ឯកឧត្តម អង មង្គល ជួបសំណេះសំណាល និងផ្សព្វផ្សាយខ្លឹមសារច្បាប់ស្តីពីសញ្ជាតិ ជូនដល់ស្នងការដ្ឋាននគរបាលខេត្តកណ្តាល
AKP កណ្តាល ថ្ងៃទី១១ ខែកញ្ញា ឆ្នាំ២០២៥-- ឯកឧត្តម អង មង្គល រដ្ឋលេខាធិការក្រសួងមហាផ្ទៃ ឯកឧត្តម ឯម សំណាង អនុរដ្ឋលេខាធិការក្រសួងមហាផ្ទៃ និង ឯកឧត្ដម គួច ចំរើន អភិបាលខេត្តកណ្ដាល នៅថ្ងៃទី១០ ខែកញ្ញា ឆ្នាំ២០២៥ បានអញ្ជើញជាអធិបតីក្នុងពិធីសំណេះសំណាលសួរសុខទុក្ខ ត្រួតពិនិត្យកម្លាំង និងផ្សព្វផ្សាយខ្លឹមសារស្តីពីសញ្ជាតិ ជូនដល់ស្នងការដ្ឋាននគរបាលខេត្តកណ្តាល។

មានប្រសាសន៍ក្នុងឱកាសនោះ ឯកឧត្តម អង មង្គល បានធ្វើការផ្សព្វផ្សាយច្បាប់ស្តីពីសញ្ជាតិ ដែលបានធ្វើវិសោធនកម្មមាត្រា៣៣ថ្មីរដ្ឋធម្មនុញ្ញ នៃព្រះរាជាណាចក្រកម្ពុជា និងបានចូលជាធរមានកាលពីថ្ងៃទី១៥ ខែកក្កដា ឆ្នាំ ២០២៥ កន្លងមកថ្មីៗនេះ។ ដើម្បីឱ្យមានភាពសមស្របទៅនឹងសភាពការណ៍និង ស្ថានភាពនយោបាយ ប្រព័ន្ធច្បាប់របស់ប្រទេសនីមួយៗ ក៏ត្រូវដើរអោយទាន់សភាពការណ៍ ក្នុងនោះប្រទេសកម្ពុជា ដោយមានការគិតគូរពីស្ថាប័នជាន់ខ្ពស់របស់ជាតិបានគិតគូធ្វើការកែទំរង់ផ្នែកច្បាប់នេះដោយបានស្នើសុំព្រះមហាក្សត្រ ដើម្បីធ្វើវិសោធន៍កម្មរដ្ឋធម្មនុញ្ញាមាត្រាទី៣៣ ដើម្បីអោយការវិវន្ត និងមានភាពបត់បែនច្បាស់លាស់ទៅនឹងសភាពការណ៍ បច្ចុប្បន្ន បន្ទាប់ពីបានការយល់ព្រមពីព្រះមហាក្សត្រ រាជរដ្ឋាភិបាល ដោយមានក្រសួងយុត្តិធម៌បានខិតខំប្រឹងប្រែងធ្វើកិច្ចការនេះរហូតទទួលលទ្ធផល ដូចថ្ងៃនេះហើយព្រះរាជក្រមស្តីពីការប្រកាសអោយប្រើច្បាប់ស្តីពីវិសោធនកម្មច្បាប់ស្តីពីសញ្ជាតិដែលមានពីរមាត្រា ជាការប្រញាប់ ដើម្បីទប់ទល់អោយទាន់សភាពការបច្ចុប្បន្ន។ កងកម្លាំងនគរបាលទាំងអស់ត្រូវបន្តបំពេញភារកិច្ចរបស់ខ្លួនលើកិច្ចការរក្សាសន្តិសុខ សណ្តាប់ធ្នាប់សង្គមក្នុងមូលដ្ឋាននឹងត្រូវត្រៀមលក្ខណៈឆ្លើយតបទាន់ពេលចំពោះសភាពការណ៍នានា ដែលកើតឡើងក្នុងមូលដ្ឋាន ត្រូវបន្តខិតខំហ្វឹកហាត់នូវចំណេះ ជំនាញ បម្រើឱ្យការងារ ការអនុវត្តនូវគោលនយោបាយភូមិ ឃុំ សង្កាត់មានសុវត្ថិភាព និងបង្រ្កាបរាល់បទល្មើសគ្រប់ប្រភេទក្នុងមូលដ្ឋានរបស់ខ្លួន។

ឯកឧត្តមបានកោតសរសើរដល់ប្រជាពលរដ្ឋ មន្ត្រីរាជការយើងដែលរួមគ្នាជាធ្លុងមួយ ក្នុងស្មារតីស្នេហាជាតិ បានចូលរួមជាស្បៀង និងថវិកា ជួយដល់កងទ័ពនៅសមរភូមិមុខ ព្រំដែនកម្ពុជា ថៃ កំពុងការពារដែនអធិបតេយ្យជាតិ។
ក្នុងឱកាសនោះ ឯកឧត្តម គួច ចំរើន អភិបាលខេត្តកណ្តាល បានមានប្រសាសន៍ថា ការផ្សព្វផ្សាយខ្លឹមសារស្តីពីច្បាប់សញ្ជាតិ ជូនដល់ស្នងការដ្ឋាននគរបាលខេត្តកណ្តាល នាពេលនេះពិតជាមានសារៈសំខាន់ណាស់ សម្រាប់រូបវ័នបុគ្គលព្រោះងាយស្រួលគ្រប់គ្រង ហើយច្បាប់ដែលបានតាក់តែងមកនេះ គឺដើម្បីទុកសម្រាប់ទប់ស្កាត់កុំឱ្យមានជនក្បត់ជាតិ ទៅឃុបឃិតជាមួយបរទេស ជាមួយសត្រូវ មកបំផ្លាញជាតិសាសន៍ខ្លួនឯង ដូច្នេះនគរបាលរបស់យើងគឺជាអ្នកអនុវត្តច្បាប់ ជាអ្នកដែលត្រូវបំពេញភារកិច្ចរបស់ខ្លួន ទាំងការផ្ដល់នីតិវិធី ដែលមានសញ្ជាតិ ដែលជាសមត្ថកិច្ចរបស់ខ្លួនត្រូវធ្វើដូច្នេះហើយទើប ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចាត់តាំងឱ្យធ្វើការផ្សព្វផ្សាយច្បាប់ស្ដីពីការដកសញ្ជាតិ ដល់នគរបាលរបស់យើងដែលជាអ្នកអនុវត្តច្បាប់នេះ។

ក្នុងនាមយើងជាអ្នកអនុវត្តច្បាប់នេះ ត្រូវមានការយល់ដឹង ចេះដឹង ឱ្យបានមុនប្រជាជនមហាជន រួមទាំងរូបវ័ន បុគ្គលនានាដែលគេចង់បាន ឬចង់លាឈប់សញ្ជាតិកម្ពុជា ដើម្បីយើងបានធ្វើការដោះស្រាយ ឬឆ្លើយតបជូនប្រជាពលរដ្ឋប្រកបដោយប្រសិទ្ធភាពខ្ពស់។ មន្ត្រីនគរបាលត្រូវខិតខំ ស្វែងយល់អំពីច្បាប់នៃការដកសញ្ជាតិនេះ ក្នុងនាមស្ថាប័នជំនាញ ដែលត្រូវទទួលខុសត្រូវក្នុងការអនុវត្តច្បាប់នេះ ដើម្បីរួមចំណែកជាមួយក្រសួងមហាផ្ទៃ ក្នុងការអភិវឌ្ឍច្បាប់នៃប្រកបដោយប្រសិទ្ធភាព៕
ដោយ ណយ នឿន (ប្រភព៖ រដ្ឋបាលខេត្តកណ្តាល)





