AKP តាកែវ ថ្ងៃទី២៩ ខែសីហា ឆ្នាំ២០២៥-- នៅវិទ្យាល័យជាស៊ីមតាកែវ ស្ថិតក្នុងក្រុងដូនកែវ ខេត្តតាកែវ ឯកឧត្តម ហោ ប៉េង អនុប្រធានគណមេប្រយោគទូទាំងប្រទេសប្រចាំខេត្តតាកែវ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ឯកឧត្តម ឡេង តុលា តំណាងអង្គភាពប្រឆាំងអំពើពុករលួយ និងជាប្រធានក្រុមការងារដឹកនាំសង្កេតការណ៍ប្រឡងសញ្ញាបត្រមធ្យមសិក្សាទុតិយភូមិប្រចាំខេត្តតាកែវ បានអញ្ជើញកាត់ស្រោមវិញ្ញាសាប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី២៨-២៩ ខែសីហា ឆ្នាំ២០២៥ ឆ្នាំសិក្សា២០២៤-២០២៥ ដោយមានអញ្ជើញចូលរួមក្នុងពិធីនោះដែរដោយលោក ឡោ វីរិទ្ធ ប្រធានមន្ទីរអប់រំយុវជននិងកីឡាខេត្តតាកែវ ព្រមទាំងលោកលោកស្រីប្រធានមន្ទីរអង្គភាពជុំវិញខេត្ត និងមន្ត្រីពាក់ព័ន្ធចូលរួមជាច្រើនរូបផងដែរ។

ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានថ្លែងថា ការប្រឡងសញ្ញាបត្រមធ្យមសិក្សាទុតិយភូមិ ឆ្នាំនេះក៏មិនខុសពីឆ្នាំមុនៗដែរ គឺនៅតែមានការរឹតបន្តឹងដដែល។ហើយតម្រូវឲ្យបេក្ខជនម្នាក់ៗត្រូវតែធ្វើការប្រឡងដោយសមត្ថភាពពិតៗ និយាយជារួមអ្នកចេះគឺជាប់។ដូច្នេះបេក្ខជនទាំងអស់ត្រូវតែគោរពទៅតាមបទបញ្ជាផ្ទៃក្នុងនៃការប្រឡង ដោយមិនអនុញ្ញាតឱ្យបេក្ខជនណាម្នាក់យកសំណៅឯកសារ សៀវភៅ ទូរសព្ទដៃ និងឧបករណ៍អេឡិចត្រូនិចមួយចំនួនទៀត ចូលបន្ទប់ប្រឡងឡើយ។ប្រសិនបើអនុរក្សរកឃើញបេក្ខជនអាចនឹងបានពិន្ទុសូន្យ ឬធ្លាក់ដោយស្វ័យប្រវត្តិតែម្ដង។ម្យ៉ាងទៀតយើងមានអ្នកសង្កេតការណ៍ មកពីអង្គភាពប្រឆាំងអំពើពុរលួយ បានចូលរួមត្រួតពិនិត្យនៅមណ្ឌលប្រឡងទាំងអស់។

ឯកឧត្តម វ៉ី សំណាង បានមានប្រសាសន៍បន្តថា ការរឹតបន្តឹងនេះគឺដើម្បីពង្រឹងវិស័យអប់រំឱ្យកាន់តែល្អប្រសើរ ពិសេសចូលរួមបង្កើនធនធានមនុស្សនៅកម្ពុជា។ ពោលគឺធនធានមនុស្សដែលប្រកបដោយទេពកោសល្យ មានចំណេះដឹងពិតប្រាកដពោរពេញទៅដោយសមត្ថភាពពេញលេញនិងគ្រប់គ្រាន់ ស័ក្ដិសមជាអ្នកបន្តវេនរបស់សង្គមជាតិទៅថ្ងៃអនាគត។ ដូច្នេះហើយនេះជាអ្វីដែលក្រសួងអប់រំយុវជននិងកីឡា ត្រូវតែធ្វើនិងតម្រូវឱ្យបេក្ខជនទាំងអស់ នៅពេលប្រឡងមិនត្រូវលួចមើលគ្នា ឬចម្លងគ្នាទៅវិញទៅមកឡើយ។ពិសេសគឺមិនត្រូវបង្កភាពអាណាធិបតេយ្យនៅក្នុងពេលប្រឡងដាច់ខាត ត្រូវប្រឡងក្នុងបរិយាកាសស្ងៀមស្ងាត់ ត្រឹមត្រូវ មានតម្លាភាព និងយុត្តិធម៌ចំពោះបេក្ខជនគ្រប់ៗគ្នា។

លោក ឡោ វីរិទ្ធ ប្រធានមន្ទីរអប់រំយុវជននិងកីឡាខេត្តតាកែវ បានឱ្យដឹងថានៅខេត្តតាកែវ ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី២៨-២៩ ខែសីហា ឆ្នាំ២០២៥នេះ មានមណ្ឌលប្រឡងចំនួន១៧មណ្ឌលស្មើនឹង៣៩៦បន្ទប់ កើន១១បន្ទប់។ មានបេក្ខជនសរុបចំនួន៩៨១៦នាក់ ស្រី៥២៨៧នាក់ កើន៤៧៤នាក់ ស្រី៣២២នាក់។ ដោយក្នុងនោះដែរថ្នាក់វិទ្យាសាស្ត្រពិត មានចំនួន៤មណ្ឌលស្មើនឹង៩៧បន្ទប់ មានបេក្ខជនសរុបចំនួន២៣៨៥នាក់ស្រី១៤៧៦នាក់ និងថ្នាក់វិទ្យាសាស្ត្រសង្គមមានចំនួន១៣មណ្ឌលស្មើនឹង២៩៩បន្ទប់ មានបេក្ខជនសរុបចំនួន៧៤៣២នាក់ស្រីចំនួន៣៨១១នាក់៕

ដោយ អ៊ុច សៀង