AKP ភ្នំពេញ ថ្ងៃទី០៥ ខែធ្នូ ឆ្នាំ២០២៥--ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡាបានជំរុញឱ្យរៀបចំផែនការសកម្មភាព ដើម្បីអនុវត្តគោលនយោបាយជាតិស្តីពីការអភិវឌ្ឍ វិស័យអប់រំកាយ និងកីឡា និងបន្តពង្រឹងការកែទម្រង់ការប្រកួតកីឡាជាតិគ្រប់កម្រិត ទាំងកីឡាមហាជន កីឡាសិស្ស និងកីឡានិស្សិតឱ្យស្របតាមបរិបទតំបន់។

នេះជាការផ្តល់អនុសាសន៍១ក្នុងចំណោមអនុសាសន៍សំខាន់ៗរបស់ឯកឧត្តមរដ្ឋមន្ត្រី ក្នុងឱកាសបិទសិក្ខាសាលាបូកសរុបការងារអនុវិស័យអប់រំកាយ និងកីឡា ឆ្នាំសិក្សា២០២៤-២០២៥ និងលើកទិសដៅឆ្នាំសិក្សា២០២៥-២០២៦ កាលពីល្ងាចថ្ងៃទី០៤ ខែធ្នូ ឆ្នាំ២០២៥ នៅភោជនីយដ្ឋានទន្លេបាសាក់ រាជធានីភ្នំពេញ។

អនុសាសន៍បន្ថែមរបស់ឯកឧត្តមបណ្ឌិតសភាចារ្យ ហង់ជួន ណារ៉ុន រួមមាន៖ សិក្សា តាមដានអំពីប្រភេទកីឡាដែលមានសក្តានុពលពីបណ្តាប្រទេសអាស៊ាន ដោយផ្តល់អាទិភាពទៅលើប្រភេទ និងវិញ្ញាសាកីឡាទាំងនោះ។ ជំរុញក្នុងការបំពាក់សម្ភារហ្វឹកហាត់គ្រប់ប្រភេទ និងវិញ្ញាសាកីឡាអាទិភាព។ បន្តផ្តល់ថវិកាគាំទ្រដល់សហព័ន្ធកីឡាជាតិដែលមានសក្តានុពល និងសកម្ម។  បំផុស និងលើកកម្ពស់សកម្មភាពកីឡាប្រពៃណី តាមរយៈការបញ្ចូលក្នុងការប្រកួតកីឡាជាតិ និងព្រឹត្តិការណ៍ផ្សេងៗ។ ៦.  បន្តបណ្តុះបណ្តាលកីឡាករថ្នាល និងកីឡាករជម្រើសជាតិដោយមានការតាមដាន និងវាយតម្លៃបច្ចេកទេសឱ្យបានត្រឹមត្រូវ។

បន្តពង្រឹងការអប់រំកាយ និងកីឡាក្នុងសាលារៀនដោយយកចិត្តទុកដាក់លើ ការអនុវត្តម៉ោងអប់រំកាយ និងកីឡា ស្របតាមគោលការណ៍ណែនាំរបស់ក្រសួង។ ពង្រីកការអប់រំកាយ និងកីឡានៅក្រៅសាលារៀន ដោយយកចិត្តទុកដាក់លើការអភិវឌ្ឍទីលានកីឡា ការជំរុញការហាត់ប្រាណ ដើម្បីសុខភាព ការបង្កើតក្លិប និងសមាគមកីឡានៅតាមរាជធានី ខេត្ត។ ស្នើឱ្យក្រុមកាងារនៃកិច្ចប្រជុំនេះ យកធាតុចូលដែលទទួលបានពីរាជធានី ខេត្ត និងសហព័ន្ធកីឡាជាតិដាក់ចូលទៅក្នុងអង្គសន្និបាតអប់រំ យុវជន និងកីឡា នាពេលខាងមុខ។

ជាមួយគ្នានេះ ឯកឧត្តមរដ្ឋមន្ត្រីបានស្នើឱ្យសហព័ន្ធកីឡាជាតិត្រូវពង្រឹងការអនុវត្តការងារទៅតាមកិច្ចសន្យាឱ្យបានត្រឹមត្រូវស្របតាមគោលការណ៍ណែនាំ និងនីតិវិធី ដើម្បីទទួលបានលទ្ធផលតាមការគ្រោងទុក។ ការិយាល័យកីឡារាជធានី-ខេត្តត្រូវពង្រឹងការងារដែលស្ថិតក្រោមដែនសមត្ថកិច្ចរបស់ខ្លួន។ មន្ទីរអប់រំ យុវជន និងកីឡារាជធានី-ខេត្ត ត្រូវពង្រឹង និងពង្រីកសកម្មភាពកីឡាឱ្យបានខ្លាំងក្លា និងត្រូវរៀបចំឱ្យមានកញ្ចប់ថវិកាសម្រាប់សកម្មភាពកីឡា។ កិច្ចការសហប្រតិបត្តិការ និងការទំនាក់ទំនងរវាងមន្ទីរអប់រំ យុវជន និងកីឡារាជធានី ខេត្ត និងសហព័ន្ធកីឡាជាតិជាកត្តាអភិវឌ្ឍវិស័យកីឡា។

ជាមួយគ្នានេះ ឯកឧត្តម ប៉ុន សុខ អគ្គនាយកនៃអគ្គនាយកដ្ឋានកីឡាបានជម្រាបជូនថា ផ្អែកតាមផែនការប្រតិបត្តិប្រចាំឆ្នាំ២០២៥របស់អគ្គនាយកដ្ឋានកីឡា អគ្គនាយកដ្ឋានកីឡារៀបចំសិក្ខាសាលារយៈពេល២ថ្ងៃនេះក្នុងគោលបំណងបូកសរុបសមិទ្ធផល ពិនិត្យ  និងវាយតម្លៃវឌ្ឍនភាពការងារក្នុងអនុវិស័យអប់រំកាយ និងកីឡាក្នុងឆ្នាំ២០២៥  និងលើកទិសដៅអនុវត្តបន្តក្នុងឆ្នាំ២០២៦។ អង្គសិក្ខាសាលានេះគឺជាវេទិការពិភាក្សា និងវិភាគបញ្ហាគន្លឹះលើប្រធានបទធំៗ២ គឺការលើកកម្ពស់សកម្មភាពអប់រំកាយនិងកីឡា ដើម្បីរួមចំណែកបង្កើនគុណភាពអប់រំ និងសុខភាពសាធារណៈ និងការលើកកម្ពស់ការហាត់ហ្វឹកហ្វឺនកីឡាករជម្រើសជាតិ និងថ្នាល ដើម្បីឧត្តមភាពគុណផលកីឡា និងកិត្យានុភាពជាតិ ព្រមជាមួយការចែករំលែកបទពិសោធល្អៗអំពីការលើកកម្ពស់អប់រំកាយក្នុងម៉ោងសិក្សា និងកីឡាក្រៅម៉ោងសិក្សា ដោយមានការចូលរួមពីអង្គភាពជំនាញ និងអង្គការដៃគូពាក់ព័ន្ធ សរុបចំនួន ១៦០ នាក់ ដែលបានចូលរួមមតិយោបល់ កែលម្អ និងដកស្រង់បទពិសោធល្អៗពីគ្នាទៅវិញទៅមក ដើម្បីជាឧត្តមប្រយោជន៍ក្នុងការអនុវត្តការងារឆ្នាំនាឆ្នាំ២០២៦៕

ដោយ ហេង ណាលីន