AKP ភ្នំពេញ ថ្ងៃទី៨ ខែឧសភា ឆ្នាំ២០២៦--សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជាបានបញ្ជាក់ថា ៣សប្ដាហ៍មុន ខ្ញុំនិពន្ធចម្រៀងមួយបទ ដែលមានចំណងជើងថា បាយម្ហូបស្រីដាំ ដែលរម្លឹកដល់៥១ឆ្នាំ មុន គ្រូពេទ្យក្រមុំដាំស្លផ្ទាល់ដៃឱ្យកម្លោះយោធាក្នុងខែសីហា ឆ្នាំ១៩៧៥ ដែលពេលនោះ ខ្ញុំធ្លាក់ខ្លួនពិការភ្នែកឆ្វេងទៅហើយតែគាត់នៅតែទទួលខ្ញុំឱ្យសម្រាកនៅមន្ទីរពេទ្យដែលគាត់ទទួលខុសត្រូវនៅឃុំឈូក ស្រុកក្រូចឆ្មារ និងដាំស្លផ្ទាល់ដៃឱ្យខ្ញុំទទួលទានទៀតផង។

នៅលើបណ្ដាញទំនាក់ទំនងសង្គមហ្វេសប៊ុក នាព្រឹកថ្ងៃតី៨ ខែឧសភា ឆ្នាំ២០២៦ សម្ដេចតេជោ បានសរសេរថា៖ «ខ្ញុំចូលមន្ទីរពេទ្យនេះមិនមែនជាអ្នកជំងឺទេតែជាភ្ញៀវរបស់ប្រធានមន្ទីរពេទ្យដែលក្រោយមកបានក្លាយជាភរិយារបស់ខ្ញុំ។ ម្សិលមិញ ខ្ញុំទទួលបានរូបថតប៉ុន្មានសន្លឹកដែលគាត់ធ្វើម្ហូបកាលពីឆ្នាំ២០០១ ពេលទស្សនាវដ្ដីបរទេសមកសម្ភាសន៍គាត់ពេលកំពុងដាំស្ល។»

សម្ដេចតេជោបានបញ្ជាក់ថា ក្មេងស្រីដែលគាត់កន្តៀតគឺជាចៅស្រីទី១ ដែលទើបមានអាយុជាងមួយខួបដែលតែងតែនៅជាមួយជីដូនជីតា។ សម្ដេចតេជោបានបន្ដថា ដោយសារគាត់ដាំស្លឱ្យខ្ញុំទទួលទានតាំងពីនៅកម្លោះក្រមុំ និងបន្តរៀបចំបាយម្ហូបឱ្យខ្ញុំគ្រប់ពេលរហូតសព្វថ្ងៃនិងក្រោយទទួលបានរូបនេះ។

ជាមួយគ្នានេះ សម្ដេចតេជោបានបន្ថែមថា៖ «ខ្ញុំសូមប្រសិទ្ធនាមគាត់ថា(ចុងភៅម្ហូបឆ្ងាញ់)។សង្ឃឹមថាគាត់មិនបានមើលការបង្ហោះសារនេះទៅចុះព្រោះ ខ្ញុំមិន បានសុំការយល់ព្រមពីគាត់លើឈ្មោះនេះទេ។ សូមអរគុណចុងភៅម្ហូបឆ្ងាញ់»៕

ដោយ៖ រិទ្ធី