AKP បន្ទាយមានជ័យ ថ្ងៃទី០៥ ខែធ្នូ ឆ្នាំ២០២៥--លោក យឹម សំណាង អភិបាលរងខេត្តបន្ទាយមានជ័យ បានលើកឡើង និងជំរុញយ៉ាងទទូចទៅកាន់គ្រប់ភាគីពាក់ព័ន្ធទាំងអស់ ចាំបាច់ត្រូវតែរួមសាមគ្គីគ្នា និងយកចិត្តទុកដាក់ខ្ពស់បំផុតក្នុងការចូលរួមប្រយុទ្ធប្រឆាំងអំពើហិង្សាផ្អែកលើយេនឌ័រ ឱ្យបានគ្រប់ជ្រុងជ្រោយ ជាពិសេសនៅតាមបណ្តាទីតាំងការងារនានា។ ការថ្លែងជំរុញយ៉ាងដូច្នេះធ្វើឡើងក្នុងឱកាសលោកអញ្ជើញបើកយុទ្ធនាការ ១៦ថ្ងៃ ប្រយុទ្ធប្រឆាំងអំពើហិង្សាផ្អែកលើយេនឌ័រ នៅកន្លែងការងារ ក្រោមប្រធានបទដ៏សំខាន់ "រួមគ្នាលើកកម្ពស់សុវត្ថិភាព និងគោរពសិទ្ធិគ្នានៅកន្លែងការងារ" កាលពីព្រឹកថ្ងៃទី០៤ ខែធ្នូ ឆ្នាំ២០២៥ នៅសាលប្រជុំមន្ទីរការងារ និងបណ្តុះបណ្តាលវិជ្ជាជីវៈខេត្ត ដែលស្ថិតនៅភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ដោយមានការចូលរួមពីមន្ត្រីរាជការ និងអ្នកពាក់ព័ន្ធជាច្រើនរូបទៀត។

លោក យឹម សំណាង បានសង្កត់ធ្ងន់ថា ការលុបបំបាត់អំពើហិង្សាគឺជាកិច្ចការរួមរបស់យើងទាំងអស់គ្នា ដើម្បីធានាបាននូវបរិយាកាសការងារប្រកបដោយសុវត្ថិភាព ការគោរព និងភាពថ្លៃថ្នូរ សម្រាប់កម្មករនិយោជិតគ្រប់រូប ដោយមិនប្រកាន់ភេទ។ ការគោរពសិទ្ធិគ្នានៅកន្លែងការងារគឺជាគន្លឹះដ៏សំខាន់ដែលជួយជំរុញដល់ផលិតភាពការងារ ក៏ដូចជាការអភិវឌ្ឍសេដ្ឋកិច្ចសង្គមជាតិទាំងមូល។

ជាមួយគ្នានេះ លោក នួន ស៊ីណា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តបន្ទាយមានជ័យ បានសម្តែងនូវចំណាប់អារម្មណ៍យ៉ាងជ្រាលជ្រៅ និងបានបញ្ជាក់ពីការប្ដេជ្ញាចិត្តរបស់មន្ទីរក្នុងការអនុវត្តយុទ្ធនាការនេះឱ្យទទួលបានជោគជ័យ។ យុទ្ធនាការ ១៦ថ្ងៃនេះ គឺជាឱកាសដ៏ល្អមួយដើម្បីផ្សព្វផ្សាយ និងអប់រំ អំពីផលប៉ះពាល់អវិជ្ជមាននៃអំពើហិង្សាផ្អែកលើយេនឌ័រ។

លោកបានជំរុញឱ្យម្ចាស់សហគ្រាស គ្រឹះស្ថាន និងកម្មករនិយោជិតទាំងអស់ ត្រូវផ្លាស់ប្តូរផ្នត់គំនិត និងបង្កើតវប្បធម៌ការងារ ដែលប្រកបដោយការអធ្យាស្រ័យ ការយោគយល់ និងការគោរពសិទ្ធិមនុស្សជាមូលដ្ឋាន។ មន្ទីរការងារនឹងបន្តសហការយ៉ាងជិតស្និទ្ធជាមួយអាជ្ញាធរ និងដៃគូពាក់ព័ន្ធ ដើម្បីពង្រឹងការអនុវត្តច្បាប់ និងយន្តការដោះស្រាយបណ្ដឹង ទាក់ទងនឹងបញ្ហាអំពើហិង្សានៅកន្លែងការងារ។

យុទ្ធនាការនេះត្រូវបានគេរំពឹងទុកថានឹងជួយលើកកម្ពស់ការយល់ដឹងជាសាធារណៈ ក៏ដូចជាជំរុញឱ្យមានសកម្មភាពជាក់ស្តែងនានា ដើម្បីបង្កើតបរិយាកាសការងារមួយដែល គ្មានអំពើហិង្សា និងមានសមភាពយេនឌ័រ៕

ដោយ ឈុន សារ៉ាត