AKP ភ្នំពេញ ថ្ងៃទី១១ ខែកុម្ភៈ ឆ្នាំ២០២៦--ក្រុមអត្តពលិកសូហ្វតិន្នីសជម្រើសជាតិកម្ពុជា ដែលឈ្នះមេដាយ៥គ្រឿងពីការប្រកួតកីឡាសូហ្វតិន្នីសជើងឯកយុវជនអាស៊ី លើកទី២ ឆ្នាំ២០២៦ នៅប្រទេសឥណ្ឌាបានវិលត្រឡប់មកដល់មាតុប្រទេសវិញហើយ នៅព្រឹកថ្ងៃទី១១ ខែកុម្ភៈ ឆ្នាំ២០២៦ នៅអាកាសយានដ្ឋានអន្តរជាតិតេជោ ដោយទទួលបានការស្វាគមន៍យ៉ាងកក់ក្តៅពីថ្នាក់ដឹកនាំសហព័ន្ធកីឡាសូហ្វតិន្នីសកម្ពុជា។

ការប្រកួតកីឡាសូហ្វតិន្នីសជើងឯកយុវជនអាស៊ី លើកទី២ ឆ្នាំ២០២៦ (The 2nd Asian Junior Soft Tennis Championship 2026) បានប្រព្រឹត្តទៅពីថ្ងៃទី៣ដល់ថ្ងៃទី៩ ខែកុម្ភៈ ឆ្នាំ២០២៦ ដោយមានប្រទេសចូលរួមសរុបចំនួន៩ រួមមាន៖ កម្ពុជា ចិន ឥណ្ឌូនេស៊ី ជប៉ុន សាធារណរដ្ឋកូរ៉េ ឡាវ ថៃ ម៉ុងហ្គោលី និងម្ចាស់ផ្ទះឥណ្ឌា។ សហព័ន្ធកីឡាសូហ្វតិន្នីសកម្ពុជា បានបញ្ជូនគ្រូបង្វឹកម្នាក់ គឺលោក យី សារិន និងកីឡាករ កីឡាការិនី៦រូប ឱ្យទៅចូលរួម ដោយកម្ពុជាដណ្តើមបានមេដាយសរុប ៥គ្រឿង រួមមាន៖ វិញ្ញាសាវាយឯកត្តជនយុវនារីអាយុក្រោម១៨ឆ្នាំ កីឡាការិនី ឆាន ឈាវហ៊ួយ ដណ្តើមបានមេដាយប្រាក់១គ្រឿង។ វិញ្ញាសាវាយក្រុមចម្រុះបុរស-នារី កីឡាករ យ៉ន ឈុនលាភ ហ៊ីម ដារ៉ាពេជ្រ ទឹម ច័ន្ទកក្កដា កីឡាការិនី ឃន ចន្ទរ៉ូសិកា ឆាន ឈាវហួយ និងឈន ច័ន្ទកញ្ញា ដណ្តើមបានមេដាយប្រាក់១គ្រឿង។ វិញ្ញាសាវាយគូយុវនារីក្រោម២១ឆ្នាំ កីឡាការិនី ឃន ចន្ទរ៉ូសិកា និងកីឡាការិនី ឆាន ឈាវហ៊ួយ ដណ្តើមបានមេដាយសំរឹទ្ធ១គ្រឿង។ វិញ្ញាសាវាយគូយុវនារីអាយុក្រោម១៨ឆ្នាំ កីឡាការិនី ឆាន ឈាវហ៊ួយ និងកីឡាការិនី ឈន ច័ន្ទកញ្ញា ដណ្តើមបានមេដាយសំរឹទ្ធ១គ្រឿង ខណៈវិញ្ញាសាវាយក្រុមនារី ដណ្តើមបានមេដាយសំរឹទ្ធ១គ្រឿង ដោយកីឡាការិនី ឃន ចន្ទរ៉ូសិកា កីឡាការិនី ឆាន ឈាវហួយ និងកីឡាការិនី ឈន ច័ន្ទកញ្ញា។

គួរបញ្ជាក់ថា នេះជាលើកទី២ ដែលក្រុមសូហ្វតិន្នីសកម្ពុជាបានចូលរួមប្រកួតប្រជែង ក្នុងព្រឹត្តិការណ៍ជើងឯកយុវជនអាស៊ី ដោយកាលពីចូលរួមលើកទី១ នៅប្រទេសហ្វីលីពីនជាម្ចាស់ផ្ទះ គឺក្រុមកម្ពុជាធ្លាប់ដណ្តើមបានមេដាយសំរឹទ្ធចំនួន២គ្រឿង។ ការឈ្នះមេដាយរហូត៥គ្រឿង (ប្រាក់២ និងសំរឹទ្ធ៣) នៅឆ្នាំ២០២៦នេះ គឺជាការបំបែកទំព័រប្រវត្តិសាស្រ្តថ្មីរបស់សហព័ន្ធកីឡាសូហ្វតិន្នីសកម្ពុជា ដែលអត្តពលិកអាចប្រជែងបានមេដាយ និងភាគច្រើនអាចឡើងទៅកាន់វគ្គផ្តាច់ព្រ័ត្រ (Final )បានដែលកន្លងមកពុំធ្លាប់ឡើងដល់វគ្គនេះនោះទេ៕

ដោយ ហេង ណាលីន