AKP កណ្តាល ថ្ងៃទី០៥ ខែធ្នូ ឆ្នាំ២០២៥--បញ្ហានានារបស់ប្រជាពលរដ្ឋក្នុងក្រុងតាខ្មៅ ត្រូវបានដោះស្រាយជូនក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកណ្តាល លើកទី២ អាណត្តិទី៤ ឆ្នាំ២០២៥ ក្រោមអធិបតីភាព ឯកឧត្តម នូវប៉េង ច័ន្ទតារា សមាជិកក្រុមប្រឹក្សាខេត្តកណ្ដាល និងលោក ប៊ុន ផេង អភិបាលរងខេត្តកណ្ដាល នាព្រឹកថ្ងៃទី០៤ ខែធ្នូ ឆ្នាំ២០២៥នេះ។

លោក ប៊ុន ផេង អភិបាលរងខេត្ត បានមានប្រសាសន៍ថា ការបើកវេទិកាសាធារណៈនាពេលនេះ គឺដើម្បីចង់ឈ្វេងយល់អំពីសំណូមពរ និងក្តីកង្វល់របស់បងប្អូនប្រជាពលរដ្ឋក្នុងក្រុង ដើម្បីប្រមូលធាតុចូលយកមកអនុវត្តតាមបែបលទ្ធិប្រជាធិបតេយ្យនៅថ្នាក់ក្រោមជាតិ ក្នុងការចូលរួមកែលម្អ អភិវឌ្ឍ ប្រកបដោយប្រសិទ្ធភាព ហើយកែលម្អបន្ថែមនូវចំណុចខ្វះខាត។ 

ជាមួយគ្នានេះដែរ លោកអភិបាលរងខេត្តបានទទួលយកសំណូមពររបស់អ្នកចូលរួមដែលបានស្នើសុំខាងលើ និងដោះស្រាយកង្វល់របស់មូលដ្ឋានដោយបានឱ្យមន្ទីរអង្គភាព អាជ្ញាធរក្រុង សង្កាត់ មន្ត្រីជំនាញ និងបងប្អូនប្រជាពលរដ្ឋចូលរួមសិក្សារួមគ្នា។ ក្នុងអង្គវេទិកានេះ លោក នូវប៉េង ច័ន្ទតារា សមាជិកក្រុមប្រឹក្សាខេត្ត បានជំរុញដល់អាជ្ញាធរគ្រប់លំដាប់ថ្នាក់ ត្រូវចុះឱ្យដល់មូលដ្ឋាន ដើម្បីទទួលយកនូវទុក្ខកង្វល់របស់ប្រជាពលរដ្ឋ និងធ្វើការឆ្លើយតបតាមសំណូមពរឱ្យបានទាន់ពេលវេលា។ អាជ្ញាធរគ្រប់លំដាប់ថ្នាក់ត្រូវធ្វើការឱ្យបានសកម្មចំពោះការងារសន្ដិសុខ សណ្ដាប់ធ្នាប់សង្គម ការអនុវត្តគោលនយោបាយភូមិ ឃុំមានសុវត្ថិភាព និងសុវត្ថិភាពចរាចរណ៍ កិច្ចការអភិវឌ្ឍន៍មូលដ្ឋាន ការផ្ដល់សេវារដ្ឋបាលរបស់រដ្ឋបាលថ្នាក់ក្រោមជាតិ ការគ្រប់គ្រងសោភណភាព អនាម័យ បរិស្ថាន និងធនធានធម្មជាតិ និងបញ្ហាពាក់ព័ន្ធមួយចំនួនទៀត ធ្វើឱ្យមានប្រសិទ្ធភាព ដើម្បីភាពជឿជាក់របស់ប្រជាពលរដ្ឋក្នុងមូលដ្ឋានរបស់យើង។ សំណួរ និងសំណូមពររបស់ប្រជាពលរដ្ឋ ទោះដោយផ្ទាល់មាត់ រឺលាយលក្ខណ៍ជាអក្សរ ថ្នាក់ដឹកនាំ មន្ត្រីជំនាញ និងអាជ្ញាធរពាក់ព័ន្ធនឹងធ្វើការបកស្រាយបំភ្លឺជូន រីឯបញ្ហាដែលនៅសេសសល់បានទទួលយកសម្រាប់ចុះពិនិត្យ សិក្សាឱ្យបានច្បាស់លាស់ជាបន្ត ដើម្បីស្វែងរកដំណោះស្រាយឱ្យមានប្រសិទ្ធភាព។

ក្នុងវេទិកានេះ ប្រជាពលរដ្ឋបានលើកឡើងជាសំណួរ និងសំណូមពរដោយក្នុងនោះមាន ស្នើសុំជួយរៀបចំសណ្តាប់ធ្នាប់ផ្លូវ ដែលមានឡានក្រុងដឹកសិស្សជាប្រចាំនៅផ្លូវលេខ១០៨, ១០៩, ២០៩ ស្នើសុំគំនូសចរាចរណ៍ មុខសាលារៀន ផ្លូវបេតុងនឹងដាក់លូ ស្តារប្រព័ន្ធលូ ស្នើសុំភ្លើងបំភ្លឺផ្លូវ និងដាក់បង្គោលភ្លើង ជួសជុលស្ពានដែលទ្រុឌទ្រោម ស្នើសុំតបណ្ដាញអគ្គិសនី និងប្រព័ន្ធទឹកស្អាតជាដើម។ 

សូមជម្រាបជូនថា ក្នុងវេទិកានេះទទួលបានសំណើ និងសំណូមពរពីប្រជាពលរដ្ឋដូចជា សំណើជាលិខិតចំនួន៤៥ ស្មើនឹង៦៩សំណើ ផ្នែករដ្ឋបាល សន្តិសុខ សណ្តាប់ធ្នាប់ ចំនួន ៤ ផ្នែកសេដ្ឋកិច្ច ចំនួន៤៨ ផ្នែកសង្គមកិច្ចចំនួន១ ផ្នែកគ្រប់គ្រងដីធ្លី ធនធានធម្មជាតិ បរិស្ថាន បម្រែបម្រួលអាកាសធាតុចំនួន១៦៕

ដោយ ណយ នឿន (ប្រភព៖ រដ្ឋបាលខេត្តកណ្តាល)