AKP ភ្នំពេញ ថ្ងៃទី០៥ ខែធ្នូ ឆ្នាំ២០២៥--គ្រូបង្វឹក មន្ត្រីបច្ចេកទេស កីឡាករ កីឡារិនីពិការកម្ពុជាសរុបចំនួន៣៧នាក់លើ៤ប្រភេទកីឡាទទួលបានការណែនាំ និងលើកទឹកចិត្តថ្នាក់ដឹកនាំគណៈកម្មាធិការជាតិប៉ារ៉ាឡាំពិកកម្ពុជា មុនចាកចេញមាតុប្រទេសទៅបំពេញបេសកកម្មចូលរួមប្រកួតកីឡាយុវជនអាស៊ីប៉ារ៉ាហ្គេម លើកទី៥ នៅទីក្រុងដូបៃ ប្រទេសអារ៉ាប់រួម ពីថ្ងៃទី០៧-១៤ ខែធ្នូ ឆ្នាំ២០២៥។

នៅក្នុងពិធីសំណេះសំណាល កាលពីថ្ងៃទី០៤ ខែធ្នូ ឆ្នាំ២០២៥ នៅទីស្នាក់ការគណៈកម្មាធិការជាតិប៉ារ៉ាឡាំពិកកម្ពុជា ឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជា ទទួលបន្ទុកនាយបេសកកម្ម សម្រាប់កីឡាយុវជនអាស៊ីប៉ារ៉ាហ្គេម ឆ្នាំ២០២៥ មានប្រសាសន៍ថា នេះជាពិធីសំណេះសំណាល ដោយឯកឧត្តមបាននាំយកនូវពាក្យពេជន៍ផ្តាំផ្ញើ និងថវិកាលើកទឹកចិត្តរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាធ្វើយ៉ាងណាឱ្យប្រតិភូគ្រូបង្វឹក មន្ត្រីបច្ចេកទេស កីឡាករ កីឡាការិនីពិការកម្ពុជាត្រូវរក្សាឱ្យបាននូវវិន័យ ក្រមសីលធម៌ គោរពបទបញ្ជាការប្រកួតឱ្យបានល្អ ដើម្បីរក្សាឱ្យបានជាដាច់ខាតនូវកិត្តិយស សេចក្តីថ្លៃថ្នូររបស់ជាតិ។

ជាមួយគ្នានេះ ឯកឧត្តម យី វាសនា ក៏ជំរុញឱ្យកីឡាករ កីឡាការិនីពិការកម្ពុជាទាំង៤ប្រភេទកីឡាត្រូវប្រឹងប្រែងប្រកួតឱ្យអស់ពីសមត្ថភាព ដើម្បីដណ្តើមលទ្ធផលល្អជូនជាតិមាតុភូមិ។ ឯកឧត្តមគូសបញ្ជាក់ថា វិស័យកីឡាប៉ារ៉ាឡាំពិកកម្ពុជាកំពុងរីកចម្រើនជាលំដាប់ជាមួយនឹងក្តីរំពឹងថា កម្ពុជានឹងអាចដណ្តើមបានមេដាយជូនជាតិជាក់ជាមិនខាន។

បន្ថែមពីលើនេះ នាយកបេសកកកម្មតំណាងឱ្យគ្រូបង្វឹក មន្ត្រីបច្ចេកទេស កីឡាករ កីឡាការិនីមានពិការភាពកម្ពុជាទាំងអស់បានបង្ហាញការដឹងគុណចំពោះប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត និងជាប្រធានគណៈកម្មាធិការជាតិប៉ារ៉ាឡាំពិកកម្ពុជា ដែលតែងតែបានយកចិត្តទុកដាក់ខ្ពស់ចំពោះសុខទុក្ខរបស់អត្តពលិកពិការកម្ពុជា និងតែងតែបញ្ជូនអត្តពលិកចូលរួមប្រកួតក្នុងព្រឹត្តិការណ៍កីឡាជនពិការអន្តរជាតិ នានាជាបន្តបន្ទាប់។ ឯកឧត្តមក៏ថ្លែងអំណរគុណដល់ក្រសួងអប់រំ យុវជន និងកីឡា និងគណៈកម្មាការជាតិអូឡាំពិកកម្ពុជា ដែលតែងតែជួយឧបត្ថម្ភគាំទ្រទាំងស្មារតី សម្ភារ ក្នុងដំណើរបេសកកម្មចូលរួមប្រកួតក្នុងព្រឹត្តិការណ៍កីឡាយុវជនអាស៊ីប៉ារ៉ាហ្គេម ឆ្នាំ២០២៥ នៅប្រទេសអារ៉ាប់រួមនេះ។

គួរបញ្ជាក់ថា ប្រភេទកីឡាមានពិការភាពរបស់កម្ពុជាចំនួន៤ត្រៀមចូលរួមប្រកួតកីឡាយុវជនអាស៊ីប៉ារ៉ាហ្គេម នៅប្រទេសអារ៉ាប់រួម ឆ្នាំ២០២៥ មានដូចជាប្រភេទកីឡាអត្តពលកម្ម ១៧នាក់ ក្នុងនោះគ្រូបង្វឹក៤នាក់ កីឡាករ១០នាក់ និងកីឡាការិនី៣នាក់, កីឡាហែលទឹក មានគ្រូបង្វឹក ២នាក់ កីឡាករម្នាក់ និងកីឡាការិនី៤នាក់, បាល់បោះពិការភ្នែក មានគ្រូបង្វឹកម្នាក់ និងកីឡាករ៥នាក់ ខណៈប្រភេទកីឡាវាយសីម្នាក និងកីឡាករម្នាក់ រួមមានទាំងមន្ត្រីគ្រប់គ្រងរដ្ឋបាល គ្រូពេទ្យព្យាបាលដោយចលនា ព្រមទាំងមន្ត្រីបច្ចេកទេសផងដែរ៕

ដោយ ហេង ណាលីន