AKP ស្ទឹងត្រែង ថ្ងៃទី០៧ ខែឧសភា ឆ្នាំ២០២៦-- រដ្ឋបាលខេត្តស្ទឹងត្រែង សហការជាមួយក្រុមហ៊ុនទីប្រឹក្សា ស៊ីជី សឺស្ថេនេបិល ឯ.ក បានរៀបចំសិក្ខាសាលាមួយ ដើម្បីផ្សព្វផ្សាយលទ្ធផលនៃការសិក្សារបាយការណ៍វាយតម្លៃហេតុប៉ះពាល់បរិស្ថានពេញលេញ (EIA) ជូនដល់មន្ទីរ អង្គភាព និងស្ថាប័នពាក់ព័ន្ធក្នុងខេត្ត កាលពីថ្ងៃទី០៦ ខែឧសភា ឆ្នាំ២០២៦ ដោយសិក្ខាសាលានេះបានប្រព្រឹត្តទៅនៅសាលប្រជុំតូចសាលាខេត្តស្ទឹងត្រែង ក្រោមវត្តមានលោក សែន វ៉ានស៊ីម អភិបាលរងខេត្ត តំណាងឯកឧត្តម សរ សុពុត្រា អភិបាលខេត្តស្ទឹងត្រែង ព្រមទាំងមានការចូលរួមពីតំណាងអាជ្ញាធរមូលដ្ឋាន មន្ទីរជំនាញ និងភាគីពាក់ព័ន្ធជាច្រើនរូប។

សិក្ខាសាលានេះត្រូវបានរៀបចំឡើងក្នុងគោលបំណងសំខាន់ ដើម្បីផ្សព្វផ្សាយ និងបង្ហាញអំពីលទ្ធផលដំបូងនៃការសិក្សារបាយការណ៍ EIA សម្រាប់គម្រោងវិនិយោគដាំដើមអាកាស្យា និងដំណាំសាកវប្បកម្មផ្សេងៗ រួមមាន ចេក ស្វាយ និងដំណាំសេដ្ឋកិច្ចផ្សេងទៀតរបស់ក្រុមហ៊ុន ភូ ម៉ាឌី អិនវេសមេន គ្រុប ដែលគ្រោងអនុវត្តនៅក្នុងភូមិសាស្ត្រ ឃុំស្រែគរ ឃុំតាឡាត់ និងឃុំក្បាលរមាស ស្រុកសេសាន ខេត្តស្ទឹងត្រែង។

ក្នុងឱកាសនោះ លោក សែន វ៉ានស៊ីម បានមានប្រសាសន៍ថា ការរៀបចំសិក្ខាសាលានេះគឺមានសារៈសំខាន់ណាស់ ក្នុងការប្រមូលយោបល់ និងធាតុចូលបន្ថែមពីរដ្ឋបាលខេត្ត អាជ្ញាធរមូលដ្ឋាន និងមន្ទីរជំនាញពាក់ព័ន្ធ ដើម្បីធានាថា របាយការណ៍វាយតម្លៃហេតុប៉ះពាល់បរិស្ថានមានភាពត្រឹមត្រូវ សុក្រឹត្យ និងគ្រប់ជ្រុងជ្រោយ មុននឹងអនុវត្តគម្រោងជាក់ស្តែង។

លោកក៏បានបន្ថែមថា គម្រោងវិនិយោគណាមួយត្រូវតែគោរពតាមបទដ្ឋានបរិស្ថាន និងច្បាប់ពាក់ព័ន្ធយ៉ាងតឹងរឹង ដោយត្រូវផ្តោតលើការអភិវឌ្ឍប្រកបដោយចីរភាព ការពារបរិស្ថានធម្មជាតិ និងការរស់នៅរបស់ប្រជាពលរដ្ឋក្នុងតំបន់។ ជាពិសេស ក្រុមហ៊ុនទីប្រឹក្សា ត្រូវធ្វើការសិក្សាឲ្យបានលម្អិតអំពីផលប៉ះពាល់នានា ទាំងផ្នែកបរិស្ថាន និងសង្គម រួមទាំងការវាយតម្លៃលើជីវចម្រុះ ធនធានធម្មជាតិ និងប្រព័ន្ធអេកូឡូស៊ីក្នុងតំបន់គម្រោង ដើម្បីកាត់បន្ថយផលប៉ះពាល់អវិជ្ជមានឱ្យបានអតិបរិមា។

ក្នុងកិច្ចពិភាក្សា តំណាងមន្ទីរ និងអាជ្ញាធរពាក់ព័ន្ធក៏បានលើកឡើងនូវមតិយោបល់ និងសំណើជាច្រើន ដើម្បីឱ្យក្រុមហ៊ុនទីប្រឹក្សា និងម្ចាស់គម្រោង យកទៅពិនិត្យកែសម្រួលបន្ថែម ឱ្យសមស្របតាមស្ថានភាពជាក់ស្តែង និងតម្រូវការអភិវឌ្ឍក្នុងតំបន់។

ជាមួយគ្នានេះផងដែរ រដ្ឋបាលខេត្តស្ទឹងត្រែងបានស្នើឱ្យក្រុមហ៊ុនទីប្រឹក្សា បន្តសិក្សាឱ្យបានម៉ត់ចត់ និងពេញលេញលើគ្រប់វិស័យពាក់ព័ន្ធ ហើយបន្ទាប់ពីបញ្ចប់ការសិក្សា ត្រូវផ្ញើរបាយការណ៍ EIA មករដ្ឋបាលខេត្ត ដើម្បីធ្វើការពិនិត្យ និងផ្តល់អនុសាសន៍បន្ថែម មុននឹងដាក់ស្នើទៅកិច្ចប្រជុំអន្តរក្រសួងសម្រេចចុងក្រោយនាពេលខាងមុខ៕

ដោយ AKP