីឆ្ពោះទៅគន្លងអប់រំថ្មី តាមរយៈការអភិវឌ្ឍ និងការលើកកម្ពស់គ្រូបង្រៀនសម្រាប់ការអប់រំកុមារតូចៗ ការពង្រឹងអភិបាលកិច្ចគ្រឹះស្ថានមត្តេយ្យសិក្សាក្នុងភាពជាដៃគូរដ្ឋ និងសហគមន៍ ការពង្រឹងការអនុវត្តស្តង់ដារសាលាមត្តេយ្យសិក្សាគំរូ ការធ្វើនវានុវត្តន៍កម្មវិធីសិក្សាសម្រាប់កុមារតូចៗផ្តោតលើការអប់រំចិត្តសង្គម និងភាពធន់។ ការលើកកម្ពស់លទ្ធផលសិក្សារបស់សិស្សនៅបឋមសិក្សា ត្រូវផ្តោតការយកចិត្តទុកដាក់លើការពង្រឹងអភិបាលកិច្ចសាលារៀន ដោយមានចូលរួមពីមាតាបិតា និងសហគមន៍ ការពង្រឹង និងពង្រីកការអនុវត្តកញ្ចប់សម្ភារអំណាន និងគណិតវិទ្យាថ្នាក់ដំបូង ការគាំទ្រដល់សិស្សរៀនយឺត តាមរយៈការអនុវត្តកម្មវិធីបង្រៀនសម្របតាមសមត្ថភាពសិស្សរៀនយឺត (PTOM) ការលើកកម្ពស់ការអប់រំឌីជីថល តាមរយៈថ្នាលបឋម (PLP) និង Apps ផ្សេងៗទៀត ការពង្រឹង និងការបង្កើនម៉ោងសិក្សា ការជំរុញសកម្មភាពអំណានតាមគ្រប់រូបភាព និងការលើកកម្ពស់សុខភាព និងអាហារូបត្ថម្ភ ដោយផ្តោតលើការលក់ដូរចំណីអាហារតាមសាលារៀន និងការផ្តល់អាហារតាមសាលារៀន។

ស្រដៀងនឹងបឋមសិក្សាដែរ នៅមធ្យមសិក្សាត្រូវចាប់ផ្តើមតម្រង់ទិសសិស្សចាប់ពីថ្នាក់ទី៧ ការបែងចែកគន្លងសិក្សាចាប់ពីថ្នាក់ទី១០ ការផ្តល់ជម្រើសសិក្សាអាស្រ័យតាមសមត្ថភាពសិស្ស និងលទ្ធភាពទទួលបានជំនាញវិជ្ជាជីវៈ ការពង្រីកសាលារៀនជំនាន់ថ្មីដើម្បីបណ្តុះជំនាញសតវត្សទី២១ និងការអប់រំវិទ្យាសាស្ត្រ និងបច្ចេកវិទ្យា។ កិច្ចការទាំងនេះ នឹងគាំទ្រដោយកំណែទម្រង់ការអប់រំគ្រូបង្រៀនដែលគ្រប់ជ្រុងជ្រោយ និងដោះស្រាយបាននូវបញ្ហាប្រឈមនាពេលបច្ចុប្បន្ន៕

ដោយ៖ ចាន់ សុភឿន