AKP ភ្នំពេញ ថ្ងៃទី០៥ ខែធ្នូ ឆ្នាំ២០២៥-- ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានវាយតម្លៃខ្ពស់ចំពោះវគ្គបណ្ដុះបណ្ដាលស្តីពីការពង្រឹងសមត្ថភាពមន្ត្រីលើការងារនីតិកម្មក្នុងវិស័យទេសចរណ៍ ដែលបានរៀបចំឡើងដើម្បីផ្ដល់នូវពុទ្ធិថ្មីៗ និងបង្កើនសមត្ថភាពរបស់មន្ត្រីរាជការក្រសួងទេសចរណ៍ ទាំងនៅថ្នាក់ក្រសួង និងថ្នាក់មន្ទីរទេសចរណ៍រាជធានី/ខេត្តអំពីមូលដ្ឋានគ្រឹះក្នុងការតាក់តែងច្បាប់ និងលិខិតបទដ្ឋានគតិយុត្តដែលប្រើប្រាស់ក្នុងវិស័យទេសចរណ៍ឱ្យមានឯកភាព អនុលោមភាព សង្គតិភាព និងរក្សាបាននូវសុវត្ថិភាពគតិយុត្តនៃលិខិតបទដ្ឋានគតិយុត្តទាំងទម្រង់ និងខ្លឹមសារ ដើម្បីរួមចំណែកដល់ការពង្រឹងនីតិរដ្ឋ ការគ្រប់គ្រង និងការអភិវឌ្ឍវិស័យទេសចរណ៍នៅកម្ពុជាប្រកបដោយភាពធន់ ចីរភាព និងបរិយាបន្ន។

ការវាយតម្លៃរបស់រដ្ឋមន្ត្រីក្រសួងទេសចរណ៍ដូចខាងលើនេះធ្វើឡើងក្នុងពិធីបិទវគ្គបណ្ដុះបណ្ដាលស្តីពីការពង្រឹងសមត្ថភាពមន្ត្រីលើការងារនីតិកម្មក្នុងវិស័យទេសចរណ៍ នាថ្ងៃទី០៤ ខែធ្នូ ឆ្នាំ២០២៥ ដោយឯកឧត្តមរដ្ឋមន្ត្រីបានគូសបញ្ជាក់ថា ការវាយតម្លៃលើផលប៉ះពាល់នៃលិខិតបទដ្ឋានគតិយុត្ត ឬហៅកាត់ថា RIA (រៀរ) នេះជាវិធីសាស្ត្រនៃដំណើរការជាប្រព័ន្ធ និងការវិភាគបែបវិទ្យាសាស្ត្រពិត ដោយផ្អែកលើភស្ដុតាងដែលរាជរដ្ឋាភិបាលប្រើប្រាស់ ដើម្បីវាយតម្លៃផលប៉ះពាល់ដែលអាចកើតចេញពីសេចក្ដីព្រាងច្បាប់ លិខិតបទដ្ឋានគតិយុត្តផ្សេងទៀត ឬគោលនយោបាយនានា ដែលត្រូវបានស្នើឡើងមុនពេលត្រូវបានអនុម័ត។

ឯកឧត្តមរដ្ឋមន្ត្រីបានបន្ថែមថា វិធីសាស្ត្រ RIA (រៀរ) ត្រូវបានប្រើប្រាស់ដើម្បីកំណត់បញ្ហា កំណត់គោលបំណងច្បាស់លាស់ ការស្នើជាជម្រើសបទប្បញ្ញតិ្ត និងមិនមែនបទប្បញ្ញតិ្ត ព្រមទាំងការវិភាគបន្ទុកចំណាយ អត្ថប្រយោជន៍ និងហានិភ័យនៃជម្រើសនីមួយៗ ដែលបានលើកឡើងផងដែរ ដែលជាការពិតវិធីសាស្ត្រនេះ គឺជាយន្តការប្រទាក់ក្រឡាមួយ ដែលនឹងធានាឱ្យមានការចូលរួមអនុវត្តតាមអភិក្រម «ជវភាពនៃប្រព័ន្ធតួអង្គតែមួយ» ព្រោះការអនុវត្ត RIA (រៀរ) តម្រូវឱ្យមានការចូលរួមពិគ្រោះយោបល់ ពិភាក្សាពីគ្រប់ភាគីពាក់ព័ន្ធប្រកបដោយតម្លាភាព ដើម្បីធានាបាននូវការសម្រេចដាក់ចេញនូវគោលនយោបាយ ឬលិខិតបទដ្ឋានគតិយុត្តមួយដែលមានភាពច្បាស់លាស់ គ្រប់ជ្រុងជ្រោយ មានតុល្យភាព ប្រសិទ្ធភាព ស័ក្ដិភាព កាត់បន្ថយបន្ទុកចំណាយ និងកសាងបាននូវទំនុកចិត្តពីគ្រប់មជ្ឈដ្ឋាន សាធារណជន ធុរជន វិនិយោគិន និងដៃគូអភិវឌ្ឍន៍នានា៕

ដោយ៖ ចាន់ សុភឿន (ប្រភព៖ ក្រសួងទេសចរណ៍)