AKPកំពង់ធំថ្ងៃទី២៤ខែតុលា ឆ្នាំ២០២៦-- នៅសាលាស្រុកប្រាសាទបល្ល័ង្កនៃរដ្ឋបាលខេត្តកំពង់ធំកាលពីថ្ងៃទី ២៣ខែតុលាឆ្នាំ២០២៦បានរៀបចំវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តកំពង់ធំអាណត្តិទី៤ឆ្នាំ២០២៦ក្រោមអធិបតីភាព ឯកឧត្តម អ៊ឹម សារឿន សមាជិកក្រុមប្រឹក្សាខេត្តនិងឯកឧត្តម នួន ផារ័ត្ន អភិបាលខេត្តកំពង់ធំ ។​

ឯកឧត្តម អ៊ឹម សារឿន បានមានប្រសា សន៍ថា វេទិកាផ្សព្វផ្សាយ និងពិគ្រោះយោបល់គឺជាយន្តការដ៏សំខាន់មួយសម្រាប់ឱ្យអាជ្ញាធរគ្រប់លំដាប់ថ្នាក់បានជួបប្រាស្រ័យទាក់ទងដោយផ្ទាល់ជាមួយប្រជាពលរដ្ឋ ដើម្បីស្តាប់ពីស្ថានភាពជាក់ស្តែង កង្វល់ សំណូមពរ និងបញ្ហាប្រឈមដែលប្រជាពលរដ្ឋកំពុងជួបប្រទះក្នុងជីវភាពរស់នៅប្រចាំ ថ្ងៃជាពិសេសបញ្ហាពាក់ព័ន្ធនឹងការងាររបស់អាជ្ញាធរមូលដ្ឋាន សន្តិសុខ សណ្តា ប់ធ្នាប់សាធារណៈ សុវត្ថិភាពក្នុងការធ្វើដំណើរ ការប្រកបមុខរបរ និងការទទួលបានសេវាសាធារណៈផ្សេងៗ។ បន្ទាប់ពីបានស្តាប់នូវមតិយោបល់និងសំណូមពររបស់ប្រជាពលរដ្ឋរួចមក ឯកឧត្តម នួនផារ័ត្នបានចាត់តាំងតំណាងស្ថាប័ន មន្ទីរ អង្គភាពនិងរដ្ឋបាលមូលដ្ឋានពាក់ព័ន្ធធ្វើការពន្យល់បកស្រាយនិងឆ្លើយតបចំពោះសំណួរ និងសំណូមពររបស់ប្រជាពលរដ្ឋ។ ចំពោះបញ្ហាដែលមិនអាចដោះស្រាយបានភ្លាមៗ ត្រូវបន្តពិនិត្យ សិក្សា និងសម្របសម្រួលជាមួយស្ថាប័នពាក់ព័ន្ធនៅពេលក្រោយ។

ឯកឧត្តមអភិបាលខេត្តបានបញ្ជាក់ថាមតិយោបល់និងសំណូមពរដែលទទួលបាន នឹងក្លាយជាមូលដ្ឋានសម្រាប់ស្ថាប័នពាក់ព័ន្ធពិនិត្យ ពិចារណាកំណត់អាទិភាពក្នុងការដោះស្រាយបញ្ហានិងការរៀបចំផែនការអភិវឌ្ឍន៍ខេត្តកំពង់ធំឱ្យឆ្លើយតបកាន់តែប្រសើរទៅនឹងតម្រូវការរបស់ប្រជាពលរដ្ឋ។ទន្ទឹមនឹងសមិទ្ធផលដែលសម្រេចបាន ឯកឧត្តមអភិបាលខេត្តក៏បានណែនាំ និងជំរុញដល់អាជ្ញាធរស្រុក ឃុំ ព្រមទាំងមន្ទីរ និងអង្គភាពពាក់ព័ន្ធ ឱ្យបន្តយកចិត្តទុកដាក់បន្ថែមទៀតចំពោះបញ្ហាដែលនៅសេស សល់ ដោយត្រូវពិនិត្យ និងដោះស្រាយតាមលំដាប់អាទិភាពនិងតាមសមត្ថកិច្ចរៀងៗខ្លួន។ ជាមួយគ្នានេះ ត្រូវបង្កើនការទទួលខុសត្រូវក្នុងការបម្រើប្រជា ពលរដ្ឋ ពង្រឹងការផ្តល់សេវាសាធារណឱ្យបានល្អប្រសើរ និងធានាថាសំណូមពររបស់ប្រជាពលរដ្ឋត្រូវបានយកចិត្តទុកដាក់ពិនិត្យនិងចាត់វិធានការដោះស្រាយឱ្យបានសមស្រប។

ឯកឧត្តម នួន ផារ័ត្ន អភិបាលខេត្តកំពង់ធំបានអំពាវនាវដល់បងប្អូនប្រជាពលរដ្ឋទាំងអស់ សូមបញ្ឈប់ការកាប់ទន្ទ្រាន ឈូសឆាយនិងចូលកាន់កាប់ដីព្រៃរបស់រដ្ឋដោយខុសច្បាប់។ សូមកុំយកផលប្រយោជន៍ផ្ទាល់ខ្លួនធ្វើឱ្យប៉ះពាល់ដល់ផលប្រយោជន៍រួមរបស់សង្គមជាតិ។ យើងទាំងអស់គ្នាត្រូវចូលរួមការពារដីរដ្ឋព្រៃឈើនិងធនធានធម្មជាតិ ដោយគោរពច្បាប់ និងសហការជាមួយអាជ្ញាធរមានសមត្ថកិច្ចដើម្បីធានាបាននូវការគ្រប់គ្រងធនធានធម្មជាតិប្រកបដោយចីរភាព។

វេទិកាផ្សព្វផ្សាយនេះបានផ្តល់ឱកាសឱ្យប្រជាពលរដ្ឋបានលើកឡើងពីបញ្ហាប្រឈមជាក់ស្តែងសរុបចំនួន២៧ករណី ក្នុងនោះមានសំណួរចំនួន៣ សំណូម ពរ១៥ សំណូមពរនិងសំណួរផ្ទាល់មាត់ចំនួន៩ ដែលពាក់ព័ន្ធជាមួយនឹងរដ្ឋបាលស្រុក អាជ្ញាធរអគ្គិសនី អភិវឌ្ឍន៍ជនបទ សុខាភិបាល កសិកម្ម បរិស្ថាន រដ្ឋបាលឃុំ អធិការស្រុកនិងសុរិយោដី៕

ដោយ៖ ស៊ុម វណ្ណា