AKP កំពង់ធំ ថ្ងៃទី២៤ខែតុលាឆ្នាំ២០២៦-- រដ្ឋបាលស្រុកតាំងគោកបានសហការរៀបចំកម្មវិធីពិនិត្យនិងព្យាបាលជំងឺជូនដល់បងប្អូនប្រជាពលរដ្ឋដោយឥតគិត ថ្លៃនៅក្នុងឃុំទ្រៀល ស្រុកតាំងគោក ខេត្តកំពង់ធំកាលពីថ្ងៃទី២៣ខែតុលាឆ្នាំ២០២៦ក្រោមអធិបតីភាពលោក ហាក់ ម៉ងហួត អភិបាលនៃគណៈអភិបាលស្រុកតាំងគោកព្រមទាំងមានការចូលរួមយ៉ាងសកម្មពីសំណាក់ក្រុមគ្រូពេទ្យជំនាញនិងអាជ្ញាធរដែនដី។

​ការចុះពិនិត្យនិងព្យាបាលជំងឺជូនប្រជាព លរដ្ឋនាពេលនេះ ធ្វើឡើងក្រោមការសម្រ បសម្រួលរវាងរដ្ឋបាលស្រុក និងកញ្ញា ឌីង អេស្ទ័រ (ម្ចាស់ផ្ទះស្នាក់ Home Stay) ដោយមានកិច្ចសហការយ៉ាងជិតស្និទ្ធរវាងក្រុមគ្រូពេទ្យ មុនឌុន មកពីប្រទេសម៉ាឡេស៊ី និងក្រុមគ្រូពេទ្យនៃការិយាល័យស្រុកប្រតិបត្តិបារាយ ណ៍-សន្ទុកនិងដោយមានការចូលរួមឧបត្ថម្ភថ្នាំពេទ្យនិងសម្ភារវេជ្ជសាស្ត្រមួយចំនួនពីសំណាក់សប្បុរសជន ដែលមានមន្ទីរសម្រាកព្យាបាលនានាក្នុងមូលដ្ឋានស្រុកតាមរយៈរដ្ឋបាលស្រុកតាំងគោក ។

​នៅក្នុងឱកាសនោះលោក ហាក់ ម៉ុងហួត បាននាំមកនូវប្រសាសន៍ផ្តាំផ្ញើសួរសុ ខទុក្ខយ៉ាងកក់ក្តៅ និងស្និទ្ធស្នាលបំផុតពីសំណាក់ថ្នាក់ដឹកនាំជាន់ខ្ពស់ ជាពិ សេសសម្តេចមហាបវរធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជា ណាចក្រកម្ពុជានិងឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ ជូនចំពោះបងប្អូនប្រជាពលរដ្ឋទាំងអស់ដែលបានចូលរួម។
លោកអភិបាលស្រុកក៏បានថ្លែងអំណរ គុណយ៉ាងជ្រាលជ្រៅចំពោះ កញ្ញា ឌីងអេស្ទ័រ ដែលជានិច្ចកាលតែងតែចូលរួមយ៉ាងសកម្មជាមួយរដ្ឋបាលស្រុកក្នុងកិច្ចការមនុស្សធម៌ ជាពិសេសលើវិស័យអប់រំ តាមរយៈការកៀរគរសប្បុរសជនដើម្បីសាងសង់អគារសិក្សា អគារបណ្ណាល័យ បន្ទប់ទឹក និងអណ្ដូងទឹកជាដើម។

លោកអភិបាលស្រុកបានសម្តែងនូវក្តីរំភើបនិងកោតសរសើរចំពោះទឹកចិត្តមនុស្សធម៌របស់ក្រុមគ្រូពេទ្យស្ម័គ្រចិត្តប្រទេសម៉ាឡេស៊ីនិងក្រុមគ្រូពេទ្យក្នុងស្រុកដែលបានលះបង់ពេលវេលានិងកម្លាំងកាយចិត្ត មកចូលរួមចំណែកយ៉ាងសំខាន់ក្នុងការលើកកម្ពស់សុខុមាលភាព និងបំពេញបន្ថែមលើវិស័យសុខាភិបាលជូនប្រជាពលរដ្ឋក្នុងមូលដ្ឋាន។

​លោកហាក់ ម៉ងហួតអភិបាលស្រុកតាំងគោកបានគូសបញ្ជាក់អំពីការយកចិត្តទុកដាក់ខ្ពស់របស់រាជរដ្ឋា ភិបាលចំពោះប្រជាពលរដ្ឋដែលមានប័ណ្ណក្រីក្រក្នុងការទទួលបានសេវាពិនិត្យនិងព្យាបាលជំងឺដោយឥតគិតថ្លៃ ប្រកបដោយគុណភាពនិងការយកចិត្តទុកដាក់ពីសំណាក់គ្រូពេទ្យជំនាញនិងបានជម្រាបជូនប្រជាពលរដ្ឋអំពី ស្ថានការណ៍បច្ចុប្បន្ន÷ស្ថានភាពព្រំដែន ការធានាសន្តិសុខនិងស្ថិរភាពតាមបណ្តោយព្រំដែន។ បញ្ហាសេដ្ឋកិច្ច និងទំនិញ ការប្រែប្រួលនិងការឡើងថ្លៃនៃទំនិញមួយចំនួននៅលើទីផ្សារ ដែលជាផលប៉ះពាល់កើតចេញពីវិបត្តិសេដ្ឋកិច្ចសកលនិងសង្គ្រាមនៅតាមបណ្តាប្រទេសមួយចំនួនលើពិភពលោក។

​លោកអភិបាលស្រុកបានធ្វើការផ្តាំផ្ញើ និងក្រើនរំលឹកដោយក្តីបារម្ភដល់បងប្អូនប្រជាពលរដ្ឋទាំងអស់ឱ្យយកចិត្តទុកដាក់ខ្ពស់លើការថែរក្សាសុខភាព ដោយត្រូវប្រកាន់ខ្ជាប់នូវអនាម័យក្នុងការរស់នៅជាប្រចាំ និងត្រូវមានការប្រុងប្រយ័ត្នជាពិសេសចំពោះកុមារតូចៗ ស្របពេលដែលបច្ចុប្បន្នកំពុងមានការរីករាលដាលនៃជំងឺផ្តាសាយនិងជំងឺគ្រុ នឈាមនៅក្នុងមូលដ្ឋាន៕

ដោយ៖ ស៊ុម វណ្ណា