AKP តាកែវ ថ្ងៃទី០៥ ខែធ្នូ ឆ្នាំ២០២៥--នៅក្នុងបរិវេណសាលាឃុំញ៉ែងញ៉ង ស្រុកត្រាំកក់ ខេត្តតាកែវ បានរៀបចំពិធីជួបសំណេះសំណាលសាកសួរសុខទុក្ខ និងនាំយកអំណោយមនុស្សធម៌កាកបាទក្រហមកម្ពុជា ចែកជូនគ្រួសារបងប្អូនប្រជាពលរដ្ឋទីទ័លក្រ គ្រួសារងាយរងគ្រោះ និងចាស់ជរាគ្មានទីពឹងចំនួន៣៦គ្រួសារ កាលពីថ្ងៃទី០៤ ខែធ្នូ ឆ្នាំ២០២៥ ក្រោមអធិបតីភាពឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ ព្រមទាំងមានការអញ្ជើញចូលរួមពីអនុប្រធាន និងសមាជិកសាខាកាកបាទក្រហមកម្ពុជាខេត្តតាកែវ ប្រធាន អនុប្រធាន និងសមាជិក អនុសាខាកាកបាទក្រហមកម្ពុជាស្រុកត្រាំកក់ និងបងប្អូនប្រជាពលរដ្ឋចូលរួមជាច្រើនរូបផងដែរ។

មានប្រសាសន៍សំណេះសំណាលក្នុងពិធីនោះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ បានពាំនាំការផ្ដាំផ្ញើសួរសុខទុក្ខពីសំណាក់ឯកឧត្តម ជា វ៉ាន់ដេត ប្រធានកិត្តិយសគណៈកម្មាធិកាសាខាកាកបាទក្រហមកម្ពុជាខេត្តតាកែវ។ ជាពិសេសពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្ដេចតែងតែយកចិត្តទុកដាក់គិតគូរខ្ពស់អំពីសុខទុក្ខរបស់បងប្អូនប្រជាពលរដ្ឋ ដែលរងគ្រោះនិងងាយរងគ្រោះ គ្រប់ប្រភេទនៅគ្រប់ទីកន្លែង។ ដោយមិនប្រកាន់និន្នាការ ពូជសាសន៍ សាសនាអ្វីឡើយ ដូចពាក្យស្លោក "ទីណាមានការលំបាក ទីនោះមានកាកបាទក្រហមកម្ពុជា"។

ឯកឧត្តម វ៉ី សំណាង បានមានប្រសាសន៍បន្តថា ឱ្យតែបងប្អូនជួបការលំបាក កាកបាទក្រហមកម្ពុជា តែងតែចុះយកអំណោយចែកជូនបងប្អូនភ្លាមៗ ដោយមិនទុកឱ្យបងប្អូនមានជីវភាពខ្វះខាត កាន់តែធ្ងន់ធ្ងរជាងនេះទៀតនោះទេ។ ពោលគឺត្រូវជួយដោះទុក្ខលំបាករបស់បងប្អូនឱ្យបានទាន់ពេលវេលា ដោយធ្វើយ៉ាងណាឱ្យបងប្អូនប្រជាពលរដ្ឋ ដែលជួបប្រទះការលំបាកខ្វះខាត ឱ្យមានជីវភាពរស់នៅបានសមរម្យហូបចុកគ្រប់គ្រាន់។

ឯកឧត្តមបានមានប្រសាសន៍បន្ថែមថា បច្ចុប្បន្ននេះក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ធ្វើឱ្យប្រទេសជាតិមានសុខសន្តិភាព មានការអភិវឌ្ឍនិងរីកចម្រើនលើគ្រប់វិស័យ បានទាក់ទាញបណ្ដាអ្នកវិនិយោគ ក្រុមហ៊ុនធំៗបានមកបណ្ដាក់ទុនរកស៊ីនៅកម្ពុជាកាន់តែច្រើន ដែលបានបង្កើតឱកាសការងារជូនប្រជាពលរដ្ឋក្នុងមូលដ្ឋានឱ្យមានការងារធ្វើ ដើម្បីបង្កើនសេដ្ឋកិច្ចក្នុងគ្រួសារ ពិសេសចូលរួមកាត់បន្ថយភាពក្រីក្រ និងចំណាកស្រុករបស់បងប្អូនប្រជាពលរដ្ឋផងដែរ។

អំណោយដែលបានចែកជូនបងប្អូនប្រជាពលរដ្ឋទីទ័លក្រ ទាំង៣៦គ្រួសារក្នុងពេលនោះដោយក្នុងមួយគ្រួសារៗទទួលបានអង្ករចំនួន២៥គីឡូក្រាម ត្រីខ១យួរ មី១កេស ប្រេងឆា១លីត្រ នំប្រអប់១ ទឹកត្រី៣ដប ទឹកស៊ីអ៊ីវ៣ដប មុង១ ភួយ១ សារុង១ ក្រមា១ កន្ទេល១ និងថវិកា៥ម៉ឺនរៀល៕

ដោយ អ៊ុច សៀង