AKP កែប ថ្ងៃទី០៧ ខែឧសភា ឆ្នាំ២០២៦-- សិក្ខាសាលានេះធ្វើឡើងនៅព្រឹកថ្ងៃទី៧ ខែឧសភា ឆ្នាំ២០២៦ នៅសាលប្រជុំមន្ទីរអប់រំ យុវជន និងកីឡាខេត្តកែប ក្រោមអធិបតីភាព លោក អ៊ឹម បញ្ញារិទ្ធិ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប និងបានការចូលរួមពីថ្នាក់ដឹកនាំមន្ទីរអង្គភាពក្នុងខេត្ត មន្ត្រីនៃមន្ទីរអប់រំ   និងលោកគ្រូ អ្នកគ្រូផងដែរ។ 

មានប្រសាសន៍សំណេះសំណាលក្នុងសិក្ខាសាលានេះ លោក អ៊ឹម បញ្ញារិទ្ធិ អភិបាលរងខេត្ត បានលើកឡើងថា សុខភាពសិក្សារបស់សិស្សានុសិស្សគឺជាកត្តាសំខាន់ក្នុងការលើកកម្ពស់គុណភាពអប់រំ និងប្រសិទ្ធភាពនៃការសិក្សា។  ការអនុវត្តផែនការសកម្មភាពសុខភាពសិក្សា  គឺទាមទារឱ្យមានការចូលរួមពីគ្រឹះស្ថានសិក្សាទាំងអស់ ក្នុងការយកចិត្តទុកដាក់លើសុខភាពផ្លូវកាយ និងផ្លូវចិត្តរបស់សិស្ស បញ្ហាអនាម័យ ការប្រើប្រាស់អាហារដែលមានសុវត្ថិភាព និងការរស់នៅក្នុងបរិស្ថានស្អាត ដើម្បីធានាសុខុមាលភាពល្អសម្រាប់សិស្សានុសិស្ស។ 

ទន្ទឹមនឹងនោះ មន្ទីរសុខាភិបាល និងភាគីពាក់ព័ន្ធ ក៏ត្រូវចូលរួមយ៉ាងសកម្មក្នុងការលើកកម្ពស់សុខភាពសិក្សា តាមរយៈការផ្សព្វផ្សាយអំពីការប្រើប្រាស់ទឹកស្អាត អនាម័យ និងការថែរក្សាបរិស្ថានក្នុងសាលារៀនដែរ។ 

លោកអភិបាលរងខេត្តបានជំរុញឱ្យគ្រប់សាលារៀន គ្រឹះស្ថានសិក្សាទាំងអស់ ត្រូវអនុវត្តលើការលើកកម្ពស់បរិស្ថានបៃតង ដោយការដាំដើមឈើ ការផ្សព្វផ្សាយច្បាប់ចរាចរណ៍ផ្លូវគោក និងបញ្ហាគ្រឿងញៀនជាដើម៕

ដោយ AKP