AKP ភ្នំពេញ ថ្ងៃទី១៩ ខែមករា ឆ្នាំ២០២៦--
លោកជំទាវ ឈឹមពៅ សុកាន់ឌី អគ្គនាយិកា នៃអគ្គនាយកដ្ឋានវិទ្យុជាតិកម្ពុជាបានថ្លែងថា ក្នុងឆ្នាំ២០២៥ ផលិតព័ត៌មាន និងផ្សព្វផ្សាយបានចំនួន ២៦ ៦៥៧ អត្ថបទ និង ២០៤ ប្រធានបទ ក្នុងនោះ ព័ត៌មានជាខេមរភាសាបានចំនួន ១៨ ០៩២ អត្ថបទ, ការផលិតទាំងព័ត៌មានជាភាសាបរទេសបានចំនួនសរុប ៨ ៣៨៤ អត្ថបទ (ភាសាបារាំង-អង់គ្លេស ៤ ៩៧៤អត្ថបទ, ភាសាចិន ១ ៧៨០ អត្ថបទ និង ភាសាវៀតណាម ១ ៦៣០ អត្ថបទ), បទយកការណ៍ បានចំនួន ១៨១ អត្ថបទ និង កម្មវិធីសន្ទនាមតិ-តុមូល បានចំនួន ២០៤ ប្រធានបទ ។ លោកជំទាវបានបញ្ជាក់ថា ក្នុងឆ្នាំ២០២៥កន្លងមក អគ្គនាយកដ្ឋានវិទ្យុជាតិកម្ពុជា (RNK) បានផលិត និង ផ្សព្វផ្សាយព័ត៌មាន ជាខេមរភាសា និង ភាសាបរទេស លើសចំនួនផែនការប្រមាណ ៦,៧៥ភាគរយ។

ថ្លែងក្នុងបទបង្ហាញសន្និបាតបូកសរុបលទ្ធផលការងារឆ្នាំ២០២៥ និង លើកទិសដៅការងារឆ្នាំ២០២៦ របស់ក្រសួងព័ត៌មាន នារសៀលថ្ងៃទី១៩ ខែមករា ឆ្នាំ២០២៦ លោកជំទាវ ឈឹមពៅ សុកាន់ឌី បានបញ្ជាក់ថា បើប្រៀបធៀបទៅនឹងការងារឆ្នាំ២០២៤ មានចំនួន ២៦ ០៤០ អត្ថបទ  អគ្គនាយកដ្ឋានវិទ្យុជាតិកម្ពុជាបានផលិតលើសផែនការចំនួន ១ ៨២១ អត្ថបទ និងប្រធានបទ ឬស្មើនឹង ៦,៧៥ភាគរយ។ លោកជំទាវអគ្គនាយិកាបានលើកឡើងថា សម្រាប់ទិសដៅការងារឆ្នាំ២០២៦ អគ្គនាយកដ្ឋានវិទ្យុជាតិកម្ពុជា នឹងរៀបចំគម្រោងអភិវឌ្ឍន៍វិទ្យុតាមរាជធានី-ខេត្ត បង្កើនការផ្សាយផ្ទាល់កម្មវិធីជាតិ ព្រឹត្តិការណ៍សំខាន់ៗ និងព័ត៌មានប្រឆាំងព័ត៌មានក្លែងក្លាយ ផលិតព័ត៌មានជាតិ-អន្តរជាតិ និងបទយកការណ៍ឱ្យទាន់ពេលវេលា និងគ្រប់ទម្រង់ប្រព័ន្ធផ្សាយ បង្កើនការផលិតវីដេអូ និងមាតិកាឌីជីថលឱ្យមានគុណភាព និងភាពច្នៃប្រឌិត រៀបង្កើនកម្មវិធីសន្ទនាមតិ បទយកការណ៍ និងកម្មវិធីសិល្បៈប្រពៃណី-សម័យ, ផលិតកម្មវិធីសម្រាប់យុវជន “សំឡេងយុវជន” និង “សង្គមឌីជីថល”។ ទន្ទឹមនេះ ពង្រឹងសមត្ថភាពមន្ត្រីផ្នែកព័ត៌មាន និងបច្ចេកទេស IT/Digital, រៀបចំប្រព័ន្ធ Digital & Online Archive សម្រាប់រក្សាទុកកម្មវិធីផ្សាយ, បង្កើត Database គ្រប់គ្រងទិន្នន័យបុគ្គលិកជាទម្រង់ Excel មួយស្តង់ដារ, រៀបចំមន្ត្រីគណនេយ្យចំនួន ១២-១៥ រូប សម្រាប់អង្គភាពថវិកាពេញលេញឆ្នាំ២០២៧ ព្រមទាំងពង្រឹងកិច្ចសហការជាមួយស្ថាប័នជាតិ និងអន្តរជាតិ ជាដើម។
លោកជំទាវអគ្គនាយកដ្ឋានវិទ្យុជាតិកម្ពុជាបានបន្ថែមថា ដើម្បីអនុវត្តន៍ផែនការអភិវឌ្ឍវិស័យព័ត៌មាន ២០២៦-២០២៨ អគ្គនាយកដ្ឋាន ប្តេជ្ញាបន្តអភិវឌ្ឍន៍ស្ថាប័នឱ្យទំនើប ច្នៃប្រឌិត និងមានប្រសិទ្ធភាព ដើម្បីបម្រើប្រជាពលរដ្ឋ និង ប្រទេសជាតិប្រកបដោយចីរភាព៕

ដោយ៖ មករា